Petóiá i Pueꞌ Ala to makuasaꞌ
115
Ó PUEꞌ, tiꞌara mpuꞌuangkaiꞌ paraluu rabiláꞌ,agáiáná Io peá to hintotoꞌ kibiláꞌ
ánti kamaꞌahiꞌMu hai katetidaꞌMu i kaiꞌ.
2 Moapa riꞌi haneꞌi tauna i duniáꞌ mekuneꞌheꞌ, rauliꞌ:
“Iumbá rikáꞌá Pueꞌ Ala to rapenómbái toSáráeliꞌ?”
3 Pueꞌ Ala to tapenómbái, Ia i surugáꞌ.
Ia peisá mobábehi apa peá peundeꞌáNa.
4 Agáiáná hira, menómbáheꞌ i lenggeꞌ ánituraꞌ
to rabábehi tauna hangko i buláwá hai peráꞌ.
5 Kehapiꞌ ara humeraꞌ, agáiáná ánituraꞌ iti tiꞌara raisá molaluita,
kehapiꞌ ara mátáraꞌ, tiꞌaraheꞌ meita.
6 Kehapiꞌ ara talingaraꞌ, tiꞌara mehádi,
kehapiꞌ ara ilóraꞌ, tiꞌara meáriꞌ.
7 Kehapiꞌ ara taeraꞌ, tiꞌaraheꞌ mereraꞌ,
kehapiꞌ ara bitiraꞌ, tiꞌaraheꞌ peisá molumao,
hai tiꞌaraheꞌ woꞌo peisá mohuwárá laluita.
8 Noꞌonoꞌ woꞌo tauna to mobábehi lenggeꞌ ánitu,
hai upu-upu tauna to mehárungá i ánitu iti,
ina mbero-mbero katueꞌraꞌ hibali hai ánituraꞌ.
9 Ee toSáráeliꞌ, mepoináláimokou i PUEꞌ.
Ia miꞌi to motulungi hai mokámpáikou.
10 Ee tadulako-tadulako menómbá,a
mehárungámokou i PUEꞌ.
Ia miꞌi to motulungi hai mokámpáikou.
11 Ee tauna to mengkoruꞌ i PUEꞌ,
mepoináláimokou i PUEꞌ,
Ia miꞌi to metulungi hai mokámpáikou.
12 PUEꞌ mambuhinaokeꞌ oaꞌ hai ina Nawátiꞌkeꞌ,
Ia ina mowátiꞌ toSáráeliꞌ,
Ia ina mowátiꞌheꞌ tadulako menómbá pemuleꞌána Haruni.
13 Ia ina mowátiꞌ upu-upu tauna to mengkoruꞌ i Hia,
maroꞌa tauna to i wóiꞌ tueꞌna, maroꞌa tauna to i reá tueꞌna.
14 Hampóáꞌworia PUEꞌ mowátiꞌkou
haneꞌi handaꞌ pemuleꞌámi.
15 Hampóáꞌworia nawátiꞌkou PUEꞌ
to mampopewaliꞌ langiꞌ hai tampoꞌ.
16 PUEꞌ peá to mokuasaꞌi langiꞌ,
agáiáná Ia mampeweꞌi duniáꞌ deꞌe i tauna bona rakádipurá.
17 Tiꞌara tauna to mate miꞌi to motóiá PUEꞌ.
Mengkaroo peheꞌ i duniáꞌraꞌ tomate.
18 Ngkáliꞌna riꞌi kitaꞌ to tueꞌ manikeꞌ to motóiá PUEꞌ,
mantepuꞌu deꞌe-deꞌe haweꞌ i rue-ruena.
Haleluia! Tatóiá PUEꞌ!