PUEꞌ Ia miꞌi pengkatueꞌá
11
I topoánti toponani. Nanina Daudiꞌ.
Mengkatueꞌaꞌ i PUEꞌ.
Moapa riꞌi haneꞌi pebáiꞌkou manguliꞌ i kódóꞌ,
“Melangkakoꞌ ngkaniiꞌ-niiꞌ lao mengkatueꞌ i buluꞌ
nodo tádáhi to membara.”
2 Tauna to kadake mopatimamaheꞌ panaꞌraꞌ, mopatakaꞌheꞌ kariri,
ina rapánáka hangko i pebuniáraꞌ i tauna to bulá laluraꞌ.
3 Ane áturá-áturá tauna tiꞌara piꞌi maróhó,
apa mani to peisá rabábehi tauna to manótó laluraꞌ?
4 Agáiáná PUEꞌ ara i Támbina to magasaꞌ,
hai Ia mepárentá hangko i pehodaꞌá kadatuáNa i surugáꞌ.
Ia mampetiro upu-upu tauna i duniáꞌ
hai mopáresáꞌ upu-upu to rabábehi.
5 PUEꞌ mopampeitai tauna, to manótó hai to kadake,
Ia mokáhihiꞌ tauna to moundeꞌ mobábehi to maseke.
6 Tauna to kadake ina Nahukuheꞌ hai pehuku to melááꞌ-lááꞌi,
ina Napopendáulu api, belerang, hai wui to maꞌámuꞌ ntepuꞌu.
7 Ina Nabábehi noꞌonoꞌ láwiꞌ PUEꞌ manótó,
Ia mampokaꞌahiꞌ tauna to mobábehi to maroꞌa.
Tauna to bulá laluraꞌ ina moita Pueꞌ.