Nani petatangi ánti kamarugiꞌna Támbina Pueꞌ Ala i Ierusale
74
Nani pepaturoꞌ to nakáráhi Asaꞌ.
Ó Pueꞌ Ala, moapa riꞌi haneꞌiangkaiꞌ Nukálámbáhi?
Ba ina noꞌonoꞌ oaꞌ haweꞌ i rue-ruena?
Moapa riꞌi haneꞌi mabukoꞌKoꞌ i kaiꞌ taunáMu,
to nodomongkaiꞌ dimbá ewuáMu.
2 Kupembiáꞌ bona Nubuhinaoangkaiꞌ taunáMu
to Nupileꞌi hangkoia, hai Nukábáhá
bona mewaliꞌangkaiꞌ taunáMu haduduáMu.a
Kupembiáꞌ bona Nubuhinao buluꞌ Sio katoroꞌáMu.
3 Mai Nupeita katoroꞌá deꞌe to magero mani,
láwiꞌ ewálintaꞌ mogeromoheꞌ upu-upu
to i TámbiMu to magasaꞌ.
4 Mohoraꞌ-horaꞌheꞌ ánti penangiraꞌ
i katoroꞌá iumbá tauna menómbá i Hio.
Moꞌoreꞌheꞌ bánderá tandaꞌ penangiraꞌ.
5 Motiwiheꞌ áriꞌi TámbiMu
nodoheꞌ motiwi kau i lalu kakau.
6 Mopakeꞌheꞌ uwahe hai palu-palu
mopakarugiꞌ upu-upu pata to rabátiꞌ.
7 Mopakedáiheꞌ katoroꞌáMu,
mohunuheꞌ TámbiMu to magasaꞌ duuꞌna pumpu.
8 Rauliꞌ i laluraꞌ, “Ina tapopeahiahiꞌ mpiiꞌheꞌ upu-upu,”
haneꞌiheꞌ mohunu upu-upu katoroꞌá i tampoꞌkiꞌ
iumbá Pueꞌ Ala rapenómbái.
9 Tiꞌara piꞌi ara tandaꞌ kuasaꞌ,
hai nabiꞌ-nabiꞌ tiꞌarapoheꞌ ara.
Tiꞌara haweꞌ hadua i oloꞌkiꞌ to moisá
haweꞌ impirá pantódihángkiꞌ deꞌe.
10 Ó Pueꞌ Ala, hangapa mani kamaruena ewáliMu ina mopakóiꞌKoꞌ?
Ba ina motitibeiheꞌ hangaꞌMu haweꞌ i rue-ruena?
11 Moapa riꞌi haneꞌi Nudiiꞌ huleꞌ tae kuánáMu?
Tiꞌara piꞌi Nupakeꞌ kuasaꞌMu motulungiangkaiꞌ.
12 Mole riꞌi Io miꞌi Pueꞌ Ala, Datungkuꞌ hangko i rungu-runguna.
Io to mampelae tauna i duniáꞌ.
13 Ánti kamaróhóna kuasaꞌMu,
Io to mogááꞌ tahiꞌ mewaliꞌ ronggááꞌ,
hai morupuꞌ wuáꞌraꞌ naga to i lalu tahiꞌ.
14 Io miꞌi to morupuꞌ wuáꞌna Lewiata, naga to mahile,
hai mampeweꞌi wátána mewaliꞌ pandeꞌraꞌ
binataꞌ to toroꞌ i pádá loriꞌ.
15 Io miꞌi to mopatumbuꞌ hai mampopoili uwai.
Io miꞌi to mopabangi uwai to moili oaꞌ.
16 Io miꞌi to mokuasaꞌi mabaa hai káindi.
Io to mopakanótó kaꞌaraꞌána alo hai wulá.
17 Io miꞌi to mopakanótó parailiꞌ i duniáꞌ.
Io to mopakanótó tempó udá hai tempó alo.
18 Ó PUEꞌ, kupembiáꞌ bona Nubuhinao
noumbá ewáliMu mopakóiꞌKoꞌ,
hai tauna to tiꞌara mengkoruꞌ i Hio
to motitibeiheꞌ hangaꞌMu.
19 TaunáMu maledeꞌ nodo manggebodoꞌ.
Ineeꞌheꞌ Nupeweꞌi i taeraꞌ ewáliraꞌ to maseke,
hai taunáMu to rapopeahiahiꞌ, ineeꞌheꞌ Nukáláliꞌá haweꞌ i rue-ruena.
20 Kupembiáꞌ bona Nubuhinao oaꞌ pototowiMu,b
láwiꞌ iumbá-umbá peá i kakáindiána i duniáꞌ,
araheꞌ woꞌo ionoꞌ tauna to maseke.
21 Ineeꞌheꞌ Nupatodáhi tauna to rapopeahiahiꞌ
mosuliꞌ hai mahiliheꞌ.
Hampóáꞌworia tauna to meahiahiꞌ hai i wóiꞌ tueꞌraꞌ
ina motóiáKoꞌ.
22 Ó Pueꞌ Ala, kupembiáꞌ bona Nupatongawaꞌ i taunáMuheꞌ
katiꞌáráMu masalaꞌ.
Nubuhinao noumbá tauna to tiꞌara mengkoruꞌ i Hio
mopakóiꞌKoꞌ oaꞌ.
23 Ineeꞌ Nukáláliꞌá polaluitaraꞌ tauna to moewaꞌKoꞌ,
ba pohewo-heworaꞌ ewáliMu to mantámbái kamasimbukuna.