Pekakae membiáꞌ kahintimbá
7
Petatangina Daudiꞌ to nananika i PUEꞌ ánti bábehiána Kusi toBenami.
2 Ó Pueꞌ Ala PUEꞌkuꞌ, mengkatueꞌaꞌ i Hio.
Kupembiáꞌ bona Nupelaeaꞌ hai Nukábáháꞌaꞌ
hangko i upu-upu tauna to modápáꞌaꞌ.
3 Ineeꞌheꞌ Nupatodáhi nodo singá to ina mobentá támbólóngkuꞌ,
haneꞌiaꞌ radiiꞌ soso, hai tiꞌara ara to motulungiaꞌ.
4 Ó Pueꞌ Ala PUEꞌkuꞌ,
ane rápáꞌna mobábehiaꞌ bábehiá to salaꞌ,
5 hai mobábehiaꞌ to kadake i hángká rángángkuꞌ,
ba mopamarugiꞌaꞌ ewálingkuꞌ kehapiꞌ tiꞌara ara álásána,
6 Nupatodáhimoꞌ radápáꞌ, rahakaꞌ,
hai rakada-kada ewálingkuꞌ,
álána hangaꞌkuꞌ rapakanawoꞌ.
7 Ó PUEꞌ, kupembiáꞌ bona Nupopesuwuꞌ kamabukoꞌMu
moewaꞌ kamabukoꞌraꞌ ewálingkuꞌ.
Nupatongawaꞌ wongkódóꞌá i kódóꞌ petulungiMu,
láwiꞌ Io miꞌi topobutusi.
8 Hampóáꞌworia upu-upu tina i duniáꞌ
ina hirámpuheꞌ motolelingiKoꞌ.
Kupembiáꞌ bona Io PUEꞌ mopárentáheꞌ
hangko i pehodaꞌá kadatuáMu i surugáꞌ,
9 hai mohoda-hoda kara-kara upu-upu tina i duniáꞌ.
Kupembiáꞌ PUEꞌ, bona Nuhoda-hoda kara-karangkuꞌ hintotoꞌ hai kamanótóngkuꞌ,
láwiꞌ tiꞌaraꞌaꞌ masalaꞌ.
10 Kupembiáꞌ bona Nupopengkaroo bábehiáraꞌ tauna to kadake
hai Nupakaróhó laluraꞌ tauna to manótó,
láwiꞌ Io Pueꞌ Ala to bukeꞌ timbá,
to mopáresáꞌ pekiri hai laluraꞌ tauna.a
11 Pueꞌ Ala Ia miꞌi to mokámpáiaꞌ nodo lábá
hai mampelae tauna to mampeuláꞌi peundeꞌáNa.
12 Pueꞌ Ala Ia miꞌi topebutusi to manótó.
Hangalo-hangalo Pueꞌ Ala mopatongawaꞌ kamabukoꞌNa
i tauna to kadake bábehiáraꞌ.
13-14 Ane tiꞌaraheꞌ menosoꞌ hangko i bábehiáraꞌ,
Pueꞌ Ala ina mopatimama párewá pombeala.
PihoꞌNa ina Napamataru, hai ina mopatakaꞌ kariri i panaꞌNa,
haneꞌi mata panaꞌNa ina Nabábehi bona moapi.
15 Peita tauna to kadake poliwona.
Ia mobábehi to kadake hai mebagiuꞌ.
16 Ia nodo tauna to mokae taroboꞌ bona ara to manawoꞌ,
mole riꞌi ia haduduána to manawoꞌ i laluna.
17 Ánti bábehiána to kadake, ia haduduána molámbiꞌ rugiꞌ,
hai kamasekena mopamapári wátána haduduána.
18 Kuꞌuliꞌ handaꞌ kamaroꞌana i PUEꞌ láwiꞌ Ia bukeꞌ timbá,
hai ina monaniaꞌ motóiá hangaꞌna PUEꞌ Ala to i Surugáꞌ.