Nani petóiáraꞌ toSáráeliꞌ to menómbá i Ierusale
84
I topoánti toponani. Mouláꞌ nani “Gitiꞌ.” Naniraꞌ toKora.a
2 Ó PUEꞌ to Makuasaꞌ,
meawaꞌ ntepuꞌu katoroꞌáMu.
3 Mabila ntepuꞌuaꞌ i TámbiMu PUEꞌ,
mohoraꞌ-horaꞌaꞌ ánti kagóeꞌkuꞌ i Hio
Pueꞌ Ala to mopaꞌara katueꞌ.
4 Ó PUEꞌ to Makuasaꞌ,
Datungkuꞌ hai Pueꞌ Ala to kupenómbái.
Mogalo riꞌi dena molámbiꞌ hárána,
hai balolaiꞌ mobábehi hárána to ina napoánáꞌi
hungkuꞌ i paintuá popenómbá.
5 Morasiꞌ miꞌi tauna to toroꞌ i TámbiMu,
mamponaniheꞌ oaꞌ nani petóiá i Hio.
6 Morasiꞌ miꞌi tauna to molámbiꞌ karóhó hangko i Hio,
to moundeꞌ ntepuꞌu lao menómbá i buluꞌ Sio.
7 Tempóraꞌ melempó i lembo Baka, katoroꞌá to bangi iti
tebáliki mewaliꞌ katumbuꞌá uwai.
Udá to mendáulu mopaꞌara pewátiꞌ to handaꞌ.
8 Tempóraꞌ molumao lao i buluꞌ Sio
ina menómbáheꞌ i Pueꞌ Ala,
kalao-laoheꞌ maróhó.
9 Ó PUEꞌ, Pueꞌ Ala to Makuasaꞌ,
Nupehádingi pekakaengkuꞌ.
Ó Pueꞌ Ala to napenómbái Iako,
Nupailalu peraruaꞌkuꞌ.
10 Ó Pueꞌ Ala, kupembiáꞌ bona Nupatongawaꞌ kamaroꞌaMu
i tadulakongkiꞌ to mokámpáiangkaiꞌ.
Nupokagóeꞌ tauna to Nupileꞌi miꞌi mewaliꞌ datu.
11 Maroꞌa mani hangaloá peaꞌ i támbiMu,
haneꞌi hasábu alona i katoroꞌá to ntániꞌna.
Maroꞌa mani meángkáꞌaꞌ mokámpái babaꞌ támbina Pueꞌ Alangkuꞌ,
haneꞌiaꞌ toroꞌ i bambaruꞌna tauna to kadake.
12 Láwiꞌ PUEꞌ Ala to nodo alo hai lábá,
Ia moteteꞌaꞌ hai mokámpáiaꞌ.
Ia mampoweꞌikeꞌ ahiꞌ hai pebiláꞌ.
Kamaroꞌa tiꞌara Napekabohiꞌ
i tauna to tiꞌara ara kamasalaꞌna.
13 Ó PUEꞌ to Makuasaꞌ,
morasiꞌ miꞌi tauna to mehárungá i Hio.