Pueꞌ mampelae hadua tauna hangko i kapate
116
Kupomahile PUEꞌláwiꞌ Ia mampehádingi pembiáꞌkuꞌ.
2 Ia mopailalu apa to kupembiáꞌ,
onoꞌ miꞌi haneꞌi ina mekakaeaꞌ
lántuꞌángkuꞌ tueꞌ i duniáꞌ deꞌe.
3 Iumbá-umbá peá ara to mopahurewuꞌmoꞌ,
hai malááꞌaꞌ ina mate.
Mapári kuhádi, hai masusa ntepuꞌu lalungkuꞌ.
4 Agáiáná membiáꞌaꞌ tulungi i PUEꞌ, kuꞌuliꞌ:
“Ó PUEꞌ, Nupelaeaꞌ, wongkódóꞌá!”
5 PUEꞌ iti maroꞌa laluNa hai bukeꞌ timbá,
Pueꞌ Ala to tapenómbái bukeꞌ ahiꞌ.
6 PUEꞌ mokádipurá tauna to tiꞌara hangka iumbá pekirina.
Tempóngkuꞌ maledeꞌ, PUEꞌ motulungiaꞌ.
7 Hangaa-ngaa kupatinda lalungkuꞌ,
láwiꞌ PUEꞌ mobábehi miꞌi to maroꞌa i kódóꞌ.
8 PUEꞌ mampelaemoꞌ hangko i kapate,
Napalindóaꞌ hai tiꞌaraꞌaꞌ Napatodáhi manawoꞌ,
9 onoꞌ haneꞌi ánti pekámpáina PUEꞌ,
peisá maniaꞌ tueꞌ i duniáꞌ deꞌe.
10 Kehapiꞌ kupekiri, “Mapári ntepuꞌu katueꞌkuꞌ,”
pehárungángkuꞌ bateꞌ-bateꞌna peá i PUEꞌ.
11 Ánti kawulingkuꞌ kupekiri:
“Tiꞌara ara haweꞌ hadua tauna to peisá rapoinálái.”
12 Apa miꞌi to ina kupeweꞌi i PUEꞌ,
moháwángi kamaroꞌaNa i kódóꞌ?
13 Ina mohuhuꞌaꞌ popenómbángkuꞌ i PUEꞌ,
hai ina kuꞌuliꞌ handaꞌ kamaroꞌana i Hia.
14 Ina kubukeki dándingkuꞌ i PUEꞌ
i lindoꞌraꞌ upu-upu taunáNa.
15 PUEꞌ mampehaileki ntepuꞌu
kamatena tauna to tetidaꞌ i Hia.a
16 Ó PUEꞌ, kódóꞌ hawiꞌMuaꞌ,
hibali hai inángkuꞌ, kódóꞌ woꞌo hawiꞌMu.
Nukábáhámoꞌ hangko i kapate.b
17 Ina mohuhuꞌaꞌ popenómbá kagóeꞌ lalu i Hio,
hai ina kuꞌuliꞌ handaꞌ kamaroꞌana i PUEꞌ.
18 Ina kubukeki dándingkuꞌ i PUEꞌ
i lindoꞌraꞌ upu-upu taunáNa,
19 i tangabaa támbina PUEꞌ,
i tangaꞌ kótá Ierusale.
Haleluia! Tatóiá PUEꞌ!