Pekakae káindi
4
I topoánti toponani. Rananika hai kasapi. Nani to nakáráhi Daudiꞌ.
2 Ó Pueꞌ Ala to mopakanótó katiꞌárángkuꞌ masalaꞌ,
ane mekióꞌaꞌ i Hio, kupembiáꞌ bona Nuhánikiaꞌ.
I tempóngkuꞌ masusa, Nukábáháꞌaꞌ.
Kupembiáꞌ bona Nupokaꞌahiꞌaꞌ wongkódóꞌá,
hai Nupehádingi pekakaengkuꞌ deꞌe.
3 Ee tauna, hangapa mani kamaruemi mopakadake hangaꞌkuꞌ?
Hangapa mani kamaruena niundeꞌ to mbero-mbero,
hai modongkoꞌkou oaꞌ.
4 Bona niꞌisá, PUEꞌ mopileꞌi miꞌi tauna to tetidaꞌ i Hiaa mewaliꞌ taunáNa.
Napehádingiaꞌ ane mekióꞌaꞌ i Hia.
5 Ane mabukoꞌkou, ineeꞌ nipatodáhi bukoꞌmi iti
moántikou i lalu dósá.b
I tempómi maturu-turu, nipepekiri maroꞌa,
hai maniiꞌ-niiꞌ pekou.
6 Nihuhuꞌ miꞌi popenómbá to hintotoꞌ,
hai mepoináláimokou i PUEꞌ.
7 Handaꞌ tauna to mekuneꞌ,
“Heáná to ina mopatongawaꞌákeꞌ to maroꞌa?”
Hampóáꞌworia Nupokagóeꞌaꞌ PUEꞌ.
8 Io to mopagóeꞌ lalungkuꞌ
melumbuꞌ hangko i tauna
to handaꞌ ntepuꞌu pare hai anggoroꞌ.
9 Mewaliꞌ maturuaꞌ hai maroꞌa kaletaꞌkuꞌ,
láwiꞌ Io peá PUEꞌ to mampoweꞌiaꞌ katinda lalu.