Pekakae membiáꞌ tulungi
5
I topoánti toponani. Nani to nakáráhi Daudiꞌ bona rananika hai tulali.
2 Ó PUEꞌ, Nupehádingi laluitangkuꞌ,
hai Nupailalu peraruaꞌkuꞌ.
3 Ó Pueꞌ Ala Datungkuꞌ,
Nupehádingi peraruaꞌkuꞌ membiáꞌ tulungi,
láwiꞌ i Hio peaꞌ mekakae.
4 Ó PUEꞌ, mepulo-pulo mekakaeaꞌ i Hio
hai Nupehádingi pembiáꞌkuꞌ.
Mepulo-pulo mohuhuꞌaꞌ popenómbángkuꞌa i Hio
hai kupegiá pehániꞌMu.
5 Ó Pueꞌ Ala, tiꞌara Nuꞌundeꞌ to kadake.
Tauna to mobábehi to kadake, tiꞌaraheꞌ ina Nutarima.
6 Tiꞌara Nupaliu tauna to mampepemahile mohungkukiKoꞌ.
Nukáhihiꞌ tauna to mobábehi to kadake.
7 Nuropuꞌheꞌ tauna to paka modongkoꞌ.
Nukaraohi tauna to moundeꞌ meákálángi hai to mepapate.
8 Agáiáná ánti kamahilena ahiꞌMu i kódóꞌ,
peisáꞌaꞌ mesuaꞌ i lalu támbiMu.
Molingkuduaꞌ melindoꞌ i támbiMu to magasaꞌ
hai menómbáꞌaꞌ i Hio hangko i lalungkuꞌ ntepuꞌu.
9 Ó PUEꞌ, kupembiáꞌ bona Nutulungiaꞌ mampeuláꞌi peundeꞌáMu
ánti kaꞌárána ewálingkuꞌ,
hai Nutudeꞌáꞌaꞌ rárá to hangaa-ngaa kuꞌuláꞌ.
10 Tiꞌara haweꞌ hambuaꞌ laluitaraꞌ ewálingkuꞌ to peisá rapoinálái,
raundeꞌ peá mopakarugiꞌ tauna.
Polaluitaraꞌ mopamalulu laluraꞌ tauna,
mole riꞌi tunggáiáraꞌ kadake nodo to moánti kapate.
11 Ó Pueꞌ Ala, kupembiáꞌ bona Nupatongawaꞌ kamasalaꞌraꞌ.
Nupatodáhiheꞌ hulakaꞌ ánti poliworaꞌ haduduáraꞌ.
Nuwuraheꞌ láwiꞌ handaꞌ dósáraꞌ moewaꞌKoꞌ.
12 Agáiáná tauna to mopaisarenga katueꞌraꞌ i Hio ina góeꞌheꞌ.
Ina monani-naniheꞌ oaꞌ, láwiꞌ Io to mokámpáiheꞌ.
Hampóáꞌworia upu-upu tauna to mampokaꞌahiꞌKoꞌ,
góeꞌheꞌ ánti kaꞌIona miꞌi Pueꞌ Alaraꞌ.
13 Ó PUEꞌ, Io miꞌi to mowátiꞌheꞌ tauna to manótó,
Nukámpáiheꞌ hai kamaroꞌaMu to nodo lábá.