Pueꞌ Ala mobutusi kara-kara tauna
75
I topoánti toponani. Mouláꞌ nani “Ineeꞌkoꞌ mopatuna.” Nani to nakáráhi Asaꞌ.
2 Ó Pueꞌ Ala, kitóiá hai kipomahileKoꞌ.
Kibámbári upu-upu to Nubábehi
láwiꞌ maroꞌa ntepuꞌu.
3 Nuꞌuliꞌ, “Kupakanótó miꞌi tempóNgkuꞌ ina mopáresáꞌ
hai mobutusi kara-kara i kanótó-nótóána.
4 Ane duniáꞌ ina magero hai upu-upu to i laluna ina maropuꞌ,
Kódóꞌ miꞌi to ina mopamaróhó peángkáꞌna áriꞌina.
5 Kuꞌuliꞌ i tauna to mampepemahile,
‘Ineeꞌmokoꞌ maꞌángkáꞌ,’
hai i tauna to kadake Kuꞌuliꞌ,
‘Ineeꞌmokoꞌ mohárungá kamaróhómu haduduámu.
6 Ineeꞌkoꞌ mehárungá ntepuꞌu i kamaróhómu haduduámu,a
hai ineeꞌmokoꞌ mohuwárá laluita to maꞌángkáꞌ.’ ”
7 Láwiꞌ to mobutusi kara-kara tauna, tiꞌara hangko i pembetoá alo,
tiꞌara hangko i katámpuá alo, hai tiꞌara woꞌo hangko i pádá loriꞌ,
8 agáiáná Pueꞌ Ala miꞌi to mobutusi kara-kara tauna.
Ia to mopakanótó to masalaꞌ hai to tiꞌara masalaꞌ.b
9 Kamabukoꞌna PUEꞌ nodo painuá
to bukeꞌ anggoroꞌ to rabuliꞌ hai mapaiꞌ.
Ia mobubuha óntóꞌna bona rainu
upu-upu tauna to kadake to ara i duniáꞌ
duuꞌna bangi painuáNa.
10 Agáiáná ina kubámbári oaꞌ
apa to nabábehi Pueꞌ Ala to napenómbái Iako,
hai ina kunanika nani petóiá haweꞌ i rue-ruena.
11 Ia ina mopatuna kamaróhóna tauna to kadake,
hai kamakuasaꞌna tauna to manótó ina Natámbái.