Pueꞌ Ala to hintotoꞌ pobutusiNa
92
Nani petóiá i alo penómbáꞌá.
2 Maroꞌa ane taunáMu motóiáKoꞌ PUEꞌ,
hai monanika nani petóiá i To i Surugáꞌ.
3 Maroꞌa ane hampepulo-hampepulo hai wengi-wengina
taunáMu mampopaisá kamaꞌahiꞌMu hai katetidaꞌMu,
4 rauláꞌ hai gambusuꞌ hai kasapi.
5 Apa to Nubábehi PUEꞌ, mopagóeꞌ lalungkuꞌ.
KutóiáKoꞌ i lalu kagóeꞌ-góeꞌ
ánti kamaroꞌana apa to Nubábehi.
6 Ó PUEꞌ, maroꞌa ntepuꞌu upu-upu to Nubábehi,
kaladu ntepuꞌu pekiriMu.
7 Tauna to bebe hai tauna to mengkuli
tiꞌara moisá apa to ina mewaliꞌ.
8 Kehapiꞌ tauna to kadake memuleꞌ nodo kahandaꞌna rumpuꞌ,
hai mantámbái kapebukuraꞌ,
kahópóꞌána bateꞌna ina tunaheꞌ
haweꞌ i rue-ruena.
9 Agáiáná Io PUEꞌ, makuasaꞌ ntepuꞌuKoꞌ
haweꞌ i rue-ruena.
10 Ó PUEꞌ, ewáliMu bateꞌna ina tunaheꞌ,
hai upu-upu tauna to mobábehi to kadake ina mahawuꞌheꞌ.
11 Agáiáná Nupakaróhómoꞌ nodo kamaróhóna bóulá,
hai Nupagóeꞌ ntepuꞌuaꞌ.
12 Kuhádi miꞌi pohewo-heworaꞌ tauna to kadake to moewaꞌaꞌ,
hai kuita miꞌi kamanangiraꞌ ewálingkuꞌ iti.
13 Tauna to manótó ina maroꞌa katueꞌraꞌ nodo kau kurma,
ba nodo kau to mapángkáꞌ i Libano.
14 Hira nodoheꞌ kau to ratudaꞌ i támbina PUEꞌ,
ina maroꞌa katueꞌraꞌ i tangabaa támbina Pueꞌ Ala to tapenómbái.
15 Haweꞌ i kasae-saeáraꞌ, ina nodoheꞌ kau to mowuaꞌ mani,
to maruduꞌ hai marumbu oaꞌ.
16 Iti mopatongawaꞌ kamanótóna PUEꞌ,
Ia miꞌi buluꞌ watu pengkatueꞌángkuꞌ.
Tiꞌara haweꞌ hangkani Ia mobábehi to kadake.