Pekakaeraꞌ toSáráeliꞌ bona napelaeheꞌ Pueꞌ Ala
85
I topoánti toponani. Naniraꞌ toKora.a
2 Ó PUEꞌ, hangkoia mowátiꞌmoKoꞌ tampoꞌMu,
hai katueꞌraꞌ pemuleꞌána Iako Nupamaroꞌa miꞌi huleꞌ.
3 Nuámpungi miꞌi kamasalaꞌraꞌ taunáMu
hai Nuwoe miꞌi dósáraꞌ.
4 Upu-upu kamabukoꞌMu Nupamalulu miꞌi,
hai kamabukoꞌMu to rumihi ntepuꞌu Nukábáhá.
5 Ó Pueꞌ Ala to mampelaeangkaiꞌ,
kipembiáꞌ bona Nupamaroꞌa huleꞌ katueꞌkiꞌ,
hai ineeꞌmongkaiꞌ Nupokóiꞌ inao.
6 Ba ina mabukoꞌKoꞌ oaꞌ i kaiꞌ haweꞌ i rue-ruena?
Ba ina mabukoꞌKoꞌ oaꞌ haweꞌ-haweꞌ i pemuleꞌángkiꞌ?
7 Tiꞌara paꞌi ina Nupamaroꞌa huleꞌ katueꞌkiꞌ
bona kaiꞌ taunáMu góeꞌangkaiꞌ ánti petulungiMu.
8 Ó PUEꞌ, kipembiáꞌ bona Nupatongawaꞌáꞌangkaiꞌ
kamaꞌahiꞌMu to tiꞌara madepuꞌ-depuꞌ,
hai Nutudeꞌáꞌangkaiꞌ kaNupelaengkiꞌ.
9 Kuꞌundeꞌ mampehádingi ngkóráꞌna Pueꞌ Ala.
PUEꞌ modándi miꞌi ina mampeweꞌi roꞌa ngkatueꞌ
i tauna to tetidaꞌ i Hia,b
bona tiꞌarapoheꞌ mohuleki bábehiáraꞌ to tiꞌara maroꞌa.
10 Ia bateꞌna ina mampelaeheꞌ tauna to mengkoruꞌ i Hia,
álána peawaꞌNa tongawaꞌ i tampoꞌtaꞌ.
11 Pueꞌ Ala ina mowátiꞌ taunáNa.
Ia ina mopatongawaꞌáheꞌ kamaꞌahiꞌNa hai katetidaꞌNa.
Ia ina mobutusi kara-kararaꞌ i kanótó-nótóána,
hai ina mampoweꞌiheꞌ roꞌa ngkatueꞌ.
12 Tauna i duniáꞌ ina tetidaꞌ i Pueꞌ Ala,
hai Pueꞌ Ala i surugáꞌ ina mopatongawaꞌ kamanótóNa i tauna.
13 Bateꞌna PUEꞌ ina mampoweꞌikeꞌ apa to maroꞌa,
hai ina maroꞌa wuaꞌna powiáꞌtaꞌ i tampoꞌtaꞌ.
14 Kahintimbá ina molumao i lindoꞌNa,
mopatimama poráráꞌáNa.