Nani petóiá i tempó mowoꞌungi pototowi
81
I topoánti toponani. Mouláꞌ nani “Gitiꞌ”. Nanina Asaꞌ.
2 Monanimokou nani petóiá i Pueꞌ Ala
to mampoweꞌikeꞌ róhó!
Mohoraꞌ-horaꞌmokou i kagóeꞌ-góeꞌ,
motóiá Pueꞌ Ala to napenómbái Iako.
3 Monanimokou, nipopokániꞌ rebana,
nikáwiꞌ gambusuꞌ hai kasapi, nipamarasa.
4 Motawueꞌmokou tamburuꞌ i alo mahile,
i tempóntaꞌ mamposusai maleheꞌ wulá hai metinámbu,
5 láwiꞌ alo-alo mahile iti mewaliꞌ párentá
to tepakanótó miꞌi i toSáráeliꞌ,
ia miꞌi áturána Pueꞌ Ala to napenómbái Iako.
6 Ia mopakanótó áturá iti i toSáráeliꞌ pemuleꞌánaheꞌ Iusupu,
tempóNa mohuku toMásiriꞌ.
Kuhádi laluita,
agáiáná tiꞌara kuisá heáná to molaluita.a
7 Nauliꞌ, “Kuahoꞌ miꞌi inánti hangko i wángámi,b
hai Kuwehángi kárándi to nilembaꞌ.c
8 I tempómi rapamapári, meraruaꞌkou,
hai Kukábáhákou,d
Kuhánikikou moliu gumpataꞌ pebuniáNgkuꞌ.e
Kupampehukáꞌikou tempóna tiꞌara ara uwai i Meriba.f
9 Ee toSáráeliꞌ taunáNgkuꞌ, nipehádingi apa to ina Kupaingáꞌiákou.
Kuhárungá mau manikou mampehádingiAꞌ.
10 Ineeꞌ ara pueꞌ ala ntaniꞌ to nipenómbái.
Ineeꞌkou menómbá i ánitu to rapenómbái tauna ntániꞌna.
11 Kódóꞌ miꞌi Pueꞌ Ala PUEꞌmi
to moántikou mesuwuꞌ hangko i tampoꞌ Másiriꞌ.
Nipembiáꞌ apa to niparaluu hai ina Kuweꞌikou.
12 Agáiáná taunáNgkuꞌ tiꞌaraheꞌ mau mampehádingiAꞌ,
toSáráeliꞌ tiꞌaraheꞌ mau mengkoruꞌ i Kódóꞌ.
13 Onoꞌ miꞌi haneꞌi Kupatodáhimoheꞌ matuꞌa laluraꞌ,
Kupatodáhimoheꞌ mouláꞌ peundeꞌáraꞌ haduduáraꞌ.g
14 Ane mauheꞌ mampehádingiAꞌ,
hai ane mauheꞌ mampeuláꞌi apa toKuhángáꞌáꞌáheꞌ,
15 ina poloꞌAꞌ mampopengkoruꞌ ewáliraꞌ,
hai ina Kupamanangiheꞌ upu-upu to moewaꞌheꞌ.
16 Tauna to mokáhihiꞌAꞌ ina molingkuduheꞌ moángki bitiNgkuꞌ,
hai ina Kuhukuheꞌ haweꞌ i rue-ruena.
17 Agáiáná taunáNgkuꞌ, ina Kupoweꞌiheꞌ pandeꞌ to matamaꞌ ntepuꞌu,
hai ina Kupamabuhuheꞌ hai tináháꞌ to hangko i buluꞌ watu.”