Pekakae membiáꞌ tulungi
12
I topoánti toponani. Mouláꞌ nani “To Kaꞌuwalu”. Nani to nakáráhi Daudiꞌ.
2 PUEꞌ, Nutulungiangkaiꞌ
láwiꞌ tiꞌarapoheꞌ ara tauna to mengkoruꞌ i Hio,
tauna to tetidaꞌ tunamoheꞌ.
3 Upu-upu tauna mombedongkoki,
hai mombeákálángiheꞌ moliu laluita to maroꞌa.
4 Ó PUEꞌ, kupembiáꞌ bona Nupopengkaroo laluita penáráhiraꞌ,
noꞌonoꞌ woꞌo laluitaraꞌ to mopalóngká.
5 Rauliꞌ, “Moliu polaluitangkiꞌ,
kiꞌisá peisáꞌangkaiꞌ menangi.
Laluita apa peá peisá kihuwárá,
hai tiꞌara ara to peisá mokóntóangkaiꞌ.”
6 Agáiáná nauliꞌ PUEꞌ, “Ánti kamampopeahiahiꞌraꞌ tauna to i wóiꞌ tueꞌraꞌ,
hai peraruaꞌraꞌ tauna to mapári katueꞌraꞌ,
onoꞌ miꞌi haneꞌi deꞌe-deꞌe maiAꞌ
bona Kupelaeheꞌ nodo to rahárungá.”
7 Dándina PUEꞌ maróhó hai peisá rapoinálái,
nodo peráꞌ to rapamagasaꞌ hai api i lalu kawaliꞌ pitu kánina
duuꞌna mengkilaꞌ láwiꞌ tiꞌara piꞌi ara dáina.a
8-9 Iumbá-umbá peá kalaoáraꞌ tauna to kadake,
kakadakeraꞌ ratóiá tauna.
Agáiáná i Hio PUEꞌ, kipembiáꞌ bona Nupeámpáráiangkaiꞌ,
hai Nukámpáiangkaiꞌ hangko i tauna to kadake.