Pueꞌ Ala mobutusi kara-kara
94
Ó PUEꞌ, Io miꞌi Pueꞌ Ala to moháwángi kakadakeraꞌ tauna.Kupembiáꞌ bona Nuhukuheꞌ.
2 Io to mobutusi kara-kara i humalele duniáꞌ,
kupembiáꞌ bona Nuháwángi tauna to maꞌángkáꞌ
hintotoꞌ hai bábehiáraꞌ.
3 Ó PUEꞌ, hangapa mani kamaruena
tauna to kadake ina góeꞌheꞌ?
4 Mohuwáráheꞌ laluita to maꞌángkáꞌ.
Upu-upu tauna to kadake iti,
mampogóeꞌheꞌ bábehiáraꞌ to kadake.
5 Ó PUEꞌ, mampopeahiahiꞌheꞌ taunáMu,
hai tauna to Nupileꞌi mewaliꞌ taunáMu, rakada-kadaheꞌ.
6 Mopapateheꞌ tobembaꞌ hai ánángkóiꞌ to ilu,
tauna to hangko i tampoꞌ ntániꞌna rapapateheꞌ woꞌo.
7 Rauliꞌ, “Tiꞌara naisá PUEꞌ,
Pueꞌ Ala to napenómbái Iako tiꞌara mopailalu.”
8 Ee tauna to tiꞌara mampekiri, maingáꞌ-ingáꞌkou!
Ee tauna to bebe, impirákou ina mantepuꞌu mampekiri?
9 PUEꞌ to mopaꞌara talinga. Tiꞌara paꞌi Nahádi?
Ia to mobábehi mata. Tiꞌara paꞌi Naita?
10 Ia to mokámbáróá tauna i duniáꞌ. Tiꞌara paꞌi ina Nahuku?
Ia to mopaturoꞌ tauna. Tiꞌara paꞌi ara to Naisá?
11 PUEꞌ moisá apa to napekiri tauna,
Naisá tiꞌara mobunduꞌ.a
12 Ó PUEꞌ, morasiꞌ miꞌi tauna to Nukámbáróá,
to Nupaturoꞌ kana i ÁturáMu,
13 bona tinda laluraꞌ ane narampeheꞌ kapári,
haweꞌ tempóna tauna to kadake ina rahuku.
14 Láwiꞌ PUEꞌ tiꞌara ina mopálehi taunáNaheꞌ.
Ia tiꞌara ina mokálámbáhi tauna to mewaliꞌ taunáNa.
15 Pebutusi ina mentóáꞌ i kanótó-nótóána,
hai upu-upu tauna to bulá laluraꞌ ina góeꞌheꞌ.
16 Heáná to meángkáꞌ motulungiaꞌ moewaꞌ tauna to kadake?
Heáná to mampetawaꞌiaꞌ hangko i tauna to mobábehi to kadake?
Tiꞌara haweꞌ hadua.
17 Ane ketiꞌaraꞌaꞌ Natulungi PUEꞌ,
kemesuaꞌaꞌ i duniáꞌraꞌ tomate.
18 Tempóngkuꞌ mampekiri, “Ina rapakanawoꞌaꞌ,”
kamaꞌahiꞌMu PUEꞌ motulungiaꞌ.
19 Tempóna masusa ntepuꞌu lalungkuꞌ,
Nupalindóaꞌ hai Nupagóeꞌaꞌ.
20 Ba topobutusi to kadake peisá mobágóꞌ hingkakani hai PUEꞌ?
Moliwoheꞌ mobábehi to kadake to tiꞌara hintotoꞌ hai áturá.
21 Himpuduheꞌ moewaꞌ tauna to manótó,
hai tauna to tiꞌara masalaꞌ ina rahuku mate.
22 Agáiáná PUEꞌ nodo bente to mokámpáiaꞌ.
Pueꞌ Ala to kupenómbái, Ia miꞌi buluꞌ watu pengkatueꞌángkuꞌ.
23 Ia ina moháwángi bábehiáraꞌ to kadake.
Ánti dósáraꞌ, ina Napatunaheꞌ.
Bateꞌna Pueꞌ Ala PUEꞌ to tapenómbái
ina mopatunaheꞌ.