Pekakae membiáꞌ bona Pueꞌ mampelaeheꞌ toSáráeliꞌ
Nani to nakáráhi Asaꞌ.
79
Ó Pueꞌ Ala, tauna to hangko i tampoꞌ ntániꞌna,mosuakimoheꞌ tampoꞌ to Nuweꞌiangkaiꞌ mewaliꞌ tampoꞌkiꞌ.
Mopakedáiheꞌ TámbiMu to magasaꞌ,
hai mogeromoheꞌ kótá Ierusale.
2 Handaꞌ tauna to tetidaꞌ i Hioa rapapate,
hai wátámandoꞌraꞌ rapatodáhi peá,
haneꞌi óntóꞌraꞌ hawiꞌMu iti
mewaliꞌ pandeꞌraꞌ tádáhi hai binataꞌ to maila.
3 Waheꞌraꞌ moili nodo uwai i humalele kótá Ierusale,
tiꞌara ara to motawuheꞌ.
4 Kaiꞌ ratitibei hai rapakóiꞌ
tauna to toroꞌ i tampoꞌ to hungkuꞌ i tampoꞌkiꞌ.
5 Ó PUEꞌ, hangapa mani kamaruena kamabukoꞌMu i kaiꞌ?
Haweꞌ impirá pohiriꞌMub to nodo api to roreꞌ?
6 Kipembiáꞌ bona Nuburohoꞌ kamabukoꞌMu
i tina-tina i duniáꞌ to tiꞌaraKoꞌ moisá,
hai i tauna i kadatuá-kadatuá
to tiꞌara mekakae i lalu hangaꞌMu,
7 láwiꞌ mopatunamoheꞌ taunáMu pemuleꞌánaheꞌ Iako,
hai mogeromoheꞌ katoroꞌáraꞌ.
8 Ineeꞌangkaiꞌ Nuhuku ánti dósáraꞌ toiorungkiꞌ.
Kipembiáꞌ bona poloꞌ Nupatongawaꞌ kamaꞌahiꞌMu i kaiꞌ,
láwiꞌ tiꞌara piꞌi ara pehárungángkiꞌ.
9 Ó Pueꞌ Ala to kipenómbái, Nutulungiangkaiꞌ,
láwiꞌ Io miꞌi to mampelaeangkaiꞌ.
Nukábáháꞌangkaiꞌ hai Nuámpungi dósángkiꞌ,
bona hangaꞌMu rapomahile.
10 Ineeꞌ Nupatodáhi tauna ntániꞌna mekuneꞌ:
“Iumbá rikáꞌá Pueꞌ Ala to rapenómbái?”
Kipembiáꞌ Nupatodáhiangkaiꞌ mampeita poháwángiMu
i tauna to mopapateheꞌ huoꞌáMu.
11 Nupehádingi peraruaꞌraꞌ tauna to ratarungku.
Kipembiáꞌ bona tauna to tepakanótó miꞌi ina rahuku mate,
Nukábáháheꞌ ánti kuasaꞌMu.
12 Ó Pueꞌ, ewáliraꞌ taunáMu deꞌe motitibeiheꞌ hangaꞌMu,
onoꞌ miꞌi haneꞌi kupembiáꞌ bona Nuhukuheꞌ
hai kakadakeraꞌ iti Nuháwángi pitu kánina karumihina.
13 Hangko ionoꞌ, kaiꞌ deꞌe taunáMu to Nupoewu,
ina kitóiáKoꞌ oaꞌ haweꞌ i rue-ruena,
hai ina kipomahileKoꞌ
haweꞌ-haweꞌ i pemuleꞌángkiꞌ.