Palindó i tempó masusa
77
I topoánti toponani. Mouláꞌ Iedutu.a Nanina Asaꞌ.
2 Meraruaꞌaꞌ i PUEꞌ Ala kupasimbuku,
bona pekakaengkuꞌ Napehádingi.
3 I tempóngkuꞌ mapári, mekakaeaꞌ i Hio membiáꞌ tulungi.
Hambengiá-ngiá tiꞌaraꞌaꞌ luleꞌ moángkáꞌ taengkuꞌ
mekakae i Hio, agáiáná lalungkuꞌ tiꞌara lindó.
4 Ane kubuhinao Pueꞌ Ala, mapári pehádingkuꞌ,
ane kupepekiri kamasusangkuꞌ, tiꞌara piꞌi ara pehárungángkuꞌ.
5 Pueꞌ, tiꞌaraꞌaꞌ Nupaliu letaꞌ káindi,
tiꞌara tinda lalungkuꞌ, álána tiꞌara piꞌi kuisá apa to ina kuꞌuliꞌ.
6 Kubuhinao apa to mewaliꞌ hangkoia,
pare-pare to marue miꞌi liu.
7 Tangaꞌ káindi, mampepekiriaꞌ oaꞌ,
hai mekuneꞌ-kuneꞌaꞌ i lalungkuꞌ:
8 “Ba Pueꞌ ina mosapuákaꞌangkaiꞌ haweꞌ i rue-ruena?
Ba tiꞌara piꞌi ina maroꞌa laluNa i kaiꞌ?
9 Ba tiꞌara piꞌi Ia mopatongawaꞌ kamaꞌahiꞌNa i kaiꞌ?
Ba tiꞌara piꞌi ina Ia mobukeki dándiNa haweꞌ i pemuleꞌángkiꞌ?
10 Ba nakáláliꞌá miꞌi Pueꞌ Ala mopatongawaꞌ kamaꞌahiꞌNa i kaiꞌ?
Ba kamabukoꞌNa melumbuꞌ hangko i kamaꞌahiꞌNa?”
11 Roo onoꞌ, kuꞌuliꞌ, “Deꞌe miꞌi to mopawioraꞌaꞌ:
To i Surugáꞌ tiꞌara piꞌi makuasaꞌ.
12 PUEꞌ, kuꞌundeꞌ mampekiri upu-upu to Nupopewaliꞌ miꞌi,
hai kubuhinao tandaꞌ-tandaꞌ kuasaꞌ to Nubábehi hangkoia.
13 Kuꞌundeꞌ mampepekiri upu-upu to Nubábehi
to maroꞌa ntepuꞌu.”
14 Ó Pueꞌ Ala, upu-upu ráráMu maroꞌa ntepuꞌu.
Ara paꞌi pueꞌ ntániꞌna to mahile tueꞌna,
nodo Pueꞌ Ala to kipenómbái?
15 Io miꞌi Pueꞌ Ala to mobábehi bábehiá to maroꞌa ntepuꞌu,
hai mopatongawaꞌ kuasaꞌMu
i oloꞌraꞌ tauna i duniáꞌ.
16 Ánti kamaróhóMu, Nukábáhámoheꞌ taunáMu,
iamoheꞌ pemuleꞌána Iako hai Iusupu.b
17 I kahaweꞌMu Pueꞌ Ala,
uwai moenggo-enggo,
mogalo riꞌi tahiꞌ to kaladu ntepuꞌu
moenggo-enggo ánti kamalááꞌna i Hio.
18 Gawu mampopendáulu udá,
gumpataꞌ meguru i langiꞌ,
kiláꞌ mombehangke-hangke.
19 Gumpataꞌ mopereꞌ masimbuku,
kiláꞌ mowangkaꞌi humalele duniáꞌ,
hai duniáꞌ moenggo-enggo.
20 MolumaoKoꞌ moliu i tahiꞌ,
agáiáná kadaꞌáMu tiꞌara ara.
21 Nuteteꞌheꞌ taunáMu moliu Musa hai Haruni,
nodo topoewu motuntungi dimbána.