Pekakae bona Pueꞌ Ala mowátiꞌ datu
72
Nanina Salomo.
Ó Pueꞌ Ala, kipembiáꞌ Nupaturoꞌ datungkiꞌ
bona ia peisá mobutusi mouláꞌ áturáMu.
Nupopewaliꞌ datungkiꞌ manótó hibali hai Io.
2 Kipekakaeá bona ia ina mobutusi kara-kara tauna i kanótó-nótóána,
noꞌonoꞌ woꞌo taunáMu to rapopeahiahiꞌ, ina nabutusi mouláꞌ áturáMu.
3 Hampóáꞌworia humalele tampoꞌkiꞌ ina bukeꞌ roꞌa ngkatueꞌ,
haweꞌ-haweꞌ i buluꞌ-buluꞌna, láwiꞌ taunáMu tueꞌ i lalu kamanótó.
4 Hampóáꞌworia datu ina mamperuruꞌi tauna to rapopeahiahiꞌ,
motulungi tauna to meahiahiꞌ,
hai mohuku tauna to mampopeahiahiꞌheꞌ.
5 Kipembiáꞌ bona datu hai pemuleꞌánaheꞌ
ina mepárentá oaꞌa haweꞌ i rue-ruena,
lántuꞌána ara mani alo hai wulá.
6 Hampóáꞌworia popárentána datu ina motulungi tauna
nodo udá to mopamaruduꞌ tampoꞌ hai tudaꞌ-tudaꞌ.
7 Hampóáꞌworia tauna ina mohádiá kamanótó hingkáꞌna datu mepárentá,
hai roꞌa ngkatueꞌ ina ara lántuꞌána ara mani wulá.
8 Kipekakaeá bona ia ina mepárentá
hangko i tahiꞌ to tándáꞌ i mata alo,
haweꞌ-haweꞌ i tahiꞌ Tangaꞌ to tándáꞌ i katámpuá alo,
hangko i uwai Epara,
haweꞌ-haweꞌ i wuntu duniáꞌ.
9 Hampóáꞌworia tauna to toroꞌ i pádá wungi
ina molingkudu motóngkóꞌ haweꞌ i tampoꞌ i lindoꞌna datu,
hai ewálinaheꞌ ina mengkoruꞌ i hia.
10 Hampóáꞌworia datu-datu hangko i Tarisi i Sapanio
hai puló-puló i tahiꞌ Tangaꞌ,
tepasuaꞌ datu-datu hangko i Sieba i tampoꞌ Áráꞌ
hai Seba i tampoꞌ Etiopia,
ina moántiheꞌ paraseeraꞌ i datu, tandaꞌ pebiláꞌraꞌ i hia.
11 Kihárungá upu-upu datu ina molingkuduheꞌ
motóngkóꞌ i lindoꞌna,
hai tauna i humalele duniáꞌ
ina mewaliꞌheꞌ topobágóꞌna.
12 Láwiꞌ ia ina mokábáhá tauna to meahiahiꞌ
to meraruaꞌ membiáꞌ tulungi i hia,
hai ia miꞌi to ina motulungi tauna to rapopeahiahiꞌ,
to tiꞌara ara to mampeámpáráiheꞌ.
13 Ia ina maꞌahiꞌ i tauna to i wóiꞌ tueꞌraꞌ,
hai to mapári tueꞌraꞌ, ina napelaeheꞌ hangko i kapate.
14 Datu ina mokábáháheꞌ hangko i kamasekeraꞌ
tauna to mepopeahiahiꞌ,
láwiꞌ ia mobiláꞌ katueꞌraꞌ taunána.
15 Hampóáꞌworia datu ina matinuwuꞌ!
Kihárungá ia ina molámbiꞌ buláwá hangko i tampoꞌ Seba!
Hampóáꞌworia ia rapekakaeá oaꞌ tauna,
bona nawátiꞌ Pueꞌ Ala.
16 Hampóáꞌworia ina ara handaꞌ pare i humalele tampoꞌ,
hai buluꞌ-buluꞌ bukeꞌ hai wuaꞌna powiáꞌraꞌ.
Hampóáꞌworia tampoꞌ ina maruduꞌ nodo kamaruduꞌna Libano,
hai pare tueꞌ nodo katueꞌna rumpuꞌ i pádá.
17 Hampóáꞌworia hangaꞌna ina ara oaꞌ,
ina raisá ntepuꞌu tauna lántuꞌána ara mani alo i langiꞌ.
Hampóáꞌworia tauna ina mokábelái hangaꞌna ane mewátiꞌ,
hai tauna i humalele duniáꞌ ina manguliꞌ
datu iti to nawátiꞌ Pueꞌ.
18 Tetóiá miꞌi PUEꞌ Ala to rapenómbái toSáráeliꞌ,
láwiꞌ Ia peá to mobábehi to maroꞌa ntepuꞌu.
19 Tetóiá miꞌi hangaꞌNa to meawaꞌ haweꞌ i rue-ruena.
Hampóáꞌworia humalele duniáꞌ ina bukeꞌ peawaꞌNa.
Noꞌonoꞌ miꞌi. Ami.
20 Eneꞌ miꞌi pekakaena Daudiꞌ ánáꞌna Isai.