Nani petóiá ánti penangi
118
Tatóiá PUEꞌ ánti kamaroꞌaNa.Ia mopatongawaꞌ oaꞌ kamaꞌahiꞌNa.
2 Ee toSáráeliꞌ, hangaa-ngaa manguliꞌkou:
“KamaꞌahiꞌNa haweꞌ i rue-ruena.”
3 Tadulako-tadulako menómbá,a hangaa-ngaa manguliꞌkou:
“KamaꞌahiꞌNa haweꞌ i rue-ruena.”
4 Tauna to mengkoruꞌ i PUEꞌ, hangaa-ngaa manguliꞌkou:
“KamaꞌahiꞌNa haweꞌ i rue-ruena.”
5 I lalu kamapáringkuꞌ, mekakaeaꞌ i PUEꞌ.
Ia motulungiaꞌ hai mopatinda lalungkuꞌ.
6 Tiꞌaraꞌaꞌ malááꞌ, láwiꞌ PUEꞌ to mamporángáꞌaꞌ.
Tiꞌara kupokalááꞌ apa to ina rabábehi tauna i kódóꞌ.b
7 PUEꞌ mamporángáꞌaꞌ hai motulungiaꞌ.
Ina kupeita PUEꞌ monangi ewálingkuꞌheꞌ.
8 Maroꞌa mani mengkatueꞌ i PUEꞌ
haneꞌi mehárungá i tauna.
9 Rángina miꞌi mengkatueꞌ i PUEꞌ
haneꞌi mohárungá tauna to i reá tueꞌna.
10 Handaꞌ tauna hangko i tampoꞌ ntániꞌna motolelingiaꞌ,
agáiáná kunangimoheꞌ láwiꞌ natulungiaꞌ PUEꞌ.
11 Ralibuꞌaꞌ hangko iumbá-umbá peá,
agáiáná kunangimoheꞌ láwiꞌ natulungiaꞌ PUEꞌ.
12 Nodoheꞌ uwani to moduluaꞌ,
agáiáná ánti petulungina PUEꞌ,
hangkapira mata peá kunangiheꞌ.
Kahópóꞌána nodoheꞌ dui to naꞌandeꞌ api.
13 Rumihi karapombealaꞌángkuꞌ,
hungkuꞌaꞌ ina manangi,
agáiáná PUEꞌ motulungiaꞌ.
14 PUEꞌ Ia miꞌi róhóngkuꞌ to kupomahile.
Ia to mampelaeaꞌ.
15 Tauna to manótó mohoraꞌ-horaꞌheꞌ
i bambaruꞌraꞌ ánti kagóeꞌraꞌ
láwiꞌ monangimoheꞌ ewáliraꞌ, rauliꞌ:
“Kuasaꞌna PUEꞌ mampopenangikeꞌ!
16 Kuasaꞌna PUEꞌ maróhó ntepuꞌu.
Kuasaꞌna PUEꞌ mampopenangikeꞌ.”
17 Tiꞌaraꞌaꞌ ina mate, agáiáná ina tueꞌaꞌ,
hai ina mopahaweꞌaꞌ upu-upu to nabábehi PUEꞌ.
18 PUEꞌ mokámbáróá ntepuꞌumoꞌ,
agáiáná tiꞌaraꞌaꞌ Napatodáhi ina mate.
19 Bungkáhiáꞌaꞌ babaꞌá támbina PUEꞌ,
bona mesuaꞌaꞌ hai motóiá PUEꞌ!
20 Deꞌe miꞌi babaꞌá pesuaꞌána támbina PUEꞌ.
Tauna to manótó peá to peisá mesuaꞌ.c
21 KutóiáKoꞌ PUEꞌ láwiꞌ Nuhániki miꞌi pekakaengkuꞌ.
Io to mampelaemoꞌ.
22 Watu to ratibe topoaró támbi,
mole watu onoꞌ riꞌi to mewaliꞌ pehodaꞌá támbi.d
23 Iti mewaliꞌ hintotoꞌ hai peundeꞌána PUEꞌ,
hai maroꞌa ntepuꞌu apa to Nabábehi iti.e
24 Alo deꞌe alo penangina PUEꞌ.
Maikeꞌ monani i kagóeꞌ-góeꞌ.
25 Ó PUEꞌ, kupembiáꞌ bona Nupelaeangkaiꞌ!
Ó PUEꞌ, Nupopenangiangkaiꞌ.
26 PUEꞌ mowátiꞌ tauna to haweꞌ, to mewaliꞌ huoꞌáNa.f
Kipembiáꞌ bona PUEꞌ mowátiꞌkou hangko i támbiNa.
27 PUEꞌ Ia miꞌi Pueꞌ Ala.
Ia to mowátiꞌkeꞌ.g
Moántikou mai dáꞌángkau i alo mahile,
haneꞌi molumaokou mantoleli paintuá popenómbá.h
28 Io miꞌi Pueꞌ Ala to kupenómbái. Ina kutóiáKoꞌ.
Pueꞌ Ala to kupenómbái, ina kupomahileKoꞌ.
29 Tatóiá PUEꞌ ánti kamaroꞌaNa.
Ia mopatongawaꞌ oaꞌ kamaꞌahiꞌNa.