Sura Petóiá 87

Petóiá i Sio kótána Pueꞌ Ala

Nani penómbá to rakáráhi toKora.

PUEꞌ moaró miꞌi kótáNa i buluꞌ Sio to magasaꞌ.

2 Ia mampomahile kótá Ierusale

melumbuꞌ mani hangko i upu-upu kótá ntániꞌna i tampoꞌ Sáráeliꞌ.

3 Nipehádingi, upu-upukou to toroꞌ i Ierusale,

Pueꞌ Ala mampolaluita to maroꞌa mokana i kótámi.

4 Nauliꞌ, “Ina Kupasuaꞌheꞌ toMásiriꞌ hai toBábeli

i oloꞌraꞌ tauna to menómbá i Kódóꞌ.

Noꞌonoꞌ woꞌo toPelisitiꞌ, toTiru hai toEtiopia.

Ina Kuꞌuliꞌ, ‘Tauna deꞌe mesupaꞌ i kótáNgkuꞌ.’ ”

5 Mokana i tauna to toroꞌ i Sio, ina rauliꞌ,

“Upu-upu to mesupaꞌ i Ierusale

mewaliꞌmoheꞌ taunáNa Pueꞌ Ala to i Surugáꞌ,

Ia to ina mopakaróhó kótá Ierusale.”

6 PUEꞌ ina mokatámpáꞌ upu-upu tauna,

hai moukiꞌ hangaꞌraꞌ i sura poukiꞌá.

Ina Nauliꞌ, “Tauna deꞌe mesupaꞌ i Ierusale.”

7 Ina motáróꞌheꞌ hai monani-nani, rauliꞌ:

“Molámbiꞌkeꞌ pewátiꞌ hangko i Sio.”