Pueꞌ Ala ina mohoda-hoda kara-kara tauna i duniáꞌ
1 Tuntukáná Datu 16:23-33
96
Nitóiá miꞌi PUEꞌ hai nani to woꞌu,monanikou i PUEꞌ, upu-upu tauna i duniáꞌ.
2 Monanikou motóiá PUEꞌ i alo-alona,
nipahaweꞌ bámbári kaꞌIana miꞌi to mampelaekeꞌ.
3 Nibámbári peawaꞌna PUEꞌ i oloꞌraꞌ tauna i duniáꞌ,
hai nipahaweꞌáheꞌ upu-upu tauna
apa to nabábehi PUEꞌ láwiꞌ maroꞌa ntepuꞌu.
4 Láwiꞌ PUEꞌ makuasaꞌ ntepuꞌu hai hintotoꞌ ratóiá,
Ia to paraluu rapengkoruꞌi hangko i upu-upu pueꞌ ala ntaniꞌ.
5 Upu-upu to rapenómbái tauna i tampoꞌ ntániꞌna, tiꞌara mobunduꞌ,
agáiáná PUEꞌ to mopaꞌara langiꞌ.
6 Peawaꞌ hai peádái ara oaꞌ i Hia.
TámbiNa to magasaꞌ bukeꞌ kamakuasaꞌNa hai peawaꞌNa.
7 Ee upu-upu tauna i duniáꞌ, nitóiá miꞌi PUEꞌ,
láwiꞌ Ia peá to meawaꞌ hai makuasaꞌ.
8 Nipomahile PUEꞌ ánti peawaꞌna hangaꞌNa,
mesuaꞌkou i tangabaa támbiNa, moántikou popenómbámi.
9 Menómbákou i PUEꞌ ánti peawaꞌna kamagasaꞌNa.
Upu-upukou to i duniáꞌ, moridiꞌkou i lindoꞌNa.
10 Nipahaweꞌ i oloꞌraꞌ tauna i duniáꞌ,
“PUEꞌ miꞌi to mepárentá láwiꞌ Ia Datu.
Ia to mopakaróhó peángkáꞌna duniáꞌ,
tiꞌara ara to peisá moduá.
Ia ina mohoda-hoda kara-kara tauna i duniáꞌ
i kanótó-nótóána.”
11 Langiꞌ ina góeꞌ, hai tampoꞌ ina mohoraꞌ-horaꞌ,
tahiꞌ hai upu-upu óntóꞌna ina mewoo.
12 Hinángkáꞌ to tueꞌ i pádá ina góeꞌ,
hai upu-upu to tueꞌ i kakau ina monani ánti kagóeꞌraꞌ.
13 Ina monaniheꞌ i lindoꞌna PUEꞌ, láwiꞌ Ia ina haweꞌ.
PUEꞌ ina haweꞌ miꞌi, mohoda-hoda kara-kara tauna i duniáꞌ.
Ia ina mobutusi kara-kara upu-upu tauna i duniáꞌ
i kahintimbá hai i kanótó-nótóána.