Pekakae membiáꞌ bona Pueꞌ Ala moewaꞌ ewáliraꞌ toSáráeliꞌ
83
Nani to nakáráhi Asaꞌ.
2 Ó Pueꞌ Ala, ineeꞌ peKoꞌ mopamaniiꞌ-niiꞌ hai melingkápuꞌ.
Ó Pueꞌ Ala, ineeꞌKoꞌ roo-roo peá.
3 Nupeita ewáliMu, mahewoheꞌ.
Tauna to mokáhihiꞌKoꞌ iti, meꞌewaꞌheꞌ.
4 Himpudumoheꞌ ina moákálángi taunáMu,
hai hintuwuꞌheꞌ ina mampoewaliá taunáMu to Nukámpái,
5 rauliꞌ, “Laomokeꞌ mopatuna toSáráeliꞌ
bona hangaꞌraꞌ tiꞌara piꞌi tebuhinao!”
6 Himpudumoheꞌ ina mobábehi to tiꞌara maroꞌa,
hai hintuwuꞌheꞌ ina moewaꞌKoꞌ.
7 Tauna iti iamoheꞌ:
toEdo hai pemuleꞌánaheꞌ Sumaila,
toMoabiꞌ hai pemuleꞌánaheꞌ Hagari,
8 toGebaꞌ, toAmoni, toAmaleꞌ,
toPelisitiꞌ, hai tauna to toroꞌ i kótá Tiru.
9 Mogalo riꞌi toAsuri mohintuwuꞌ hai hira,
modureiheꞌ pemuleꞌána Loꞌoti.a
10 Kupembiáꞌ bona Nubábehi i hira
nodo to Nubábehi i toMidia,b
hai to Nubábehi woꞌo i Sisera
hai i Iabi hungkuꞌ i uwai Kiso.c
11 Nupapateheꞌ i tampoꞌ Endó,
hai Nupopewaliꞌheꞌ to mopamaruduꞌ tampoꞌ.
12 Kupembiáꞌ bona Nupatunaheꞌ tuꞌánáraꞌ
nodo to Nubábehi i Ore hai Sebe,d
hai Nunangiheꞌ woꞌo upu-upu tuꞌánáraꞌ
nodo kaNunangiraꞌ Seba hai Salamuna.e
13 Rauliꞌ, “Laomokeꞌ mokuasaꞌi tampoꞌna Pueꞌ Ala.”
14 Ó Pueꞌ Ala to kupenómbái,
kupembiáꞌ bona Nuropuꞌheꞌ nodo kungku ba deami
to nahimbáróká wui,
15 nodo api to mopapumpu kakau,
ba api to roreꞌ i buluꞌ.
16 Nudápáꞌheꞌ hai wui to rumihi,
Nupamalááꞌheꞌ hai mpeangi to rumihi.
17 Ó PUEꞌ, Nupamahili ntepuꞌuheꞌ,
bona raundeꞌ menómbá i Hio.
18 Nupatodáhiheꞌ mahili hai malááꞌ haweꞌ i rue-ruena,
Nupatodáhiheꞌ mate hai hangaꞌraꞌ rapakedái.
19 Hangko ionoꞌ, ina raisá kaꞌIona PUEꞌ,
Io peá to makuasaꞌ ntepuꞌu i humalele duniáꞌ.