Nani i tempó molámbiꞌ huleáká
89
Nani pepaturoꞌ to nakáráhi Etana toEsarahi.
Kuasaꞌna Pueꞌ Ala
2 Ó PUEꞌ, ina kunanika kamaꞌahiꞌMu haweꞌ i rue-ruena,
hai ina kupopaisá katetidaꞌMu haweꞌ-haweꞌ i pemuleꞌángkuꞌ.
3 KamaꞌahiꞌMu tiꞌara mokahópóꞌá,
hai katetidaꞌMu ina ara oaꞌ,
hibali hai langiꞌ.
4 Nuꞌuliꞌ miꞌi, “MopaꞌaraMoꞌ podándi hai tauna to Kupileꞌi,
ia miꞌi Daudiꞌ hawiꞌKuꞌ,
hai mototowiMoꞌ i hia node:
5 ‘Pemuleꞌámu ina Kupopewaliꞌheꞌ woꞌo datu,
hai ina Kupakaróhó kadatuámu haweꞌ i rue-ruena.’ ”a
6 Ó PUEꞌ, upu-upu malaꞌekaMu to i surugáꞌ motóiáKoꞌ,
mampomahileheꞌ to Nubábehi láwiꞌ maroꞌa ntepuꞌu.
Monaniheꞌ mokana i katetidaꞌMu
i kateruhuáraꞌ malaꞌeka to magasaꞌ.
7 PUEꞌ, heáná paꞌi kahibaliáMu i surugáꞌ?
Tiꞌara ara malaꞌeka to hibali hai Io.
8 Pueꞌ Ala rabiláꞌ ntepuꞌu i kateruhuáraꞌ malaꞌeka.
Ia rapokalááꞌ melumbuꞌ hangko i upu-upu to ara i surugáꞌ.
9 Ó PUEꞌ Ala to makuasaꞌ, heáná paꞌi to hibali hai Io?
Maróhó mpuꞌuKoꞌ PUEꞌ, hai tetidaꞌKoꞌ oaꞌ i upu-upu to Nubábehi.
10 Io miꞌi to mokuasaꞌi bálumbá to rumihi i tahiꞌ,
Io miꞌi to mampopengkaroo bálumbá to mapángkáꞌ ntepuꞌu.
11 Nupapate hai Nupamarekaꞌ
naga to mahile i tahiꞌ.b
Ánti kuasaꞌMu, Nuhawukaheꞌ ewáliMu.
12 Io miꞌi pueꞌna langiꞌ hai tampoꞌ,
Io miꞌi to mampopewaliꞌ duniáꞌ hai upu-upu óntóꞌna.
13 Io miꞌi to mopaꞌara tampoꞌ to tándáꞌ i wongko,
hai tampoꞌ to tándáꞌ i wóiꞌ.
Buluꞌ Tabo hai buluꞌ Heremoc motóiáKoꞌ
ánti kagóeꞌraꞌ mohádi hangaꞌMu.
14 Mahile ntepuꞌu kuasaꞌMu,
hai rumihi kamaróhóMu.
15 MepárentáKoꞌ i kamanótó hai kahintimbá.
Upu-upu to Nubábehi mopatongawaꞌ
kamaꞌahiꞌMu hai katetidaꞌMu.
16 Morasiꞌ miꞌi tauna to moisá motóiáKoꞌ i kagóeꞌ-góeꞌ,
to tueꞌ i lalu pewangkaꞌMu.d
17 Góeꞌheꞌ oaꞌ ánti kaꞌIona,
hai rapomahileKoꞌ ánti kamanótóMu,
18 láwiꞌ Io miꞌi to mampoweꞌiangkaiꞌ penangi to mahile,
hai mantámbái oaꞌ kamaróhóngkiꞌ ánti kamaroꞌaMu i kaiꞌ.
19 Io miꞌi to mopileꞌi tadulako to mokámpáiangkaiꞌ.
Pueꞌ Ala To Magasaꞌ to rapenómbái toSáráeliꞌ,
Io miꞌi to mampoweꞌiangkaiꞌ datungkiꞌ.
Dándina Pueꞌ Ala i Daudiꞌ
20 Hangkoia mampatongawaꞌKoꞌ moliu pampetudeꞌá
hai molaluitaKoꞌ i taunáMu to tetidaꞌ i Hio, Nuꞌuliꞌ:
“Kutulungi miꞌi hadua surudadoꞌ to keate,
Kupoweꞌi miꞌi lántiꞌ to mapángkáꞌ i tauna to Kupileꞌi
hangko i oloꞌraꞌ taunáNgkuꞌ.
21 Kulámbiꞌ miꞌi Daudiꞌ hadua hawiꞌKuꞌ.
Kulántiꞌ miꞌi mewaliꞌ datu,
hai Kulanai wuáꞌna hai lana to magasaꞌ,
tandaꞌ kaKupileꞌina miꞌi.e
22 Ia ina nakámpái oaꞌ kamaróhóNgkuꞌ,
hai kamakuasaꞌKuꞌ bateꞌna ina mopakaróhó oaꞌ.
23 Tiꞌara ara ewálina to ina monangi,
hai tauna to kadake tiꞌara woꞌo ina mepopeahiahiꞌ.
24 Ina Kuropuꞌheꞌ ewálina hangko i lindoꞌna,
hai tauna to mokáhihiꞌ ina Kupapateheꞌ.
25 KatetidaꞌKuꞌ hai kamaꞌahiꞌKuꞌ ina ara oaꞌ i hia,
hai ánti kaKódóꞌna, ina mantámbái kuasaꞌna mepárentá.
26 Kadatuána ina Kupamaeláꞌ
hangko i tahiꞌ Tangaꞌ haweꞌ-haweꞌ i uwai Epara.
27 Ia ina manguliꞌ i Kódóꞌ,
‘Io miꞌi umángkuꞌ, Pueꞌ Ala to kupenómbái,
buluꞌ watu pengkatueꞌángkuꞌ.’
28 Ina Kuángkáꞌ mewaliꞌ ánáꞌKuꞌ to towutuꞌ.
Ia ina makuasaꞌ ntepuꞌu hangko i upu-upu datu to i duniáꞌ.
29 Ina Kupatongawaꞌ oaꞌ kamaꞌahiꞌKuꞌ i hia haweꞌ i rue-ruena,
hai podándiNgkuꞌ i hia tiꞌara ina tebáliki.
30 Kudándi pemuleꞌána ina mombeusu-usu
mewaliꞌ datu haweꞌ i rue-ruena,
hai kadatuána ina ara oaꞌ lántuꞌána ara mani langiꞌ.
31 Agáiáná ane pemuleꞌána Daudiꞌ tiꞌaraheꞌ mampeuláꞌi PaturoꞌKuꞌ,
hai katueꞌraꞌ tiꞌara hiolaꞌ hai párentáNgkuꞌ,
32 ane moliungiheꞌ áturáNgkuꞌ
hai tiꞌarapoheꞌ motibaaꞌ hawaꞌKuꞌ,
33 ina Kuhukuheꞌ ánti poliungiraꞌ áturáNgkuꞌ,
ina Kukámbáróáheꞌ ánti kamasalaꞌraꞌ.
34 Agáiáná tiꞌaraꞌAꞌ ina mengkaroo
mopatongawaꞌ kamaꞌahiꞌKuꞌ i Daudiꞌ,
bateꞌKuꞌ ina tetidaꞌ oaꞌ i dándiNgkuꞌ.
35 Tiꞌara ina Kuliungi podándiNgkuꞌ
hai apa to Kupahaweꞌ miꞌi, tiꞌara ina Kubáliki.
36 Hangkani peAꞌ modándi i lalu hangaꞌKuꞌ to magasaꞌ,
tiꞌaraꞌAꞌ ina modongkoki Daudiꞌ.
37 Pemuleꞌánaheꞌ ina ara oaꞌ haweꞌ i rue-ruena,
kadatuána ina ara oaꞌ lántuꞌána ara mani alo
38 hai wulá to mewaliꞌ sabiꞌ i langiꞌ.”f
Nani petatangi ánti kamanangina datu
39 Agáiáná motaleukimoKoꞌ datu, tiꞌara piꞌi Nuꞌundeꞌ.
MabukoꞌKoꞌ i hia to Nupileꞌi miꞌi.
40 Nusapuáka miꞌi podándiMu hai datu hawiꞌMu,
Nupopengkaroo miꞌi mewaliꞌ datu,
nodoKoꞌ motelánga tatali kadatuána i lalu regeꞌ.
41 Bosoꞌ watu to motolelingi kótána Nuambaꞌ miꞌi,
hai bente-bentena Nugero miꞌi.
42 Upu-upu tauna to melempó morámpákiheꞌ kótána iti,
tauna hangko i tampoꞌ ntániꞌna mopakóiꞌheꞌ datu.
43 Nupopenangimoheꞌ tauna to moewaꞌ datu iti,
hai Nupagóeꞌmoheꞌ upu-upu ewálina.
44 Nupakarugiꞌ miꞌi pihoꞌna,
tiꞌara Nupopenangi i pombeala.
45 Kamakuasaꞌna Nupahópóꞌ miꞌi,
hai popárentána Nupopengkaroo.
46 Nuparembe tinuwuꞌna tempóna maleheꞌ mani,
hai Nupakahiliá.
Pekakae membiáꞌ bona datu tepelae
47 Ó PUEꞌ, hangapa mani kamaruena ina Nupengkaniikaꞌaꞌ?
Hangapa mani kamaruena ina mabukoꞌ ntepuꞌuKoꞌ.
48 Kupembiáꞌ bona Nubuhinao katueꞌkuꞌ to hampalai peá.
Tauna to Nupaꞌara, tiꞌara monónó katueꞌraꞌ.
49 Heáná paꞌi tauna to peisá tueꞌ oaꞌ, tiꞌara ina mate?
Heáná paꞌi tauna to peisá tekábáhá hangko i duniáꞌraꞌ tomate?
50 Ó Pueꞌ, iumbá miꞌi kamaꞌahiꞌMu to Nupatongawaꞌ hangkoia,
to Nudándi miꞌi i Daudiꞌ ánti katetidaꞌMu.
51 Ó Pueꞌ, kupembiáꞌ bona Nubuhinaoaꞌ hawiꞌMu to rasasalaꞌi.
Nubuhinao tauna hangko i tampoꞌ ntániꞌna to mopakóiꞌaꞌ.
52 Ó PUEꞌ, iumbá peá kalaoána datu to Nupileꞌi miꞌi,
ionoꞌ ara tauna to mopakadake hangaꞌna.
53 Tetóiá miꞌi PUEꞌ haweꞌ i rue-ruena.
Noꞌonoꞌ miꞌi. Ami.