Pekakaena tauna to matinuwuꞌ miꞌi
71
Ó PUEꞌ, mengkatueꞌaꞌ i Hio,ineeꞌaꞌ Nupaliu rapakahiliá.
2 Kupembiáꞌ bona Nupelae hai Nukábáháꞌaꞌ
láwiꞌ mampopolumaoKoꞌ oaꞌ to hintotoꞌ.
Nupehádingi hai Nutulungiaꞌ.
3 Nukámpáiaꞌ nodo watu to mahile
to mobóungángi tauna,
láwiꞌ Nupakanótó miꞌi ina mampelaeaꞌ.
Io miꞌi pengkatueꞌángkuꞌ hai pengkatiháláꞌángkuꞌ.
4 Ó Pueꞌ Ala to kupenómbái, Nukábáháꞌaꞌ
hangko i tauna to kadake.
Nukábáháꞌaꞌ hangko i kuasaꞌraꞌ tauna to maseke
hai tiꞌara moisá ahiꞌ.
5 Io Pueꞌ ALA pehárungáꞌángkuꞌ.
Mempaisareaꞌ i Hio hangko i kamaleheꞌkuꞌ.
6 Hangko i karakákáláꞌeáꞌángkuꞌ,
mopaisarengamoꞌ katueꞌkuꞌ i Hio,
hai Io to mokámpáiaꞌ
hangko i karapoánákaꞌángkuꞌ.
Onoꞌ miꞌi haneꞌi ina kutóiáKoꞌ oaꞌ.
7 Katueꞌkuꞌ nodo tandaꞌ to mehelei i tauna to handaꞌ,
láwiꞌ Io miꞌi pengkatueꞌángkuꞌ to maróhó.
8 Kuhuwárá oaꞌ petóiá i Hio,
hangaloá-loá kupolaluita peawaꞌMu.
9 Ineeꞌaꞌ Nukálámbáhi i tempó kasaeángkuꞌ,
hai ineeꞌaꞌ Nupálehi ane upu róhóngkuꞌ,
10 láwiꞌ ewálingkuꞌ mampolaluitaheꞌ
to kadake mokana i kódóꞌ,
hai himpuduheꞌ ina mopapateaꞌ.
11 Rauliꞌ, “Ia napálehi miꞌi Pueꞌ Ala!
Maikeꞌ, tadápáꞌ hai tahakaꞌ,
láwiꞌ tiꞌara ara to ina mampelae.”
12 Ó Pueꞌ Ala, ineeꞌKoꞌ karaoꞌ hangko i kódóꞌ.
Pueꞌ Ala to kupenómbái, kawiáꞌKoꞌ mai motulungiaꞌ.
13 Hampóáꞌworia tauna to moewaꞌaꞌ
Nupakahili hai Nupatunaheꞌ.
Kuhárungá tauna to mampoinao mopakarugiꞌaꞌ
molámbiꞌ pepakóiꞌ hai pesalaꞌi.
14 Agáiáná kódóꞌ, mehárungáꞌaꞌ oaꞌ i Hio,
hai ina kutóiáKoꞌ oaꞌ.
15 Ina kupodarita oaꞌ kamanótóMu,
hai noumbá ráráMu mampelae tauna,
kehapiꞌ tiꞌara peisá kuimbaꞌ.
16 Ó Pueꞌ ALA, maiaꞌ motóiáKoꞌ ánti kamakuasaꞌMu.
KupomahileKoꞌ ánti bábehiáMu to manótó,
láwiꞌ Io peá to bukeꞌ timbá.
17 Ó Pueꞌ Ala, Nupaturoꞌmoꞌ hangko i kamaleheꞌkuꞌ,
hai haweꞌ deꞌe-deꞌe, kupodarita oaꞌ apa to Nubábehi
láwiꞌ maroꞌa ntepuꞌu.
18 Noꞌonoꞌ woꞌo, kehapiꞌ saemoꞌ hai keubá miꞌi weluáꞌkuꞌ,
Ó Pueꞌ Ala, ineeꞌaꞌ Nupálehi,
bona kubámbári kamakuasaꞌMu
i tauna to tueꞌ deꞌe-deꞌe,
hai bábehiáMu to maroꞌa ntepuꞌu
i tauna to ina mesupaꞌ.
19 Ó Pueꞌ Ala, kamanótóMu mahile ntepuꞌu, haweꞌ i langiꞌ.
Upu-upu to Nubábehi maroꞌa ntepuꞌu.
Ó Pueꞌ Ala, heáná paꞌi to hibali hai Io?
20 Nupatodáhiaꞌ mantódihá kapári to rumihi,
agáiáná ina Nupakauriꞌ hai Nupopearóaꞌ huleꞌ
hangko i kapate.
21 Ina Nutámbái karabiláꞌkuꞌ,
hai ina Nupalindó wopaꞌaꞌ.
22 Ó Pueꞌ Ala to kupenómbái, ina kutóiáKoꞌ hai gambusuꞌ,
ánti katetidaꞌMu.
Ina kunanika nani petóiá i Hio hai kasapi,
Ó Pueꞌ Ala To Magasaꞌ to rapenómbái toSáráeliꞌ.
23 Ina mohoraꞌ-horaꞌaꞌ ánti kagóeꞌkuꞌ,
hai monaniaꞌ motóiáKoꞌ láwiꞌ Nukábáhámoꞌ.
24 Ina kubámbári oaꞌ bábehiáMu to manótó,
láwiꞌ tauna to mopári-pári ina mopakarugiꞌaꞌ
ranangimoheꞌ hai mahiliheꞌ.