Paturoꞌ hangko i daritakáná toSáráeliꞌ
78
Nani paturoꞌna Asaꞌ.
Ee hángká toSáráeliꞌkuꞌ, nipehádingi paturoꞌkuꞌ,
hai nipailalu apa to kudaritaꞌákou.
2 Ina kupahaweꞌákou tangkuleraꞌ,
hai ina kutótórákáꞌákou lempóna
to tewuniángi hangkoia.
3 To kihádi miꞌi hai kiꞌisá
láwiꞌ ratuntuáꞌangkaiꞌ toiorungkiꞌ,
4 tiꞌara ina kiwuniángiá ánáꞌkiꞌ,
agáiáná ina kipodarita i pemuleꞌángkiꞌ to ina haweꞌ
mokana i kuasaꞌna PUEꞌ to hintotoꞌ ratóiá
hai tandaꞌ-tandaꞌ kuasaꞌ to Nabábehi.
5 Ia mampeweꞌi PaturoꞌNa hai áturáNa
i toSáráeliꞌ pemuleꞌánaheꞌ Iako,
hai mohuoꞌheꞌ toioruntaꞌ iti
mopaturoꞌ áturáNa iti i ánáꞌraꞌheꞌ,
6 bona pemuleꞌáraꞌ ina moisáheꞌ apa peundeꞌáNa,
hai hira woꞌo ina mopahaweꞌ i ánáꞌraꞌ to ina mesupaꞌ.
7 Ane mopaturoꞌheꞌ oaꞌ ánáꞌraꞌ,
ánáꞌraꞌ iti ina mehárungáheꞌ i Pueꞌ Ala,
hai tiꞌaraheꞌ ina mokáláliꞌá apa to nabábehi Pueꞌ Ala,
agáiáná ina mampeuláꞌiheꞌ párentáNa.a
8 Ane noꞌonoꞌi, tiꞌaraheꞌ ina nodo toioruraꞌ
to matuꞌa laluraꞌ moewaꞌ Pueꞌ Ala.
Hira iti, laluraꞌ tiꞌara bukeꞌ-bukeꞌ i Pueꞌ Ala,
hai tiꞌaraheꞌ tetidaꞌ i Hia.
9 ToEparai, kehapiꞌ mapándeheꞌ mopakeꞌ panaꞌ
hai párewá pombeala ntániꞌna,
agáiáná mosuliꞌraheꞌ hangko i pombealaꞌáraꞌ.
10 Tiꞌaraheꞌ tetidaꞌ i podándiraꞌ i Pueꞌ Ala,
hai tiꞌaraheꞌ mau mampeuláꞌi PaturoꞌNa.
11 Mokáláliꞌámoheꞌ apa to Nabábehi,
ia miꞌi tandaꞌ-tandaꞌ kuasaꞌ to Napatongawaꞌámoheꞌ.
12 I roboꞌ Soab i tampoꞌ Másiriꞌ,
Pueꞌ Ala mobábehi tandaꞌ kuasaꞌ i lindoꞌraꞌ toioruraꞌ.
13 Ia mogááꞌ tahiꞌ haneꞌi Napopengkalimbaheꞌ.
I kabeoꞌ hai i kuánáraꞌ, Ia motaha uwai nodo bente.c
14 Mabaa Ia mampoioruáheꞌ nodo gawu,
hai káindi nodo api.d
15 Ia mobikáꞌ buluꞌ watu i pádá loriꞌ
hai mopatumbuꞌ uwai to handaꞌ ntepuꞌu nodo tahiꞌ
bona rainu i kagáná-gánáꞌána.e
16 Uwai Napopoili hangko i lapi buluꞌ watu
mewaliꞌ uwai to mahile.
17 Agáiáná i pádá to bangi, toSáráeliꞌ mobábehiheꞌ oaꞌ dósá,
moewaꞌheꞌ oaꞌ Pueꞌ Ala to i Surugáꞌ.
18 Ratunggái mampehukáꞌ Pueꞌ Ala,
hai membiáꞌheꞌ pandeꞌ to raundeꞌ.f
19 Motitibeiheꞌ Pueꞌ Ala, rauliꞌ,
“Nabuku paꞌi Pueꞌ Ala mampoweꞌikeꞌ pandeꞌ i pádá loriꞌ?
20 Toꞌu Ia mobóbáꞌ buluꞌ watu haneꞌi uwai mesuwuꞌ,
hai poilina rumihi,
agáiáná Nabuku paꞌi mampoweꞌikeꞌ pandeꞌ hai bauꞌ,
bona kitaꞌ taunáNa peisákeꞌ mandeꞌ?”
21 I kanahádina PUEꞌ polaluitaraꞌ iti,
Ia mabukoꞌ ntepuꞌu i pemuleꞌánaheꞌ Iako,
haneꞌi Ia mohukuheꞌ toSáráeliꞌ hai api ánti kamabukoꞌNa,g
22 láwiꞌ tiꞌaraheꞌ mepoinálái i Pueꞌ Ala
ba mehárungá i kuasaꞌNa ina motulungiheꞌ.
23 Agáiáná kehapiꞌ noꞌonoꞌ, Ia mopárentá
gawu hai babaꞌ surugáꞌ bona tebungkáhi.
24 Napopendáuluáheꞌ rótiꞌ mannah bona raꞌandeꞌ,
Napoweꞌiheꞌ pandeꞌ to hangko i surugáꞌ.
25 Upu-upuheꞌ mandeꞌ rótiꞌ manna iti to nodo pandeꞌraꞌ malaꞌeka.
Handaꞌ ntepuꞌu pandeꞌ to naweꞌiheꞌ Pueꞌ Ala.
26 Ia mohuoꞌ wui hangko i mata alo,
ánti kuasaꞌNa, haweꞌ miꞌi woꞌo wui hangko tándáꞌ i wóiꞌ.
27 Nanawoꞌáheꞌ tádáhi mewaliꞌ pandeꞌraꞌ,
kahandaꞌraꞌ nodo awu ba wungi i wiwi tahiꞌ.i
28 Tádáhi iti Nanawoꞌáheꞌ toSáráeliꞌ i pobambaruꞌáraꞌ,
mantoleli katoroꞌáraꞌ iti.
29 Mandeꞌheꞌ bauꞌ haweꞌ mabuhu.
To rapoinao mpiiꞌ, iti to naweꞌiheꞌ Pueꞌ.
30 Agáiáná tangaꞌna rótiꞌ iti ara mani i lalu ngángáraꞌ,
hangko tiꞌara maniheꞌ mamporái,
31 Pueꞌ Ala mopatongawaꞌ kamabukoꞌNa i hira.
Ia mopapateheꞌ tobaleilo to keate ntepuꞌu,
iamoheꞌ ánáꞌntomoane toSáráeliꞌ to maróhó ntepuꞌu.j
32 Agáiáná kehapiꞌ nahukumoheꞌ Pueꞌ,
mobábehi maniheꞌ dósá.
Kehapiꞌ ara miꞌi tandaꞌ kuasaꞌ to nabábehi Pueꞌ Ala,
toSáráeliꞌ tiꞌaraheꞌ mehárungá i Hia.
33 Onoꞌ miꞌi haneꞌi tueꞌheꞌ oaꞌ i kamalááꞌ,
hai kahópóꞌána tueꞌraꞌ mbero-mbero.
34 Bahangapa miꞌi kánina Pueꞌ Ala mantepuꞌu miꞌi mopapateheꞌ,
hangko menosoꞌraheꞌ hai membiáꞌ tulungi i Hia.
35 Mambuhinaoheꞌ Pueꞌ Ala to maróhó nodo buluꞌ watu,
Pueꞌ Ala to i Surugáꞌ to mokábáháheꞌ.
36 Agáiáná molaluitaheꞌ i humeraꞌ peá,
modongkoꞌ peheꞌ i Pueꞌ Ala.
37 Laluraꞌ tiꞌara bukeꞌ-bukeꞌ i Pueꞌ Ala,
hai tiꞌaraheꞌ tetidaꞌ i podándi to Napaꞌara hai hira.k
38 Agáiáná kehapiꞌ noꞌonoꞌ, Pueꞌ Ala bukeꞌ ahiꞌ.
Ia moámpungi salaꞌraꞌ, hai tiꞌaraheꞌ Napatuna.
Káni-kánina Ia motaha kamabukoꞌNa,
tiꞌaraheꞌ Nakabukoꞌi mpiiꞌ-mpiiꞌna.
39 Nabuhinao kahirana tauna to maledeꞌ peheꞌ,l
hampaiꞌ peá katueꞌraꞌ
nodo wui to moliu hai tiꞌara ina mesuleꞌ.
40 Bahangapa kánina moewaꞌheꞌ Pueꞌ Ala i pádá loriꞌ,
hai mopamasusaheꞌ laluNa.
41 Káni-kánina mampehukáꞌheꞌ Pueꞌ Ala.m
ToSáráeliꞌ mopamapáriheꞌ laluna Pueꞌ Ala to Magasaꞌ,
Pueꞌ Ala to rapenómbái.
42 Tiꞌaraheꞌ mambuhinao kamakuasaꞌNa,
rakáláliꞌá tempóna Ia mokábáháheꞌ hangko i ewáliraꞌ.
43 Tempó onoꞌ, Ia mobábehi tandaꞌ kuasaꞌ
i tampoꞌ Másiriꞌ hai i roboꞌ Soa.
44 Ia mobáliki uwai mewaliꞌ waheꞌ,
álána toMásiriꞌ tiꞌaraheꞌ peisá moinu uwai iti.n
45 Ia mopalóhóꞌ handaꞌ ntepuꞌu támbóliꞌ to mohibuꞌ waheꞌraꞌ toMásiriꞌ,o
hai Ia mokábáhá seóꞌ to handaꞌp to mopakarugiꞌ tampoꞌraꞌ.
46 Ia mopatodáhi tudaꞌ-tudaꞌraꞌ toMásiriꞌ raꞌandeꞌ koeꞌ,
hai katupeeꞌ mandeꞌ wuaꞌ powiáꞌraꞌ.q
47 Ia mopaꞌara udá watu to mopapate kau anggoroꞌraꞌ,r
hai gawu to melinti ntepuꞌu mopamarugiꞌ kau ara to ratudaꞌ.
48 Ia mopatodáhi gapiꞌraꞌ kana udá watu,
hai binataꞌ to rapiaraꞌ mate napereꞌ kiláꞌ.s
49 Ia mopatongawaꞌ kamabukoꞌNa i toMásiriꞌ,
láwiꞌ Ia mabukoꞌ ntepuꞌu.
MalaꞌekaNa moántiheꞌ i kapate.t
50 Ia tiꞌara piꞌi motaha kamabukoꞌNa,
tiꞌaraheꞌ Nakábáhá hangko i kapate,
agáiáná Napatodáhiheꞌ mate kana hakiꞌ to humalele.
51 Ia mopapateheꞌ upu-upu tobaleilo to towutuꞌ i tampoꞌ Másiriꞌ,
pemuleꞌána Hamau iti mateheꞌ.
52 Roo onoꞌ, Pueꞌ Ala moántiheꞌ taunáNa
mesuwuꞌ hangko i tampoꞌ Másiriꞌ,v
hai Nateteꞌheꞌ i pádá loriꞌ
nodo to moeri dimbá.
53 Ia moteteꞌheꞌ i kamaroꞌa-roꞌa, hai tiꞌaraheꞌ malááꞌ,
agáiáná ewáliraꞌ mate humpu i lalu tahiꞌ.w
54 Ia moántiheꞌ haweꞌ i tampoꞌNa to magasaꞌ,
i buluꞌ-buluꞌna to Naꞌala ánti kamakuasaꞌNa.x
55 Ia mowuraheꞌ tauna ntániꞌna
bona taunáNaheꞌ peisá mesuaꞌ,y
Nagáláꞌ-gáláꞌáheꞌ tampoꞌ to mewaliꞌ sosoraraꞌ,z
hai mopatoroꞌheꞌ toSáráeliꞌ i támbiraꞌ toKánáꞌá.
56 Agáiáná kehapiꞌ noꞌonoꞌ, toSáráeliꞌ mampehukáꞌ Pueꞌ Ala,
moewaꞌheꞌ to i Surugáꞌ.
Tiꞌaraheꞌ mampeuláꞌi párentá-párentáNa.
57 Hibaliheꞌ hai toioruraꞌ,
tiꞌaraheꞌ tetidaꞌ i Hia,
hai tiꞌaraheꞌ peisá rapoinálái,
nodoheꞌ panaꞌ to tiꞌara maroꞌa.
58 Mobábehiheꞌ paintuá popenómbá i wongko buluꞌ,
bona menómbáheꞌ i ánitu,
álána masusa laluna Pueꞌ Ala
hai bábehiáraꞌ iti mopaꞌara pohiriꞌNa.
59 I kanahádina Pueꞌ Ala, toSáráeliꞌ menómbáheꞌ i ánitu,
Ia mabukoꞌ ntepuꞌu haneꞌi tiꞌara mpuꞌupoheꞌ Naundeꞌ.
60 Ia mopálehi Bambaruꞌ Penómbáꞌá i Silo.a
Bambaruꞌ iti ia miꞌi katoroꞌáNa i oloꞌraꞌ tauna.
61 Petiꞌ Podándi, tandaꞌ kuasaꞌNa hai peawaꞌna,
napatodáhi PUEꞌ raperampaꞌi ewáliNa.b
62 Ia mabukoꞌ ntepuꞌu i tauna to Napileꞌi mewaliꞌ taunáNaheꞌ,
onoꞌ miꞌi haneꞌi Napatodáhiheꞌ rapapate.
63 Ánáꞌntomoaneraꞌ mate i pombeala,
hai ánáꞌntawineraꞌ tiꞌara piꞌi raponaniá nani pohamboko.
64 Tadulako-tadulako menómbá rapapate hai pihoꞌ,
agáiáná ewáliraꞌ tiꞌaraheꞌ mopaliu tobembaꞌraꞌ metatangi.
65 Kahópóꞌána mearó miꞌi Pueꞌ, nodo to hangko pempaaꞌ,
nodo surudadoꞌ to keate to tiꞌara piꞌi malangu.
66 Ia mohuhuli ewáliNaheꞌ hai Nanangiheꞌ,
álána mahiliheꞌ haweꞌ i rue-ruena.
67 Pueꞌ mosapuákaheꞌ pemuleꞌána Iusupu,
toEparai iti, tiꞌaraheꞌ Napileꞌi motadulakoi toSáráeliꞌ,
68 agáiáná Napileꞌiraheꞌ toIudá,
hai buluꞌ Sio to Napomahile.
69 Ia moaró TámbiNa to magasaꞌ hai mapángkáꞌ nodo langiꞌ,
nodo duniáꞌ to Napopeángkáꞌ haweꞌ i rue-ruena.
70 Ia mopileꞌi Daudiꞌ hawiꞌNa,
Naꞌala hangko i poewuána dimbá,
71 bona tiꞌara piꞌi dimbá to napiaraꞌ,
ngkáliꞌna riꞌi toSáráeliꞌ taunána Pueꞌ to nakádipurá.
Ia motadulakoiheꞌ taunáNa, pemuleꞌána Iako iti.
72 Daudiꞌ mokádipuráheꞌ hangko i kabulána laluna,
hai mapánde motadulakoiheꞌ.