Petóiá i ngkóráꞌna Pueꞌ Ala
Morasiꞌ tauna to mampeuláꞌi Áturána Pueꞌ
119
Morasiꞌ ntepuꞌu tauna to tiꞌara ara salaꞌiáraꞌ,to mampeuláꞌi Paturoꞌna PUEꞌ.
2 Morasiꞌ ntepuꞌu tauna to mampeuláꞌi párentáNa,
to moundeꞌ ntepuꞌu moisá peundeꞌáNa,
3 to tiꞌara woꞌo mobábehi bábehiá to kadake,
agáiáná tueꞌheꞌ mouláꞌ rárána PUEꞌ.
4 Io miꞌi to mopakanótó áturáMu
bona kipeuláꞌi ntepuꞌu.
5 Kuhárungá lalungkuꞌ tiꞌara mambáliꞌ,
bona mampeuláꞌiaꞌ oaꞌ párentáMu.
6 Ane kupailalu oaꞌ hawaꞌMu,
tiꞌaraꞌaꞌ ina mahili.
7 Ina kutóiáKoꞌ hangko i kabulána lalungkuꞌ
tempóngkuꞌ mampegurui kamanótóna ráráMu mebutusi.
8 Ina kupeuláꞌi oaꞌ párentáMu.
Ineeꞌaꞌ Nupálehi.
Tetidaꞌ i paturoꞌna Pueꞌ Ala
9 Noumbá rárána tauna to maleheꞌ mani
peisá mokámpái laluna bona bábehiána maroꞌa oaꞌ?
Ia hangaa-ngaa mampeuláꞌi oaꞌ ngkóráꞌMu.
10 Hangko i lalungkuꞌ ntepuꞌu
kuꞌundeꞌ mampeuláꞌi peundeꞌáMu.
Ineeꞌaꞌ Nupatodáhi mokábáhá párentáMu.
11 DándiMu kupailalu ntepuꞌu,
bona tiꞌaraꞌaꞌ madósá i Hio.
12 Ó PUEꞌ, kutóiá mpuꞌuKoꞌ.
Kupembiáꞌ bona Nupaturoꞌáꞌaꞌ párentá-párentáMu.
13 Kupolaluita kupasimbuku
upu-upu pobutusi to Nupakanótó.
14 Góeꞌ ntepuꞌuaꞌ mampeuláꞌi upu-upu peundeꞌáMu,
nodo to góeꞌ molámbiꞌ párewá to handaꞌ.
15 Ina kupepekiri upu-upu áturáMu,
hai ina kupailalu upu-upu ráráMu.
16 Ina góeꞌaꞌ mampeuláꞌi párentáMu,
hai ngkóráꞌMu tiꞌara ina kukáláliꞌá.
Kagóeꞌ lalu ánti áturána Pueꞌ
17 Kupembiáꞌ bona Nubábehi to maroꞌa
i kódóꞌ hawiꞌMu deꞌe, bona tueꞌaꞌ
hai mampeuláꞌi oaꞌ ngkóráꞌMu.
18 Nubungkáhi pampekiringkuꞌ bona moisáꞌaꞌ
apa to maroꞌa ntepuꞌu i PaturoꞌMu.
19 Hampaiꞌ peá katueꞌkuꞌ i duniáꞌ deꞌe,
nodo peaꞌ tohaweꞌ.
Ineeꞌ Nuwuniángi párentáMu hangko i kódóꞌ.
20 Alo-alona mabila ntepuꞌuaꞌ
i áturáMu.
21 Nukámbáróáheꞌ tauna to mampepemahile,
Nuhukuheꞌ tauna to tiꞌara piꞌi mampeuláꞌi párentá-párentáMu.
22 Kupembiáꞌ bona Nupakaraoꞌ hangko i kódóꞌ
pesasalaꞌi hai pepakóiꞌ,
láwiꞌ mampeuláꞌiaꞌ peundeꞌáMu.
23 Kehapiꞌ tauna to makuasaꞌ himpuduheꞌ moewaꞌaꞌ,
agáiáná kódóꞌ bateꞌkuꞌ mampepekiri párentá-párentáMu.
24 Góeꞌ ntepuꞌuaꞌ i peundeꞌáMu,
láwiꞌ kupegurui hangko i paturoꞌ iti.
Kuꞌundeꞌ mampeuláꞌi hawaꞌna Pueꞌ
25 Hungkuꞌmoꞌ mate.
Kupembiáꞌ bona Nukámpái tueꞌkuꞌ
hintotoꞌ hai dándiMu.
26 Upu-upu to kubábehi, kupodarita miꞌi i Hio,
haneꞌiaꞌ Nuhániki.
Kupembiáꞌ bona Nupaturoꞌáꞌaꞌ párentá-párentáMu.
27 Nutulungiaꞌ bona kuisá ntepuꞌu tunggáiána áturáMu,
hai ina kupepekiri kamaroꞌana upu-upu to Nubábehi.
28 Kawiora motimpukuaꞌ.
Kupembiáꞌ bona Nupakaróhóaꞌ hintotoꞌ hai ngkóráꞌMu.
29 Nupakaraoꞌaꞌ hangko i bábehiá to mebagiuꞌ.
Nupaturoꞌáꞌaꞌ PaturoꞌMu ánti kamaroꞌaMu i kódóꞌ.
30 Kupakanótó miꞌi i lalungkuꞌ ina tetidaꞌaꞌ i Hio,
hai ina mopaliliuaꞌ oaꞌ mampeuláꞌi áturáMu.
31 Mampeuláꞌiaꞌ peundeꞌáMu.
Ó PUEꞌ, ineeꞌaꞌ Nupatodáhi kahiliá.
32 Kuꞌundeꞌ ntepuꞌu mampopolumao párentá-párentáMu,
láwiꞌ Io miꞌi to motulungiaꞌ bona kuisá apa tunggáiána.
Pekakae bona moisá áturána Pueꞌ
33 Ó PUEꞌ, kupembiáꞌ bona Nupaturoꞌáꞌaꞌ
apa tunggáiána párentáMu,
bona kupeuláꞌi haweꞌ i kahópóꞌána tueꞌkuꞌ.
34 Nupopewaliꞌaꞌ tauna to moisá PaturoꞌMu,
bona kupeuláꞌi hangko i lalungkuꞌ ntepuꞌu.
35 Kupembiáꞌ Nutulungiaꞌ bona mampeuláꞌiaꞌ párentáMu,
láwiꞌ góeꞌ ntepuꞌuaꞌ i hawaꞌMu iti.
36 Nupagóeꞌaꞌ bona kuꞌundeꞌ mampeuláꞌi peundeꞌáMu,
hai tiꞌara piꞌi kuꞌundeꞌ mampeliꞌ peá porasiꞌángkuꞌ.
37 Ineeꞌaꞌ Nupatodáhi mampeliꞌ to tiꞌara mobunduꞌ.
Nutulungiaꞌ bona tueꞌaꞌ hintotoꞌ hai ráráMu.
38 Nubukeki dándiMu i kódóꞌ hawiꞌMu deꞌe.
DándiMu iti Nuweꞌimoheꞌ woꞌo tauna to mengkoruꞌ i Hio.
39 Nupakaraoꞌaꞌ hangko i pesasalaꞌi to kupokalááꞌ,
láwiꞌ áturáMu maroꞌa.
40 Kuꞌundeꞌ ntepuꞌu mampopolumao áturá-áturáMu.
Nukámpái tueꞌkuꞌ láwiꞌ mampopolumaoKoꞌ oaꞌ to hintotoꞌ.
Mehárungá i áturána Pueꞌ
41 Ó PUEꞌ, kupembiáꞌ bona Nupatongawaꞌ kamaꞌahiꞌMu i kódóꞌ,
hai Nupelaeaꞌ hintotoꞌ hai dándiMu,
42 bona peisáꞌaꞌ mohániki tauna to motitibeiaꞌ,
láwiꞌ mampoináláiaꞌ ngkóráꞌMu.
43 Ineeꞌ mpuꞌuaꞌ Nupatodáhi mohuwárá laluita to tiꞌara toꞌu,
láwiꞌ mehárungáꞌaꞌ i pobutusiMu.
44 Ina kupeuláꞌi oaꞌ PaturoꞌMu
haweꞌ i rue-ruena.
45 Ewálingkuꞌ tiꞌara ina mopamapáriaꞌ,
láwiꞌ kuꞌundeꞌ mampeuláꞌi áturá-áturáMu.
46 Ina kupahaweꞌ peundeꞌáMu i lindoꞌraꞌ datu,
hai tiꞌaraꞌaꞌ mahili.
47 Kuꞌundeꞌ ntepuꞌu mampeuláꞌi párentá-párentáMu
láwiꞌ iti to kupokagóeꞌ.
48 Kupomahile hai kuꞌundeꞌ párentá-párentáMu,
hai ina kupepekiri áturá-áturáMu.
Mepoinálái i áturána Pueꞌ
49 Ineeꞌ Nukáláliꞌá ngkóráꞌMu i kódóꞌ hawiꞌMu,
láwiꞌ dándiMu iti to kuhárungá.
50 To mopalindóaꞌ i lalu kamapáringkuꞌ ia miꞌi:
podándiMu mokámpái katueꞌkuꞌ.
51 Tauna to mampepemahile motitibei mpiiꞌaꞌ,
agáiáná kódóꞌ bateꞌkuꞌ tetidaꞌ i PaturoꞌMu.
52 Ó PUEꞌ, kubuhinao áturá-áturáMu to ara miꞌi ami,
onoꞌ haneꞌi tepalindó lalungkuꞌ.
53 Mabukoꞌ ntepuꞌuaꞌ i tauna to kadake,
láwiꞌ tiꞌarapoheꞌ mampeuláꞌi PaturoꞌMu.
54 Monani-naniaꞌ mokana i párentáMu
lántuꞌángkuꞌ mani toroꞌ i duniáꞌ deꞌe.
55 Tangaꞌ káindi kubuhinaoKoꞌ PUEꞌ,
bateꞌna ina mampeuláꞌiaꞌ PaturoꞌMu.
56 Morasiꞌ ntepuꞌuaꞌ,
láwiꞌ mampeuláꞌiaꞌ áturá-áturáMu.
Dándina tauna mampeuláꞌi áturána Pueꞌ
57 Ó PUEꞌ, Io peá to kuhárungá i lalu katueꞌkuꞌ.
Modándiaꞌ ina mampeuláꞌi ngkóráꞌMu.
58 Hangko i lalungkuꞌ ntepuꞌu
kupembiáꞌ bona Nupatongawaꞌ kamaꞌahiꞌMu
hintotoꞌ hai dándiMu.
59 Mampekiriaꞌ rárá katueꞌkuꞌ hai menosoꞌaꞌ,
onoꞌ haneꞌi kudándi ina mampeuláꞌiaꞌ peundeꞌáMu.
60 Kupegagu mampeuláꞌi párentá-párentáMu,
tiꞌara ina kuindá-indá.
61 Kehapiꞌ tauna to kadake mohakaꞌaꞌ,
agáiáná tiꞌaraꞌaꞌ mokáláliꞌá PaturoꞌMu.
62 Tangaꞌ káindi mearóaꞌ motóiáKoꞌ,
láwiꞌ pobutusiMu hintotoꞌ.
63 Morángáꞌaꞌ hai tauna to mengkoruꞌ i Hio,
hai mampeuláꞌi áturá-áturáMu.
64 MampokaꞌahiꞌKoꞌ upu-upu tauna i duniáꞌ.
Ó PUEꞌ, Nupaturoꞌaꞌ bona moisáꞌaꞌ párentá-párentáMu.
Pembiáꞌ bona Pueꞌ Ala mepaturoꞌ
65 Ó PUEꞌ, kupembiáꞌ bona Nubábehi to maroꞌa
i kódóꞌ hawiꞌMu, hintotoꞌ hai dándiMu.
66 Nupaturoꞌaꞌ bona mewaliꞌaꞌ tauna to mapánde
hai bukeꞌ timbá,
láwiꞌ mepoináláiaꞌ i párentáMu.
67 Hangko tiꞌara maniaꞌ molámbiꞌ kapári,
mengkarooaꞌ mampeuláꞌi párentáMu,
agáiáná deꞌe-deꞌe mampeuláꞌi wopaꞌaꞌ ngkóráꞌMu.
68 MaroꞌaKoꞌ, hai mobábehiKoꞌ to maroꞌa.
Kupembiáꞌ bona Nupaturoꞌaꞌ
bona kuisá párentá-párentáMu.
69 Tauna to mampepemahile modongkoꞌ
hai mopakadake hangaꞌkuꞌ,
agáiáná mampeuláꞌiaꞌ áturá-áturáMu
hangko i lalungkuꞌ ntepuꞌu.
70 Matuꞌa laluraꞌ láwiꞌ tiꞌaraheꞌ mau moisá PaturoꞌMu,
agáiáná kódóꞌ mampogóeꞌaꞌ PaturoꞌMu iti.
71 TunggáiáMu mopamapáriaꞌ maroꞌa,
bona mampeguruiaꞌ párentá-párentáMu.a
72 Paturoꞌ to Nupahaweꞌ maroꞌa ntepuꞌu i kódóꞌ,
melumbuꞌ kamaroꞌana haneꞌi molámbiꞌ handaꞌ ntepuꞌu buláwá hai peráꞌ.
Paturoꞌna Pueꞌ manótó
73 Io miꞌi Topohiaꞌ Karaweꞌ to mampopewaliꞌaꞌ,
Kupembiáꞌ bona Nubungkáhi pekiringkuꞌ,
bona kubuku mampegurui párentá-párentáMu.
74 Tauna to mengkoruꞌ i Hio, góeꞌheꞌ moitaꞌaꞌ,
láwiꞌ mehárungáꞌaꞌ i ngkóráꞌMu.
75 Ó PUEꞌ, kuisá pobutusiMu manótó.
Nupamapáriꞌmoꞌ ánti katetidaꞌMu i podándiMu.b
76 Hampóáꞌworia ahiꞌMu mopalindó lalungkuꞌ,
hintotoꞌ hai dándiMu i kódóꞌ hawiꞌMu.
77 Kupembiáꞌ Nupokaꞌahiꞌaꞌ bona tueꞌaꞌ,
láwiꞌ góeꞌaꞌ i PaturoꞌMu.
78 Kuhárungá tauna to mampepemahile ina rapakahiliá,
láwiꞌ mobábehiheꞌ to kadake i kódóꞌ
kehapiꞌ tiꞌara ara ntóáꞌna.
Agáiáná kódóꞌ, ina mampekiriaꞌ oaꞌ áturá-áturáMu.
79 Hampóáꞌworia tauna to mengkoruꞌ i Hio,
to moisá peundeꞌáMu, ina maiheꞌ i kódóꞌ.
80 Kuhárungá ina mampeuláꞌiaꞌ párentáMu
hangko i lalungkuꞌ ntepuꞌu, bona tiꞌaraꞌaꞌ rapakahiliá.
Pekakae bona tekábáhá hangko i ewali
81 Kupoinao ina Nupelaeaꞌ.
Mehárungáꞌaꞌ i ngkóráꞌMu.
82 Mawonggoꞌmoꞌ mampegiá kaꞌina Nubukekina dándiMu.
Kupekuneꞌ, “ImpiráKoꞌ ina mopakaróhó lalungkuꞌ?”
83 Katueꞌkuꞌ tiꞌara piꞌi mobunduꞌ,
nodo peaꞌ kárándi to magero,
agáiáná tiꞌaraꞌaꞌ mokáláliꞌá párentá-párentáMu.
84 Hangapa mani kamaruena hawiꞌMu deꞌe mampegiáKoꞌ?
ImpiráKoꞌ ina mohuku tauna to mampopeahiahiꞌaꞌ?
85 Tauna to mampepemahile mampoinao mopakanawoꞌaꞌ,
tiꞌaraheꞌ mampeuláꞌi PaturoꞌMu.
86 Upu-upu párentáMu peisá rapoinálái.
Kupembiáꞌ bona Nutulungiaꞌ,
láwiꞌ ara to mampopeahiahiꞌaꞌ,
kehapiꞌ tiꞌara ara álásáraꞌ.
87 Hungkuꞌaꞌ ina rapapate,
agáiáná kehapiꞌ noꞌonoꞌ, tiꞌaraꞌaꞌ mokábáhá áturáMu.
88 Kupembiáꞌ bona Nukámpái katueꞌkuꞌ,
ánti kamaꞌahiꞌMu to tiꞌara madepuꞌ-depuꞌ,
bona mampeuláꞌiaꞌ peundeꞌáMu to Nupahaweꞌá i kaiꞌ.
Mepoinálái i ngkóráꞌna PUEꞌ
89 Ó PUEꞌ, ngkóráꞌMu ina ara oaꞌ
haweꞌ i rue-ruena i surugáꞌ.
90 Nupatongawaꞌ oaꞌ katetidaꞌMu i taunáMu,
Nupopewaliꞌ duniáꞌ haneꞌi mantaha oaꞌ.
91 Hinángkáꞌ to ara deꞌe-deꞌe mewaliꞌ ánti popakanótóMu,
láwiꞌ upu-upuna mengkoruꞌ i párentáMu.
92 Ane ketiꞌaraꞌaꞌ góeꞌ i PaturoꞌMu,
kebateꞌkuꞌ mate ánti kamapáringkuꞌ.
93 Lántuꞌángkuꞌ mani tueꞌ, tiꞌaraꞌaꞌ ina mokáláliꞌá áturá-áturáMu,
láwiꞌ áturáMu iti to mokámpái tueꞌkuꞌ.
94 Kupembiáꞌ bona Nupelaeaꞌ, láwiꞌ kódóꞌ taunáMuaꞌ,
hai kupári-pári mampeuláꞌi áturá-áturáMu.
95 Tauna to kadake mampegiáheꞌ tempó ina mopapateaꞌ,
agáiáná mampepekiriaꞌ oaꞌ peundeꞌáMu.
96 Kuisá hinángkáꞌna to ara tetámpáꞌ,
agáiáná párentáMu tiꞌara ara támpáꞌna.
Paturoꞌna Pueꞌ mopamapánde tauna
97 Kuꞌundeꞌ ntepuꞌu PaturoꞌMu,
kupekiri oaꞌ hangaloá-loá.
98 Kaladu mani pekiringkuꞌ haneꞌi pekiriraꞌ ewálingkuꞌ,
láwiꞌ kupekiri oaꞌ párentáMu.
99 Pekiringkuꞌ melumbuꞌ kamaroꞌana
hangko i pekiriraꞌ upu-upu gurungkuꞌ,
láwiꞌ kupailalu oaꞌ peundeꞌáMu.
100 Handaꞌ mani to kuisá haneꞌi totosae,
láwiꞌ mampeuláꞌiaꞌ áturáMu.
101 Kukaraohi hinángkáꞌ to kadake,
bona peisáꞌaꞌ mampeuláꞌi ngkóráꞌMu.
102 Tetidaꞌaꞌ oaꞌ i áturáMu,
láwiꞌ Io miꞌi to mopaturoꞌaꞌ.
103 Matáni ntepuꞌu polaluitaMu,
melumbuꞌ kamatánina hangko i tináháꞌ.
104 Moliu áturáMu, mantámbái to kuisá,
onoꞌ miꞌi haneꞌi kukáhihiꞌ upu-upu to mebagiuꞌ.
Áturána Pueꞌ mowangkaꞌi katueꞌtaꞌ
105 NgkóráꞌMu nodo palita
to mowangkaꞌi katueꞌkuꞌ.
106 Modándiaꞌ hai kupakaróhó hai totowi,
ina mampeuláꞌiaꞌ upu-upu pobutusiMu láwiꞌ hintotoꞌ.
107 Mapári ntepuꞌu katueꞌkuꞌ.
Ó PUEꞌ, Nukámpáiaꞌ wongkódóꞌá
hintotoꞌ hai ngkóráꞌMu.
108 Ó PUEꞌ, hampóáꞌworia petóiá to kuhuwárá hangko i lalungkuꞌ ntepuꞌu,
ina Nutarima, hai ina Nupaturoꞌaꞌ áturá-áturáMu.
109 Tueꞌkuꞌ bukeꞌ hai to mepahurewuꞌ,
agáiáná tiꞌara kukáláliꞌá PaturoꞌMu.
110 Tauna to kadake moundeꞌ mopakanawoꞌaꞌ,
agáiáná tiꞌaraꞌaꞌ mengkaroo mampeuláꞌi áturáMu.
111 PárentáMu kukádipurá,
nodoaꞌ mokádipurá sosora duuꞌna haweꞌ i rue-ruena,
láwiꞌ iti miꞌi to kupokagóeꞌ.
112 Kudándi ina mampeuláꞌiaꞌ oaꞌ párentá-párentáMu
haweꞌ kahópóꞌána tueꞌkuꞌ.
Maroꞌa katueꞌraꞌ tauna to mampeuláꞌi áturána Pueꞌ
113 Mokáhihiꞌaꞌ tauna to tiꞌara toꞌu-toꞌu pengkoruꞌna i Hio,
agáiáná kódóꞌ, moundeꞌ ntepuꞌuaꞌ PaturoꞌMu.
114 Io miꞌi pengkatueꞌángkuꞌ to mokámpáiaꞌ nodo lábá.
Mehárungáꞌaꞌ i ngkóráꞌMu.
115 Ee tauna to kadake! Pohuꞌmokou hangko i kódóꞌ.
Ina mampopolumaoaꞌ hawaꞌna Pueꞌ Ala to kupenómbái.
116 Kupembiáꞌ bona Nupakaróhóaꞌ
hintotoꞌ hai dándiMu, bona tueꞌaꞌ.
Kuhárungá ina Nupelaeaꞌ,
mewaliꞌ ineeꞌaꞌ Nupatodáhi kahiliá.
117 Nupakaróhóaꞌ bona tepelaeaꞌ,
hai ina mampeuláꞌiaꞌ oaꞌ párentá-párentáMu.
118 MosapuákaKoꞌ upu-upu tauna
to tiꞌara piꞌi mampeuláꞌi hawaꞌMu.
Poliworaꞌ mebagiuꞌ tiꞌara mewaliꞌ.
119 Upu-upu tauna to kadake bábehiáraꞌ
nodo peá dái i Hio,
onoꞌ haneꞌi kuꞌundeꞌ peundeꞌáMu.
120 Moridiꞌaꞌ ánti kamalááꞌkuꞌ i Hio,
hai malááꞌaꞌ i pobutusiMu.
Mengkoruꞌ i áturána Pueꞌ
121 Mobábehimoꞌ to hintotoꞌ hai manótó.
Ineeꞌaꞌ Nuhuhuꞌ i tauna to mampopeahiahiꞌaꞌ.
122 Kupembiáꞌ bona Nudándi
ina Nubábehi to maroꞌa i hawiꞌMu deꞌe.
Ineeꞌ Nupatodáhi tauna to mampepemahile
mokada-kadaꞌaꞌ.
123 Mawonggoꞌmoꞌ mampegiá kaꞌina Nupelaengkuꞌ,
hintotoꞌ hai dándiMu to manótó.
124 Kupembiáꞌ bona Nupatongawaꞌ kamaꞌahiꞌMu i hawiꞌMu deꞌe,
hai Nupaturoꞌaꞌ párentáMu.
125 Kódóꞌ deꞌe hawiꞌMu, kupembiáꞌ bona
Nupoweꞌiaꞌ pekiri, bona moisáꞌaꞌ peundeꞌáMu.
126 Ó PUEꞌ, haweꞌ miꞌi tempóMu mohukuheꞌ tauna
to tiꞌara mampeuláꞌi PaturoꞌMu.
127 Kuꞌundeꞌ párentáMu
melumbuꞌ hangko i buláwá to mengkilaꞌ ntepuꞌu.
128 Onoꞌ miꞌi haneꞌi mampeuláꞌiaꞌ upu-upu áturáMu.
Kukáhihiꞌ upu-upu bábehiá to mebagiuꞌ.
Peundeꞌá mampeuláꞌi áturána Pueꞌ
129 PeundeꞌáMu maroꞌa ntepuꞌu,
onoꞌ miꞌi haneꞌi kupeuláꞌi.
130 Ane Nupakanótóáꞌangkaiꞌ
apa to Nutunggái i lalu ngkóráꞌMu,
lalungkiꞌ ina mewangkaꞌ,
hai tauna to tiꞌara hangka iumbá pekiriraꞌ
mantámbái to raisá.
131 Kuꞌundeꞌ ntepuꞌu meguru paturoꞌMu.
Mabilaꞌaꞌ i párentáMu.
132 Kupembiáꞌ bona Nupehaileꞌaꞌ,
hai Nupatongawaꞌ kamaꞌahiꞌMu i kódóꞌ,
hibali hai kaNupokaꞌahiꞌna
tauna to mampomahileKoꞌ.
133 Nuteteꞌaꞌ hintotoꞌ hai dándiMu.
Ineeꞌaꞌ Nupatodáhi nakuasaꞌi dósá.
134 Nukábáháꞌaꞌ hangko i tauna to mampopeahiahiꞌaꞌ,
bona peisáꞌaꞌ mampeuláꞌi áturá-áturáMu.
135 Nupokagóeꞌaꞌ hai Nupaturoꞌaꞌ hawiꞌMu deꞌe,
bona kuisá párentá-párentáMu.
136 Uwai mátángkuꞌ moili oaꞌ,
láwiꞌ tauna tiꞌara mampeuláꞌi PaturoꞌMu.
Áturána Pueꞌ tiꞌara mampopontaniꞌ tauna
137 Ó PUEꞌ, manótóKoꞌ,
hai áturáMu hintotoꞌ ntepuꞌu.
138 PeundeꞌáMu to Nupahaweꞌámongkaiꞌ manótó,
hai peisá ntepuꞌu rapoinálái.
139 Mabukoꞌ ntepuꞌuaꞌ láwiꞌ ewálingkuꞌ
tiꞌaraheꞌ mampeuláꞌi ngkóráꞌMu.
140 DándiMu peisá ntepuꞌu rapoinálái,
hai kódóꞌ hawiꞌMu, kuꞌundeꞌ ntepuꞌu mampeuláꞌi.
141 Kódóꞌ deꞌe, tiꞌaraꞌaꞌ mobunduꞌ,
hai paka ara to mopakóiꞌaꞌ,
agáiáná tiꞌaraꞌaꞌ mokáláliꞌá áturá-áturáMu.
142 KamanótóMu haweꞌ i rue-ruena,
hai PaturoꞌMu peisá rapoinálái.
143 Kamasusa hai kamapári morampe katueꞌkuꞌ,
agáiáná párentá-párentáMu mopagóeꞌaꞌ.
144 PeundeꞌáMu manótó haweꞌ i rue-ruena.
Kupembiáꞌ bona Nupoweꞌiaꞌ pekiri bona tueꞌaꞌ.
Pekakae membiáꞌ bona rapelae hangko i ewali
145 Meraruaꞌaꞌ i PUEꞌ hangko i lalungkuꞌ ntepuꞌu.
Ó PUEꞌ, Nuhániki pembiáꞌkuꞌ.
Kuꞌundeꞌ mampeuláꞌi párentáMu!
146 Meraruaꞌaꞌ i Hio bona Nupelaeaꞌ.
Kuꞌundeꞌ mampeuláꞌi peundeꞌáMu.
147 Mearóaꞌ mepulo-pulo hai meraruaꞌaꞌ membiáꞌ tulungi.
Mehárungáꞌaꞌ i ngkóráꞌMu.
148 Hambengiá-ngiá tiꞌaraꞌaꞌ letaꞌ
bona peisáꞌaꞌ mampekiri ngkóráꞌMu.
149 Ó PUEꞌ, Nupehádingi peraruaꞌkuꞌ
ánti kamaꞌahiꞌMu to tiꞌara mokahópóꞌá.
Nukámpái katueꞌkuꞌ hintotoꞌ hai pobutusiMu.
150 Tauna to mampopeahiahiꞌaꞌ,c hungkuꞌmoheꞌ.
Tunggáiáraꞌ kadake, láwiꞌ karaoꞌheꞌ hangko i PaturoꞌMu.
151 Agáiáná Io PUEꞌ, hungkuꞌKoꞌ i kódóꞌ,
hai upu-upu párentáMu peisá rapoinálái.
152 Marue miꞌi kuisá hangko i peundeꞌáMu,
Nupakanótó miꞌi ami
bona áturá-áturáMu ina ara oaꞌ haweꞌ i rue-ruena.
Pekakae membiáꞌ pekámpáina Pueꞌ
153 Kupembiáꞌ bona Nupeita kamapáringkuꞌ hai Nukábáháꞌaꞌ,
láwiꞌ tiꞌara kukáláliꞌá PaturoꞌMu.
154 Nuperuruꞌiaꞌ hai Nukábáháꞌaꞌ,
Nukámpái katueꞌkuꞌ hintotoꞌ hai dándiMu.
155 TiꞌaraKoꞌ mampelae tauna to kadake,
láwiꞌ tiꞌaraheꞌ mau mampeuláꞌi párentáMu.
156 Ó PUEꞌ, mahile ahiꞌMu.
Kupembiáꞌ bona Nukámpái katueꞌkuꞌ
mouláꞌ pobutusiMu to hintotoꞌ.
157 Handaꞌheꞌ ewálingkuꞌ to modápáꞌaꞌ,
agáiáná kódóꞌ, tetidaꞌaꞌ oaꞌ i peundeꞌáMu.
158 Kukáhihiꞌ moita tauna to tiꞌara tetidaꞌ i Hio,
láwiꞌ tiꞌaraheꞌ mampeuláꞌi ngkóráꞌMu.
159 Peita, Nupailalu noumbá kakupomahilena áturáMu.
Ó PUEꞌ, kupembiáꞌ bona Nukámpái katueꞌkuꞌ hintotoꞌ hai kamaꞌahiꞌMu.
160 Upu-upu laluitaMu peisá rapoinálái,
hai upu-upu pobutusiMu manótó haweꞌ i rue-ruena.
Mengkoruꞌ i áturána Pueꞌ
161 Tauna to makuasaꞌ mepárentá
mampopeahiahiꞌaꞌ ina mopakarugiꞌaꞌ,
kehapiꞌ tiꞌara ara ntóáꞌna,
agáiáná ngkóráꞌMu riꞌi to kuporidiꞌ
ánti kamalááꞌkuꞌ.
162 DándiMu mopagóeꞌ lalungkuꞌ,
nodoaꞌ tauna to molámbiꞌ handaꞌ kapebuku.
163 Mokáhihiꞌ ntepuꞌuaꞌ dongkoꞌ,
agáiáná kuꞌundeꞌ ntepuꞌu PaturoꞌMu.
164 Pitu kánina hangalo kutóiáKoꞌ
ánti pobutusiMu to hintotoꞌ.
165 Tauna to moundeꞌ PaturoꞌMu, tueꞌheꞌ i katinda lalu,
tiꞌara ara to peisá mopakanawoꞌheꞌ.
166 Ó PUEꞌ, mampegiáꞌaꞌ kaꞌina Nupelaengkuꞌ,
hai mampopolumaoꞌaꞌ párentá-párentáMu.
167 Mampeuláꞌiaꞌ peundeꞌáMu,
kuꞌundeꞌ hangko i lalungkuꞌ ntepuꞌu.
168 Mampeuláꞌiaꞌ áturáMu hai peundeꞌáMu,
láwiꞌ moisámoKoꞌ upu-upu to kubábehi.
Pekakae membiáꞌ tulungi
169 Ó PUEꞌ, hampóáꞌworia Nupehádingi peraruaꞌkuꞌ i Hio,
Nupoweꞌiaꞌ pekiri hintotoꞌ hai dándiMu.
170 Nupehádingi pembiáꞌkuꞌ,
Nukábáháꞌaꞌ, láwiꞌ modándimoKoꞌ i kódóꞌ.
171 Kuꞌundeꞌ motóiáKoꞌ oaꞌ,
láwiꞌ Nupaturoꞌaꞌ párentáMu.
172 Kuꞌundeꞌ monani mokana i ngkóráꞌMu,
láwiꞌ upu-upu párentáMu manótó.
173 Kuhárungá timamaKoꞌ oaꞌ motulungiaꞌ,
láwiꞌ kupileꞌi miꞌi ina mampeuláꞌiaꞌ áturáMu.
174 Ó PUEꞌ, kuhárungá kaꞌina Nupelaengkuꞌ,
hai PaturoꞌMu mopagóeꞌ lalungkuꞌ.
175 Kupembiáꞌ bona Nukádipurá katueꞌkuꞌ bona kutóiáKoꞌ.
Kuhárungá áturá-áturáMu ina motulungiaꞌ
bona tueꞌaꞌ hintotoꞌ hai peundeꞌáMu.
176 Puhaꞌaꞌ nodo dimbá to mentóló hangko i topoewuna.
Ó Pueꞌ, kupembiáꞌ bona maiaꞌ Nupeliꞌ,
láwiꞌ tiꞌara kukáláliꞌá párentá-párentáMu.