Pekakaena tauna to mapári ntepuꞌu
88
Nani to rakáráhi toKora.a I topoánti toponani. Rananika mouláꞌ nani “Mahalaꞌ Leanoꞌ”. Nani pepaturoꞌna Heman toEsarahi.
2 Ó PUEꞌ Ala to mampelaeaꞌ,
mabaa meraruaꞌaꞌ membiáꞌ tulungi,
hai káindi mekakaeaꞌ i Hio.
3 Hampóáꞌworia pekakaengkuꞌ haweꞌ i Hio,
hai Nupehádingi peraruaꞌkuꞌ.
4 Hungkuꞌmoꞌ ina mate,
láwiꞌ handaꞌ kapári to morampeaꞌ.
5 Rarekeꞌaꞌ nodo to ina mesuaꞌ i duniáꞌraꞌ tomate,
tiꞌara piꞌi ara róhóngkuꞌ.
6 Tauna mopálehimoꞌ i oloꞌraꞌ tauna to mate,
nodoaꞌ tauna to rapapate hai ratawu.
Tiꞌarapoheꞌ Nubuhinao,
hai tiꞌarapoheꞌ Nutulungi.
7 Numbolomoꞌ i popatawuá to kaladu ntepuꞌu,
hai makáindi mpiiꞌ.
8 KamabukoꞌMu kupomapári ntepuꞌu,
pehádingkuꞌ nodoaꞌ to narokaꞌ oaꞌ bálumbá.
9 Rángángkuꞌheꞌ Nupakaraoꞌ miꞌi hangko i kódóꞌ,
hai Nubábehi bona rapokatidiꞌaꞌ.
Kapári mopamasusaꞌaꞌ,
tiꞌaraꞌaꞌ peisá tekábáhá.
10 Piróꞌ mátángkuꞌ ánti kamapáringkuꞌ.
Ó PUEꞌ, meraruaꞌaꞌ oaꞌ membiáꞌ tulungi i Hio,
hai moángkáꞌaꞌ taengkuꞌ mekakae i Hio.
11 Nubábehi paꞌi tandaꞌ kuasaꞌ i tauna to mate?
Mearóheꞌ paꞌi tomate motóiáKoꞌ?
12 Peisá paꞌi tauna to i popatawuá mopahaweꞌ kamaꞌahiꞌMu,
hai tauna to rapatuna mampolaluita katetidaꞌMu?
13 Peisá paꞌi tauna i duniáꞌ to makáindi
moisá apa to Nubábehi to maroꞌa ntepuꞌu?
Peisá paꞌi tauna to rakáláliꞌá
moisá mani kahintimbáMu?
14 Agáiáná kódóꞌ, meraruaꞌaꞌ i Hio PUEꞌ, membiáꞌ tulungi,
hampepulo-hampepulo pekakaengkuꞌ haweꞌ i Hio.
15 Ó PUEꞌ, moapa riꞌi haneꞌi Nupetaleuꞌáꞌaꞌ?
Moapa riꞌi haneꞌi tiꞌaraꞌaꞌ Nupehaileki?
16 Hangko i kaꞌánángkóiꞌkuꞌ,
mantódihámoꞌ oaꞌ kapári hai hungkuꞌaꞌ mate.
Mereꞌ lalungkuꞌ láwiꞌ narampeaꞌ kapári
to melááꞌ-lááꞌi to hangko i Hio.
17 KamabukoꞌMu to rumihi kuhádiá ntepuꞌu,
to melááꞌ-lááꞌi hangko i Hio mopatóntóáꞌaꞌ.
18 Hangaloá-loá noꞌonoꞌ oaꞌ, nodo uwai to kebuꞌu,
tiꞌaraꞌaꞌ peisá mobábehi ba apa-apa.
19 Nupakaraoꞌmoheꞌ hangko i kódóꞌ
balengkuꞌheꞌ hai rángángkuꞌ to hungkuꞌ.
Kamakáindi perái to mamporángáꞌaꞌ.