Pekakae bona toSáráeliꞌ rapelae
80
I topoánti toponani. Rananika mouláꞌ nani “Bungaꞌ Bakung.” Nani pepaturoꞌ to nakáráhi Asaꞌ.
2 Ó Pueꞌ Ala Topoewu toSáráeliꞌ, Nupehádingi!
Io to moteteꞌheꞌ pemuleꞌána Iusupu nodoheꞌ dimbáMu,
Nupehádingi pekakaengkiꞌ.
Io to mehoda i pehodaꞌá kadatuá
i hiliꞌraꞌ kerubi,
kipembiáꞌ bona mewangkaꞌKoꞌ
3 i lindoꞌraꞌ toEparai, toBenami hai toManase.
Kipembiáꞌ bona Nupatongawaꞌ kamakuasaꞌMu.
MaiKoꞌ motulungiangkaiꞌ.
4 Ó Pueꞌ Ala, kipembiáꞌ bona Nupopewaliꞌangkaiꞌ
nodo katueꞌkiꞌ hangkoia.
Nupokagóeꞌangkaiꞌ bona maroꞌa katueꞌkiꞌ.
5 Ó PUEꞌ, Pueꞌ Ala to Makuasaꞌ,
hangapa mani kamaruena Nupatongawaꞌ kamabukoꞌMu,
kehapiꞌangkaiꞌ mekakae membiáꞌ tulungi i Hio.
6 Tiꞌara pandeꞌ to kiandeꞌ,
uwai mátángkiꞌ riꞌi.
Mainu peangkaiꞌ uwai to moili
hangko i mátángkiꞌ,
7 láwiꞌ Nupatodáhi miꞌi tampoꞌkiꞌ mewaliꞌ ntóáꞌna posisalaꞌ
i tauna to toroꞌ hungkuꞌ i kaiꞌ,
hai ewálingkiꞌheꞌ mopatawaiangkaiꞌ.
8 Ó Pueꞌ Ala to Makuasaꞌ, kipembiáꞌ bona Nupopewaliꞌangkaiꞌ
nodo katueꞌkiꞌ hangkoia.
Nupokagóeꞌangkaiꞌ bona maroꞌa katueꞌkiꞌ.
9 Hangkoia, Nulimbámoheꞌ taunáMu hangko i tampoꞌ Másiriꞌ,
Nuwuraheꞌ tauna to toroꞌ i tampoꞌ Kánáꞌá,
haneꞌi Nupatoroꞌheꞌ taunáMu i tampoꞌ iti
nodo to mantudaꞌ hampóꞌá kau anggoroꞌ.
10 Nupatimama miꞌi pantudaꞌána kau anggoroꞌMu iti,
haneꞌi kálándána haweꞌ i lapi tampoꞌ
mobukeki humalele tampoꞌ Kánáꞌá.
11 Kau anggoroꞌ iti mobóungángi buluꞌ-buluꞌ,
hai dáꞌá-dáꞌána mobóungángi kau to mapángkáꞌ ntepuꞌu.
12 Rángkána haweꞌ i tahiꞌ Tangaꞌ,
hai doena haweꞌ i uwai Epara.
13 Ó Pueꞌ, moapa riꞌi haneꞌi Nugero bosoꞌ
to mantoleli hinoe anggoroꞌMu iti?
Wuaꞌna rapupu upu-upu tauna to melempó ionoꞌ.
14 Boeꞌ kakau mobentá duuꞌna marupuꞌ,
hai binataꞌ to maila mandeꞌ wuaꞌna duuꞌna upu.
15 Ó Pueꞌ Ala to Makuasaꞌ, mesuleꞌmoKoꞌ mai i kaiꞌ!
Nupetiroangkaiꞌ mai hangko i surugáꞌ,
hai Nukádipuráꞌangkaiꞌ taunáMu
to rapándiriꞌ nodo kau anggoroꞌ,
16 nodo kálándá to Nutudaꞌ haduduáMu,
hai tumbeꞌna anggoroꞌ to Nupamaróhó ntepuꞌu.
17 Ewali motiwi miꞌi kau anggoroꞌMu hai rahunui.
Hampóáꞌworia ina tunaheꞌ ane Nukámbáróáheꞌ.
18 Hampóáꞌworia Nukámpái tauna to Nupileꞌi miꞌi,
tauna to Nuweꞌi miꞌi róhó bona ia mampopolumao bágóꞌMu.
19 Kaiꞌ, tiꞌaraꞌangkaiꞌ ina motaleukiKoꞌ.
Kipembiáꞌ bona Nukámpái katueꞌkiꞌ,
haneꞌi ina kitóiáKoꞌ.
20 Ó PUEꞌ, Pueꞌ Ala to Makuasaꞌ,
kipembiáꞌ bona Nupopewaliꞌangkaiꞌ
nodo katueꞌkiꞌ hangkoia.
Nupokagóeꞌangkaiꞌ bona maroꞌa katueꞌkiꞌ.