Pueꞌ Ala Ia miꞌi Datu i humalele duniáꞌ
97
PUEꞌ Ia miꞌi Datu!Hampóáꞌworia tauna iumbá-umbá peá i duniáꞌ
ina góeꞌheꞌ haweꞌ-haweꞌ i puló-puló.
2 Gawu to makápá hai maiti mokómóki,
Ia mepárentá i kanótó-nótóána hai kahintimbá.
3 Api mewangkaꞌ i lindoꞌNa,
hai mopapumpu upu-upu ewáliNaheꞌ.
4 Kiláꞌ mowangkaꞌi duniáꞌ,
hai tampoꞌ moenggo moita pewangkaꞌna.
5 I lindoꞌna PUEꞌ, Pueꞌ to makuasaꞌ i humalele duniáꞌ,
buluꞌ-buluꞌna magero nodo kamagonuꞌna taru.
6 Langiꞌ mopatongawaꞌ kamanótóNa,
hai upu-upu tauna i duniáꞌ moita peawaꞌNa.a
7 Upu-upu tauna to menómbá i lenggeꞌ ánitu ina rapakahiliá.
Mampomahileheꞌ ánituraꞌ to tiꞌara mobunduꞌ,
agáiáná upu-upu ánitu to rapenómbái iti
ina mengkoruꞌheꞌ i Pueꞌ Ala!
8 Ó PUEꞌ, tauna i kótá Sio hai i kótá-kótá ntániꞌna i tampoꞌ Iudá,
góeꞌheꞌ mohádi kaꞌina Nuhukuraꞌ ewáliraꞌ,
9 láwiꞌ Io miꞌi PUEꞌ to makuasaꞌ ntepuꞌu i humalele duniáꞌ,
Io miꞌi to rapomahile ntepuꞌu hangko i upu-upu pueꞌ to rapenómbái tauna.
10 Ee tauna to mampomahile PUEꞌ,
hangaa-ngaa nikáhihiꞌ bábehiá to kadake.
Ia mokámpái katueꞌraꞌ tauna to tetidaꞌ i Hia,b
hai mokábáháheꞌ hangko i tauna to kadake.
11 PUEꞌ mowátiꞌ tauna to manótóc
nodo pewangkaꞌna alo,
hai mopagóeꞌ tauna to bulá laluraꞌ.
12 Ee tauna to manótó,
góeꞌ-góeꞌmokou i apa to nabábehi PUEꞌ.
Mamponanikou nani petóiá i PUEꞌ
láwiꞌ Ia magasaꞌ.