Pueꞌ Ala to mokámpáiaꞌ
91
Tauna to tueꞌ i lalu pekámpáiNa Pueꞌ Ala to i Surugáꞌhai mengkatueꞌ i To Makuasaꞌ,
2 ina manguliꞌ i PUEꞌ, “Io miꞌi bente pengkatueꞌángkuꞌ.
Pueꞌ Ala to kupenómbái, mehárungáꞌaꞌ i Hio.”
3 Bateꞌna Ia ina mokábáhákoꞌ hangko i tauna to ina mopakanawoꞌkoꞌ,
hai hangko i hakiꞌ to moánti kapate.
4 Ina Nakámpáikoꞌ nodo tádáhi to moꞌóbóki ánáꞌna.
Ina maroꞌa katueꞌmu i lalu pekámpáiNa.
KatetidaꞌNa nodo lábá to mokámpáikoꞌ.
5 Tiꞌarakoꞌ paraluu malááꞌ i to mepahurewuꞌ i tempó káindi,
ba tauna to hangkaꞌ-hangkaꞌ mampombealaꞌákoꞌ i tempó mabaa.
6 Tiꞌarakoꞌ paraluu malááꞌ i hakiꞌ to humalele i tempó káindi,
ba to mepakarugiꞌ i tempó kalialó.
7 Kehapiꞌ hasábu tauna to mate tándáꞌ i kabeoꞌmu,
hai hampuloꞌ sáburaꞌ tauna to mate tándáꞌ i kuánámu,
agáiáná hakiꞌ iti tiꞌara ina morampekoꞌ.
8 Ina mengongo pekoꞌ,
ina nuita pehukuna Pueꞌ Ala i tauna to kadake,
9 láwiꞌ PUEꞌ to i Surugáꞌ, Ia miꞌi pengkatueꞌámu.
Laomokoꞌ i Hia bona Ia mokámpáikoꞌ.
10 Tiꞌarakoꞌ ina narampe to mepakarugiꞌ,
hai tinámu tiꞌara ina kana hakiꞌ,
11 láwiꞌ Pueꞌ Ala ina mohuoꞌheꞌ malaꞌekaNa
bona tiꞌarakoꞌ hurewuꞌ.
Hira ina mokámpáikoꞌ iumbá peá kalaoámu.
12 Ina rahángkóbákoꞌ
bona bitimu tiꞌara ina tóá i watu.a
13 Ina mopangkakoꞌ singá hai alimaoꞌ,
ánáꞌ singá hai lelótó to meipoꞌ ina nukada.
14 Nauliꞌ PUEꞌ, “Ánti kanapomahileNgkuꞌ,
onoꞌ haneꞌi ina Kupelae.
Ina Kukámpái
láwiꞌ ia mebiláꞌ i Kódóꞌ.
15 Ane ia meraruaꞌ membiáꞌ tulungi i Kódóꞌ,
ina Kuhániki.
Ina Kuporángá i kamapárina,
ina Kupelae hai Kupoweꞌi pebiláꞌ.
16 Ina Kupoweꞌi tinuwuꞌ bona góeꞌ laluna,
hai ina Kupatongawaꞌ i hia
kaKódóꞌna miꞌi to mampelae katueꞌna.”