Pueꞌ Ala Topobutusi Mahile
82
Nani to nakáráhi Asaꞌ.
Pueꞌ Ala mehoda i surugáꞌ
mobutusi kara-kararaꞌ pueꞌ ala
to rapenómbái tauna i tampoꞌ ntániꞌna,
Nauliꞌ:
2 “Hangapa mani kamaruena pobutusimi tiꞌara hintotoꞌ?
Hangapa mani kamaruemi mamperuruꞌi tauna to kadake?
3 Katoꞌuána, hangaa-ngaa nibutusi i kanótó-nótóána
kara-kararaꞌ tauna to i wóiꞌ tueꞌraꞌ hai ánángkóiꞌ to ilu.
Hangaa-ngaa nipeámpárái tauna to rapopeahiahiꞌ
hai tauna to tiꞌara nakaꞌarai.
4 Nipelae tauna to i wóiꞌ tueꞌraꞌ hai to meahiahiꞌ,
nikábáháheꞌ hangko i taeraꞌ tauna to kadake.”
5 Pueꞌ alaraꞌ tauna ntániꞌna i duniáꞌ,
tiꞌaraheꞌ moisá apa-apa.
Aramoheꞌ i kakáindiána,
onoꞌ miꞌi haneꞌi tauna i duniáꞌ
tiꞌarapoheꞌ tetidaꞌ i áturá-áturá
to mewaliꞌ ntóáꞌna polumaona katueꞌ.
6 Nauliꞌ Pueꞌ Ala, “Kómu pueꞌ alakou,a
kómu miꞌi upu-upu ánáꞌna Pueꞌ to i Surugáꞌ.
7 Agáiáná ina matekou hibali hai tauna biásá,
hibali woꞌo hai tauna to mepárentá, katueꞌmi tiꞌara ina monónó.”
8 Ó Pueꞌ Ala, maimoKoꞌ mobutusi kara-kara i duniáꞌ,
láwiꞌ upu-upu tauna i duniáꞌ, Io miꞌi pueꞌraꞌ.