Nubiláꞌ PUEꞌ hai nupeuláꞌi peundeꞌáNa
95
Maimokeꞌ mamponani nani kagóeꞌ-góeꞌ i PUEꞌ,mohoraꞌ-horaꞌkeꞌ láwiꞌ Ia miꞌi buluꞌ watu pengkatueꞌántaꞌ.
2 Maikeꞌ menómbá i lindoꞌNa,
mamponani nani kagóeꞌ i Hia.
3 Láwiꞌ PUEꞌ Ia miꞌi Pueꞌ Ala to makuasaꞌ ntepuꞌu.
Ia miꞌi Datu to melumbuꞌ kuasaꞌNa
hangko i upu-upu pueꞌ ntániꞌna.
4 PUEꞌ makuasaꞌ i lapi tampoꞌ to kaladu,
hai i lolo buluꞌ to mapángkáꞌ.
5 Ia mampopueꞌ tahiꞌ, láwiꞌ Ia to mampopewaliꞌ,
hai taeNa to mobábehi lorena.
6 Mesuaꞌmokeꞌ, maikeꞌ molingkudu menómbá
i lindoꞌna PUEꞌ to mampopewaliꞌkeꞌ,
7 láwiꞌ Ia miꞌi Pueꞌ Alantaꞌ,
hai kitaꞌ miꞌi dimbá to Napiaraꞌ,
to Nakámpái hai tae kamakuasaꞌNa.
Alo deꞌe, ane nihádi wambaꞌNa,
8 ineeꞌ nipamatuꞌa lalumi
nodo to mewaliꞌ i Meriba,
i Masa tempóraꞌ toSáráeliꞌ i pádá loriꞌ.a
9 Nauliꞌ Pueꞌ, “I tempó iti, toiorumi mampehukáꞌAꞌ,
rapembiáꞌ bona Kupatongawaꞌ kuasaꞌKuꞌ,
mole riꞌi moitamoheꞌ apa to Kubábehi.
10 Iba puloꞌna parena kamaruena,
Kupoluleꞌheꞌ tauna to hantinuwuꞌ iti,
onoꞌ miꞌi haneꞌi Kuꞌuliꞌ, ‘Tauna iti pakaheꞌ mouláꞌ rárá ntaniꞌ,
hai tiꞌaraheꞌ mau mampeuláꞌi ráráNgkuꞌ.’
11 Onoꞌ miꞌi haneꞌi, ánti kamabukoꞌKuꞌ, Kutotowi,
Kuꞌuliꞌ, ‘Tiꞌara mpuꞌuheꞌ ina mesuaꞌ i pengkarooá to Kupatimamaꞌámoheꞌ.’ ”b