Penangina Pueꞌ Ala hai pebutusiNa
76
I topoánti toponani. Rananika hai kasapi. Nani to nakáráhi Asaꞌ.
2 Upu-upu tauna i tampoꞌ Iudá moisá kaheánána Pueꞌ Ala,
hangaꞌNa rabiláꞌ i tampoꞌ Sáráeliꞌ.
3 KatoroꞌáNa i buluꞌ Sio,
bambaruꞌNa i Sale.a
4 Ionoꞌ Ia morupuꞌ upu-upu párewá pombeala,
tepasuaꞌ panaꞌ to pesigu, lábá hai pihoꞌ.
5 PeawaꞌMu melumbuꞌ hangko i peawaꞌna buluꞌ-buluꞌ
to ara miꞌi hangko i rungu-runguna.
6 Surudadoꞌ to pebáiꞌ rarámpákiheꞌ,
tiꞌarapoheꞌ pehádi,
hai upu-upu to keate
tiꞌara piꞌi ara róhóraꞌ.
7 Ó Pueꞌ Ala to napenómbái Iako,
ánti pekámbároáMu to rumihi,
mogalo riꞌi dárá pombeala hai toposaweꞌi,
upu-upuheꞌ mate.
8 Meriringkuꞌi mpuꞌuKoꞌ PUEꞌ.
Heáná paꞌi to nabuku mantaha i lindoꞌMu ane mabukoꞌKoꞌ?
9 Hangko i surugáꞌ Nupahaweꞌ pobutusiMu.
Upu-upu to i duniáꞌ malááꞌ hai maniiꞌ
10 i tempóMu mopahaweꞌ pobutusiMu,
hai mopelae tauna to rapopeahiahiꞌ i duniáꞌ.
11 Ó Pueꞌ Ala, Nupopewaliꞌheꞌ ewáliMu motóiáKoꞌ,
hai ewáliMu to mentárá mani ina menómbáheꞌ i Hio.
12 Modándimokou i Pueꞌ Ala PUEꞌmi,
hai nibukeki dándimi iti.
Hampóáꞌworia upu-upu tauna to toroꞌ hungkuꞌ i tampoꞌ Sáráeliꞌ,
ina mampeweꞌiheꞌ popenómbáraꞌ i PUEꞌ Ala
láwiꞌ Ia hintotoꞌ rapokalááꞌ.
13 Ia to mopakaledeꞌ róhóraꞌ tauna to mepárentá,
hai datu-datu i duniáꞌ malááꞌheꞌ i Hia.