Pueꞌ Ala mokámpái tauna to mehárungá i Hia
9
I topoánti toponani. Rananika mouláꞌ nani “Mut Laben.” Nani to nakáráhi Daudiꞌ.
2 Ina kutóiáKoꞌ PUEꞌ hangko i lalungkuꞌ ntepuꞌu,
hai ina kupolaluita hinángkáꞌna to Nubábehi
láwiꞌ maroꞌa ntepuꞌu.
3 Ina góeꞌ ntepuꞌuaꞌ ánti kaꞌIona,
hai ina kunanika nani petóiá,
motóiá hangaꞌMu, Pueꞌ Ala to i Surugáꞌ,
4 láwiꞌ ane mohidupaꞌKoꞌ hai ewálingkuꞌ, melangkaheꞌ mesuleꞌ,a
duuꞌraꞌ tepámbáká hai mate.
5 Upu-upu kara-karangkuꞌ Nupeámpárái
láwiꞌ Io mehodaKoꞌ i pehodaꞌá kadatuá,
hai upu-upu pobutusiMu hintotoꞌ.
6 Nuhukumoheꞌ tauna to tiꞌaraheꞌ moisáKoꞌ,
Nupatunamoheꞌ tauna to kadake;
hangaꞌraꞌ Nuwoe miꞌi duuꞌna i rue-ruena.
7 Ewálingkiꞌ upumoheꞌ maropuꞌ,
nodo kapumpuá támbu haweꞌ i rue-ruena.
Kótá-kótáraꞌ Nugero,
duuꞌna tiꞌara piꞌi ara to mambuhinaoheꞌ.
8 Agáiáná PUEꞌ mepárentá oaꞌ haweꞌ i rue-ruena.
Ia mehoda i pehodaꞌá kadatuáNa,
bona mobutusi kara-kara tauna.
9 Ia mohoda-hoda kara-kararaꞌ upu-upu tauna to i duniáꞌ
i katoꞌu-toꞌuána.
Ia mobutusi tauna hantina-hantina
i kabukeꞌ timbá.
10 PUEꞌ Ia miꞌi pengkatueꞌáraꞌ tauna to rapopeahiahiꞌ,
pengkatueꞌáraꞌ tauna tempóraꞌ mapári.
11 Tauna to moisáKoꞌ mehárungá i Hio PUEꞌ.
Tauna to membiáꞌ tulungi i Hio, tiꞌaraheꞌ ina Nupálehi.
12 Motóiákou PUEꞌ to mepárentá i Sio!
Nibámbári i humalele duniáꞌ apa to Nabábehi,
13 láwiꞌ Nabuhinaoheꞌ tauna to rapamapári,
hai peraruaꞌraꞌ tiꞌara ina Nakáláliꞌá.
Ia to mohuku tauna to mopapateheꞌ.
14 Ó PUEꞌ, Nupokaꞌahiꞌaꞌ wongkódóꞌá,
Nupeita peahiahiꞌkuꞌ to rabábehi tauna to mokáhihiꞌaꞌ.
Nukábáháꞌaꞌ hangko i babaꞌá kapate,
15 bona kutóiá upu-upu to Nubábehi,
hai góeꞌaꞌ motóiáKoꞌ i lindoꞌraꞌ tauna i babaꞌá buluꞌ Sio,
láwiꞌ Nupelaeaꞌ hangko i kapate.
16 Upu-upu tauna to tiꞌaraKoꞌ moisá,
manawoꞌheꞌ i taroboꞌ to rabábehi haduduáraꞌ,
bitiraꞌ kana heáꞌ to ratáꞌá haduduáraꞌ.
17 PUEꞌ mampopaisá kaheánáNa
láwiꞌ pobutusiNa manótó.
Tauna to kadake ina manawoꞌ ánti bábehiáraꞌ haduduáraꞌ.
18 Tauna to kadake ina laoheꞌ i duniáꞌraꞌ tomate,
iamoheꞌ upu-upu tauna to mokáláliꞌá Pueꞌ Ala.
19 Agáiáná tauna to i wóiꞌ tueꞌraꞌ
tiꞌara ina Nakáláliꞌá haweꞌ i rue-ruena,
hai pehárungáraꞌ tauna to rapopeahiahiꞌ
tiꞌara oaꞌ ina matántá.
20 Ó PUEꞌ, ineeꞌheꞌ Nupatodáhi tauna moewaꞌ pobutusiMu.
Tauna to hangko i tampoꞌ ntániꞌna to tiꞌaraKoꞌ moisá
hangaa-ngaa rabutusi i lindoꞌMu.
21 Ó PUEꞌ, kuhárungá ina Nupopewaliꞌheꞌ malááꞌ i Hio
duuꞌna tauna i duniáꞌ mopangákuꞌ, hira tauna biásá peheꞌ.