SURA KA-III
SURA PETÓIÁ 73–89
Kamasusa hai pehárungá
73
Nani to nakáráhi Asaꞌ.
Toꞌu ntepuꞌu, Pueꞌ Ala maroꞌa i toSáráeliꞌ taunáNa
to bulá laluraꞌ hai tiꞌara ara salaꞌiáraꞌ.
2 Agáiáná kódóꞌ, bata-bata lalungkuꞌ,
haneꞌi pepoináláingkuꞌ hungkuꞌ ina kukábáhá,
3 láwiꞌ ane moitaꞌaꞌ tauna to kadake molámbiꞌ rasiꞌ,
mahiniꞌaꞌ i tauna to mampepemahile iti.
4 Láwiꞌ tiꞌaraheꞌ mantódihá hakiꞌ,
wátáraꞌ maruduꞌ hai maróhó.
5 Tiꞌaraheꞌ narampe kapári
nodo to ralámbiꞌ tauna ntániꞌna.
6 Onoꞌ miꞌi haneꞌi maꞌángkáꞌheꞌ oaꞌ,
hai mampopempuaiheꞌ kamasekeraꞌ.
7 Mampekiri peheꞌ oaꞌ to kadake,
hai moliwoheꞌ oaꞌ mobábehi to kadake.
8 Metitibei hai mohuwáráheꞌ laluita to kadake.
Ánti kamaꞌángkáꞌraꞌ, mopáráráiheꞌ tauna
ina rapopeahiahiꞌ.
9 Motitibeiheꞌ Pueꞌ Ala to i surugáꞌ,
hai mohuwáráheꞌ laluita to maꞌángkáꞌ ntepuꞌu
i lindoꞌraꞌ tauna i duniáꞌ.
10 Onoꞌ miꞌi haneꞌi, mogalo riꞌi taunána Pueꞌ Ala
mampoinálái polaluitaraꞌ hai tediiꞌ laluraꞌ.
11 Tauna to kadake iti molaluitaheꞌ, rauliꞌ:
“Noumbá haneꞌi Pueꞌ Ala moisá apa to pewaliꞌ?
Ara paꞌi to naisá To i Surugáꞌ?”
12 Noꞌonoꞌ miꞌi tauna to kadake.
Morámpuheꞌ kapebuku hai góeꞌheꞌ oaꞌ.
13 Kupekiri, “Mbero-mbero peá kukámpái lalungkuꞌ
bona tiꞌaraꞌaꞌ mobábehi salaꞌ.
Tiꞌara ara bunduꞌna kukaraohi dósá.a
14 Láwiꞌ mantódiháꞌaꞌ oaꞌ kapári,
hai hampepulo-hampepulo Nuhukuaꞌ.”
15 Agáiáná kekuhuwárá laluita
nodo to rahuwárá tauna to kadake,
ketiꞌaraꞌaꞌ tetidaꞌ i taunáMuheꞌ.
16 Tempóngkuꞌ mampepekiri bona kuisá
moapa riꞌi haneꞌi tauna to kadake molámbiꞌ rasiꞌ,
hai tauna to mepoinálái molámbiꞌ rugiꞌ,
maꞌángkárá ntepuꞌu kuhádi.
17 Agáiáná i tempóngkuꞌ mesuaꞌ i lalu támbina Pueꞌ Ala,
kuisá miꞌi apa to ina mewaliꞌ
i tauna to kadake i alo bókóꞌna.
18 Bateꞌna Nupatoroꞌmoheꞌ i rárá to maleluru,
hai Nupatodáhiheꞌ manawoꞌ áláraꞌ marugiꞌ.
19 Hangkapira mata peá, ina tunaheꞌ.
Meriringkuꞌi ntepuꞌu kahópóꞌána tueꞌraꞌ tauna to kadake.
20 Ó Pueꞌ, ina Nurekeꞌheꞌ nodo to tiꞌara ara,
nodo peá paturu to tekáláliꞌá i tempó mearó.
21 Tempóna mapári kuhádi,
hai kóiꞌ inaongkuꞌ láwiꞌ mahiniꞌaꞌ i tauna to kadake,
22 nodoaꞌ tauna to bebe hai tiꞌara moisá apa-apa,
pekiringkuꞌ hibali peá hai binataꞌ i lindoꞌMu.
23 Agáiáná araꞌaꞌ oaꞌ hungkuꞌ i Hio,
hai motibaaꞌKoꞌ tae kuánángkuꞌ.
24 Nuteteꞌaꞌ hai paturoꞌMu,
hai i alo bókóꞌna, ina Nutarimaꞌaꞌ i lalu peawaꞌMu.
25 Heáná paꞌi to kuhárungá i surugáꞌ
i rawa hangko i Hio?
Tiꞌara ara to kuꞌundeꞌ i duniáꞌ,
bateꞌna peá Io.
26 Kehapiꞌ wátángkuꞌ hai pekiringkuꞌ maledeꞌ,
agáiáná Pueꞌ Ala peá to mampoweꞌiaꞌ róhó.
Ia peá to kuparaluu haweꞌ i rue-ruena.
27 Kuisá, bateꞌna tauna to karaoꞌ hangko i Hio ina mate.
Nupatunaheꞌ tauna to tiꞌara tetidaꞌ i Hio.
28 Agáiáná kódóꞌ, kuꞌundeꞌ ane hungkuꞌaꞌ i Pueꞌ Ala.
Mengkatueꞌaꞌ i Pueꞌ ALA,
bona peisáꞌaꞌ mobámbári hinángkáꞌna to Nabábehi.