Pekakae membiáꞌ tulungi i Pueꞌ Ala
Pekakaena Daudiꞌ.
86
Ó PUEꞌ, Nupehádingi pekakaengkuꞌ, Nuhánikiaꞌ,láwiꞌ meahiahiꞌaꞌ hai mapári tueꞌkuꞌ.
2 Kupembiáꞌ bona Nukámpái katueꞌkuꞌ
láwiꞌ tetidaꞌaꞌ i Hio.
Nupelae hawiꞌMu láwiꞌ mehárungáꞌaꞌ i Hio.
3 Io miꞌi Pueꞌ Ala to kupenómbái.
Ó Pueꞌ, kupembiáꞌ bona Nupatongawaꞌáꞌaꞌ kamaꞌahiꞌMu,
láwiꞌ alo-alona meraruaꞌaꞌ i Hio membiáꞌ tulungi.
4 Kupembiáꞌ bona Nupagóeꞌ lalungkuꞌ,
láwiꞌ i Hio Pueꞌ kupahaweꞌ pekakaengkuꞌ.
5 Ó Pueꞌ, maroꞌaKoꞌ hai Nuꞌundeꞌ moámpungi dósá,
bukeꞌKoꞌ kamaꞌahiꞌ i upu-upu tauna to meraruaꞌ i Hio.
6 Ó PUEꞌ, Nupehádingi pekakaengkuꞌ
hai Nupailalu pembiáꞌkuꞌ.
7 Tempóngkuꞌ mapári, membiáꞌaꞌ tulungi i Hio,
láwiꞌ ina Nuhániki pekakaengkuꞌ.
8 Ó Pueꞌ, i oloꞌraꞌ pueꞌ ala to rapenómbái tauna,
tiꞌara ara to hibali hai Io,
hai tiꞌara ara to mobuku
mobábehi to hibali hai to Nubábehi.
9 Upu-upu tauna i duniáꞌ
ina haweꞌheꞌ molingkudu menómbá i Hio Pueꞌ,
hai ina mampomahileheꞌ hangaꞌMu,
10 láwiꞌ Io mahile tueꞌMu,
hai mobábehiKoꞌ to maroꞌa ntepuꞌu.
Io peá Pueꞌ Ala.
11 Ó PUEꞌ, kupembiáꞌ bona Nupakanótóáꞌaꞌ ráráMu,
bona tetidaꞌaꞌ oaꞌ i Hio.
Nuweꞌiaꞌ katimama lalu
bona Io to kupengkoruꞌi.
12 Ó Pueꞌ, Pueꞌ Ala to kupenómbái,
ina kutóiáKoꞌ hangko i lalungkuꞌ ntepuꞌu.
Ina kupomahile hangaꞌMu
haweꞌ i rue-ruena.
13 Ánti kamahilena ahiꞌMu i kódóꞌ,
Nupelaemoꞌ hangko i duniáꞌraꞌ tomate.
14 Ó Pueꞌ Ala, tauna to maꞌángkáꞌ haweꞌmoheꞌ mampoewaliáꞌaꞌ.
Araheꞌ tauna to maseke mampoinao mopapateaꞌ.
TiꞌaraKoꞌ rabiláꞌ.
15 Agáiáná Io Pueꞌ to bukeꞌ ahiꞌ hai maroꞌa laluMu,
sabaraꞌKoꞌ oaꞌ hai tetidaꞌKoꞌ.
16 Kupembiáꞌ bona Nupehaileꞌaꞌ
hai Nupatongawaꞌ kamaꞌahiꞌMu i kódóꞌ hawiꞌMu.
Nupakaróhóaꞌ hai kuasaꞌMu, hai Nupelaeaꞌ,
kódóꞌ ánáꞌnaꞌaꞌ hawiꞌMu towawine.
17 Kupembiáꞌ bona Nupatongawaꞌ i kódóꞌ kamaroꞌaMu,
bona tauna to mokáhihiꞌaꞌ ina mahiliheꞌ
ane raisá kaꞌIona PUEꞌ to motulungi hai mopalindóaꞌ.