Pueꞌ Ala to menangi
98
Nani petóiá.
Mamponanimokou nani to woꞌu i PUEꞌ
láwiꞌ handaꞌ to Nabábehi to maroꞌa ntepuꞌu.
Ánti kuasaꞌNa, Ia monangi ewáliNaheꞌ.
2 PUEꞌ mopahaweꞌ penangiNa miꞌi,
hai mopatongawaꞌ kamanótóNa
i lindoꞌraꞌ upu-upu tauna i duniáꞌ.
3 Ia mambuhinao oaꞌ kamaꞌahiꞌNa
hai katetidaꞌNa i toSáráeliꞌ,
haneꞌi tauna i humalele duniáꞌ moisá
Pueꞌ Ala to tapenómbái to mampelaekeꞌ taunáNa.
4 Ee upu-upu tauna to i duniáꞌ,
mohoraꞌ-horaꞌkou motóiá PUEꞌ ánti kagóeꞌmi,
mamponanikou nani kagóeꞌ-góeꞌ.
5 Mamponanikou nani petóiá i PUEꞌ,
nikáwiꞌ kasapi hai monanikou nipasimbuku.
6 Motawueꞌkou tamburuꞌ hai bingá,
mohoraꞌ-horaꞌkou motóiá Datu, ia miꞌi PUEꞌ.
7 Ee tahiꞌ hai upu-upu óntóꞌna, mewoomokou,
noꞌonoꞌ woꞌo duniáꞌ hai upu-upu to ara ionoꞌ.
8 Ee uwai to moili, munimokou ánti kagóeꞌmi,
hai buluꞌ-buluꞌna, mamponanimokou nani kagóeꞌ-góeꞌ
9 i lindoꞌna PUEꞌ,
láwiꞌ Ia haweꞌ miꞌi ina mohoda-hoda kara-kara tauna.
Ia ina mobutusi kara-kara upu-upu tauna i duniáꞌ i kanótó-nótóána,
hai pobutusiNa ina hintotoꞌ.