10
Ó PUEꞌ, moapa riꞌi haneꞌiKoꞌ karaoꞌ,hai mebuniKoꞌ i tempóngkiꞌ masusa?
2 Tauna to kadake mampepemahile
haneꞌiheꞌ mopári-pári modápáꞌ tauna to i wóiꞌ tueꞌraꞌ.
Nupatodáhiheꞌ manawoꞌ ánti poliworaꞌ ina mebagiuꞌ.
3 Tauna to kadake mopalóngkáheꞌ ánti peundeꞌána laluraꞌ to kadake.
Tauna to melodoꞌ mokambo hai motitibeiheꞌ PUEꞌ.
4 Tauna to kadake iti tiꞌaraheꞌ moundeꞌ moisá Pueꞌ Ala.
Ánti kamaꞌángkáꞌraꞌ, rapekiri Pueꞌ Ala tiꞌara ara.
5 Upu-upu to rabábehi tauna to kadake, rapolámbiꞌi rasiꞌ,
tiꞌaraheꞌ moisá noumbá Pueꞌ Ala mohuku tauna,
hai mopakóiꞌheꞌ upu-upu ewáliraꞌ.
6 Rauliꞌ i laluraꞌ, “Upu-upu to kubábehi tiꞌara ina mbero-mbero,
hai tiꞌaraꞌaꞌ ina molámbiꞌ kapári haweꞌ i rue-ruena.”
7 Hira paka mekambo, mebagiuꞌ hai mepárárái.
Upu-upu laluitaraꞌ kadake hai bukeꞌ to mepakarugiꞌ.
8-9 Mebuniheꞌ i wánuá-wánuá,
bona mopapateheꞌ tauna to tiꞌara masalaꞌ,
nodo singá to mepegiá i lalu rumpuꞌ,
to moekáki tauna to maledeꞌ.
Molawaꞌheꞌ tauna to meahiahiꞌ i kalaheꞌána,
haneꞌi rahakaꞌ hai radiiꞌ soso.
10 Meropátiheꞌ hai mehakaꞌ.
Ánti kamaróhóraꞌ, tauna to maledeꞌ iti madámpá.
11 Rauliꞌ i laluraꞌ, “Pueꞌ Ala mokáláliꞌá miꞌi bábehiángkuꞌ,
tiꞌarapoꞌ Napehaileꞌ.
Tiꞌara ara to ina Napeita.”
12 MaimoKoꞌ PUEꞌ! Kupembiáꞌ i Hio, Pueꞌ Ala,
bona Nuhukuheꞌ tauna to kadake.
Ineeꞌ Nukáláliꞌá tauna to rapopeahiahiꞌ.
13 Moapa riꞌi haneꞌi tauna to kadake motitibei Pueꞌ Ala,
hai mampekiri, “Pueꞌ Ala tiꞌara ina membiáꞌ
bona mopangákuꞌaꞌ bábehiángkuꞌ.”
14 Agáiáná upu-upu iti Nuita.
Kamasusa hai kamapári Nupailalu
hai timamaKoꞌ ina metulungi.
Tauna to maledeꞌ mehárungáheꞌ i Hio,
Io to motulungi ánángkóiꞌ to ilu.
15 Hangaa-ngaa Nupopengkaroo kamakuasaꞌraꞌ tauna to kadake.
Nuhukuheꞌ tauna to madósá hai kadake,
duuꞌna tiꞌarapoheꞌ ara.
16 PUEꞌ Ia miꞌi Datu to mepárentá haweꞌ i rue-ruena.
Upu-upu tauna i duniáꞌ to tiꞌara mepoinálái,
ina Napatunaheꞌ hangko i tampoꞌNa.
17 Ó PUEꞌ, Nupehádingi peraruaꞌraꞌ tauna to rapopeahiahiꞌ,
Nupakaróhó laluraꞌ, hai Nupailalu pekakaeraꞌ.
18 Nuperuruꞌi ánángkóiꞌ to ilu hai tauna to rapopeahiahiꞌ,
bona tiꞌara piꞌi ara tauna to mampopalááꞌheꞌ.