SURA KA-IV
SURA PETÓIÁ 90–106
Pueꞌ Ala pengkatueꞌána tauna
90
Pekakaena Musa huoꞌána Pueꞌ Ala.
Ó Pueꞌ, Io miꞌi pengkatueꞌángkiꞌ haweꞌ-haweꞌ i pemuleꞌángkiꞌ.
2 Hangko tiꞌara maniKoꞌ mopaꞌara buluꞌ-buluꞌ,
hangko tiꞌara maniKoꞌ mopaꞌara duniáꞌ,
hangko i rungu-runguna haweꞌ i rue-ruena,
Io miꞌi Pueꞌ Ala.
3 Nupopesuleꞌ tauna mewaliꞌ awu,
Nuꞌuliꞌ, “Ee tauna, mesuleꞌmokoꞌ mewaliꞌ awu.”
4 I peitáMu, hasábu parena hibali peá
hai hangalo to liu miꞌi,a
nodo peá bahangapa jaa tempó moronda káindi.
5 Nupopengkaroo katueꞌkiꞌ, nodo peangkaiꞌ paturu,
ba rumpuꞌ to motumbeꞌ.
6 Ane mepulo, mababe rumpuꞌ iti
hai maroꞌa katueꞌna,
agáiáná ane kalumbaꞌ miꞌi, malau hai bangi.
7 PehukuMu moropuꞌangkaiꞌ,
hai ánti karumihina kamabukoꞌMu, kipokalááꞌ.
8 Kamasalaꞌkiꞌ tongawaꞌ i Hio,
hai Nuisá dósángkiꞌ to kiwuniángi.
9 KamabukoꞌMu mopahópóꞌ katueꞌkiꞌ.
Tempóngkiꞌ i duniáꞌ deꞌe
nodo to hangkani peá mobusa peinao.
10 Katueꞌkiꞌ pitu peá puloꞌna parena,
ane maróhóangkaiꞌ, uwalu puloꞌna.
Agáiáná masusa oaꞌ katueꞌkiꞌ hai bukeꞌ kapári,
hampalai peá haneꞌi tiꞌarapongkaiꞌ ara.
11 Heáná paꞌi to moisá karumihina kamabukoꞌMu,
haneꞌi malááꞌ i Hio?
12 Kipembiáꞌ bona Nupamanótó i lalungkiꞌ,
katueꞌkiꞌ i duniáꞌ deꞌe hampalai peá,
bona mewaliꞌangkaiꞌ tauna to bukeꞌ pekiri.
13 PUEꞌ, hangapa mani kamaruena kamabukoꞌMu?
MengkaroomoKoꞌ mabukoꞌ.
Kipembiáꞌ bona Nupokaꞌahiꞌangkaiꞌ huleꞌ hawiꞌMu.
14 Nupatongawaꞌangkaiꞌ kamaꞌahiꞌMu hampepulo-hampepulo
bona góeꞌangkaiꞌ hai metóiáꞌangkaiꞌ lántuꞌángkiꞌ mani tueꞌ.
15 Nupagóeꞌmongkaiꞌ hintotoꞌ hai kamaruengkiꞌ
Nupatodáhi mantódihá kapári.
16 Kipembiáꞌ bona Nutudeꞌáꞌangkaiꞌ hawiꞌMu apa to Nubábehi,
hai Nupatongawaꞌ peawaꞌMu i pemuleꞌángkiꞌ.
17 Kipembiáꞌ bona Pueꞌ Ala Pueꞌkiꞌ mowátiꞌangkaiꞌ,
bona upu-upu to kipobágóꞌ mewaliꞌ maroꞌa i tampoꞌkiꞌ.