Pekakae i lalu kamasusa
6
I topoánti toponani. Rananika hai kasapi mouláꞌ nani “To Kaꞌuwalu”. Nani to nakáráhi Daudiꞌ.
2 Ó PUEꞌ, ineeꞌaꞌ Nukámbáróá,
hai ineeꞌaꞌ Nuhuku ánti kamabukoꞌMu.
3 Nupokaꞌahiꞌaꞌ PUEꞌ, láwiꞌ upu róhóngkuꞌ.
Nupakauriꞌaꞌ PUEꞌ, láwiꞌ mahái wátángkuꞌ.
4 Masusa lalungkuꞌ.
Ó PUEꞌ, hangapa mani kamaruena Nupálehiaꞌ?
5 Ó PUEꞌ, Nupeitaꞌaꞌ wongkódóꞌá hai Nupelaeaꞌ hangko i kapate.
Nutulungiaꞌ hiolaꞌ hai kamaꞌahiꞌMu to tiꞌara madepuꞌ-depuꞌ,
6 láwiꞌ ane matemongkaiꞌ, tiꞌara piꞌi ara to mambuhinaoKoꞌ,
tiꞌara ara to motóiáKoꞌ i duniáꞌraꞌ to mate.
7 Maledeꞌaꞌ láwiꞌ meraruaꞌaꞌ oaꞌ.
Hambengi-hambengi uwai mátángkuꞌ tiꞌara mengkaroo
moloeꞌi paturuángkuꞌ.
8 Peitángkuꞌ piróꞌ ánti kawiorangkuꞌ,
mátángkuꞌ mowáá-wáá ánti ewálingkuꞌheꞌ.
9 Pohuꞌmokou tauna to kadake,
láwiꞌ PUEꞌ mampehádingi miꞌi kateriaꞌkuꞌ.
10 PUEꞌ mampehádingi miꞌi pembiáꞌkuꞌ,
hai pekakaengkuꞌ Natarima miꞌi.
11 Upu-upu ewálingkuꞌ ina rapotingkáráꞌ hai rapokahili,
hai ina mesuleꞌheꞌ ánti kahiliáraꞌ.