Penangiraꞌ toIahudiꞌ
9
Haweꞌ mpuꞌu miꞌi alo to tepakanótó,
imbaꞌna hampuloꞌ hai tálu wulá kahampuloꞌ hai duá to rauliꞌ wulá Adara,a
alo to rapakanótó miꞌi ina mampopolumao hawaꞌna datu,
ia miꞌi ina mopapateheꞌ upu-upu toIahudiꞌ.
Alo iti rapepegiá miꞌi ewáliraꞌ toIahudiꞌ to ina mokuasaꞌiheꞌ.
Mole riꞌi katongawaꞌána,
toIahudiꞌraheꞌ to menangi.
2 I upu-upu kótá,
upu-upu toIahudiꞌ hirámpumoheꞌ bona moewaꞌ tauna to ina mopatunaheꞌ.
Onoꞌ miꞌi haneꞌi tauna iumbá-umbá peá mewaliꞌheꞌ malááꞌ i toIahudiꞌ.
Mewaliꞌ tiꞌara ara haweꞌ hadua to pebáiꞌ meꞌewaꞌ.
3 Mogaloraheꞌ to mapángkáꞌ lántiꞌraꞌ i poropensi,
upu-upu topopárentá to motibaaꞌ poropensi,
biti mágáuꞌ,
hai to mobágóꞌ i kadatuá,
moróhóngiheꞌ toIahudiꞌ láwiꞌ malááꞌheꞌ i Modekai.
4 Ánti kamakuasaꞌna ntepuꞌu Modekai i lalu kadatuá,
tebámbári ntepuꞌu hangaꞌna.
Hai kuasaꞌna iti katetetámbáiá oaꞌ.
5 Onoꞌ miꞌi haneꞌi upu-upu toIahudiꞌ peisáheꞌ mobábehi apa peá mouláꞌ peundeꞌáraꞌ i ewáliraꞌ,
hai mopapateheꞌ ewáliraꞌ hai pihoꞌ.
6 I bente Susana pehodaꞌána kadatuá,
toIahudiꞌ mopapateheꞌ ewáliraꞌ kahandaꞌna lima áturaꞌ.
7-10 I oloꞌraꞌ to rapapate iti,
telámbiꞌheꞌ hampuloꞌ ánáꞌna Haman ánáꞌna Hamedata ewáliraꞌ toIahudiꞌ.
Hangaꞌraꞌ ánáꞌna iti iamoheꞌ:
Pasadata,
Dapo,
Asapata,
Porata,
Adalia,
Aridata,
Paramasata,
Arisai,
Aridai,
hai Waisata.
Agáiáná toIahudiꞌ tiꞌaraheꞌ morámpáki párewáraꞌ tauna to rapapate.b
11 Alo iti woꞌo tauna mopahaweꞌ i datu kahandaꞌraꞌ tauna to rapapate i bente Susana.
12 Molaluita miꞌi datu Ahasiwero i Eteꞌ,
nauliꞌ,
“I bente Susana peá,
toIahudiꞌ mopapate lima átuna tauna,
tepasuaꞌmoheꞌ ánáꞌna Haman to hampuloꞌ,
apa mani i upu-upu poropensi!
Tiꞌara mani kuisá apa to rabábehi toIahudiꞌ ionoꞌ.
Mewaliꞌ apa mani to ina nupembiáꞌ?
Uliꞌ peá hai bateꞌna ina kuweꞌikoꞌ.”
13 Nahániki Eteꞌ,
“Ane nupomaroꞌai datu,
maroꞌa miꞌi toIahudiꞌ to toroꞌ i kótá Susana deꞌe napaliuheꞌ datu bona kahalo mopaliliuheꞌ apa to rabábehi i alo dehangaloá,
hai wátámandoꞌraꞌ ánáꞌna Haman ratóeheꞌ i kau petóeá.”
14 Hangko ionoꞌ,
datu mampopesuwuꞌ wopiꞌi párentá bona mampopolumaoheꞌ pembiáꞌna Eteꞌ.
Hira ara woꞌo sura párentá to rapopesuwuꞌ i kótá Susana bona ánáꞌna Haman to hampuloꞌ ratóeheꞌ.
15 Mewaliꞌ i imbaꞌna hampuloꞌ hai iba wulá Adarac upu-upu toIahudiꞌ to toroꞌheꞌ i kótá Susana hirámpuheꞌ huleꞌ.
Hai i alo iti mopapateheꞌ tálu áturaꞌ ewáliraꞌ hai tempó onoꞌ woꞌo tiꞌaraheꞌ morámpáki párewáraꞌ.
16 ToIahudiꞌ to toroꞌ i upu-upu poropensi,
hirámpuheꞌ bona mampetawaꞌiheꞌ katueꞌraꞌ.
Pombealaraꞌ i alo iti,
mopapateheꞌ ewáliraꞌ kahandaꞌna pitu puloꞌna hai lima sáburaꞌ tauna to mokáhihiꞌheꞌ.
Agáiáná párewáraꞌ tiꞌaranto raperampaꞌi.
17 To pewaliꞌ iti,
mewaliꞌ i imbaꞌna hampuloꞌ hai tálu wulá Adara.
Kahalona imbaꞌna hampuloꞌ hai iba,
tiꞌara piꞌi ara haweꞌ hadua to rapapate,
ngkáliꞌna riꞌi alo iti mopaꞌaraheꞌ susa kagóeꞌ.
18 Agáiáná toIahudiꞌ to ara i kótá Susana mopaꞌaraheꞌ susa mahile i imbaꞌna hampuloꞌ hai lima,
láwiꞌ roomoheꞌ mopapate ewáliraꞌ i imbaꞌna hampuloꞌ hai tálu hai hampuloꞌ hai iba,
hai mengkarooheꞌ i imbaꞌna hampuloꞌ hai lima.d
19 Onoꞌ miꞌi haneꞌi haweꞌ deꞌe-deꞌe toIahudiꞌ to toroꞌheꞌ i wánuá-wánuá to kókóiꞌ mamposusaiheꞌ imbaꞌna hampuloꞌ hai iba.
Alo iti mewaliꞌ alo mahile kagóeꞌ,
hai i posusa iti momberórá-róráheꞌ.
Popakanótóá alo posusa Puri
20 Roo onoꞌ,
Modekai moukiꞌ upu-upu daritakáná apa to pewaliꞌ iti,
haneꞌi napakatu i upu-upu toIahudiꞌ to i kadatuá Peresia,
maroꞌa to karaoꞌ maroꞌa to hungkuꞌ.
21 Naukiꞌ daritakáná iti bona i pare-parena mamposusaiheꞌ imbaꞌna hampuloꞌ hai iba hai imbaꞌna hampuloꞌ hai lima wulá Adara,
22 láwiꞌ i rongalo iti,
hira monangimoheꞌ ewáliraꞌ,
hai kamapárina katueꞌraꞌ menggoli mewaliꞌ kagóeꞌ-góeꞌ.
Onoꞌ miꞌi haneꞌi alo to rongalo iti raposusai ntepuꞌu,
hai i tempóraꞌ mandeꞌ sangkani,
hangaa-ngaa momberóráheꞌ hai mampegáláꞌáheꞌ párewá i tauna to meahiahiꞌ tueꞌraꞌ.
23 ToIahudiꞌ mampeuláꞌi ntepuꞌuheꞌ párentána Modekai iti,
hai posusa iti mewaliꞌ ádá kabiásáꞌáraꞌ i pare-parena.
24 Mewaliꞌ i posusáraꞌ iti,
mampambuhinaoiheꞌ tempóna Haman ánáꞌna Hamedata muleꞌna Agaꞌ ewali mahileraꞌ upu-upu toIahudiꞌ mobolobiaꞌ miꞌi impirá tempóna kaꞌina rapatunaraꞌ toIahudiꞌ.
Mouláꞌ básáraꞌ toPeresia,
motendeheꞌ “Pur”.
25 Agáiáná kanapahaweꞌna Eteꞌ i Datu Ahasiwero,
Haman miꞌi to moliwo to tiꞌara maroꞌa i toIahudiꞌ,
napehawaꞌá miꞌi datu bona raukiꞌ sura párentá,
bona poliwona Haman ina mopatuna toIahudiꞌ iti rapopasuleꞌ i hia.
Onoꞌ miꞌi haneꞌi Haman hai hampuloꞌ ánáꞌna tobaleilo ratóeheꞌ i kau petóeá.
26 Mewaliꞌ alo to rongalo iti rauliꞌ Alo Posusa Mahile Purim,
láwiꞌ mambuhinaoheꞌ alo karatendena pur,e
to mopakanótó tempó kaꞌina rapatunaraꞌ toIahudiꞌ.
Mewaliꞌ,
ánti óntóꞌna surana Modekai iti,
hai ánti upu-upuna to mewaliꞌ miꞌi i toIahudiꞌ,
27 iti mewaliꞌ ádáraꞌ toIahudiꞌ duuꞌna haweꞌ i pemuleꞌáraꞌ hai upu-upu tauna to ina mesuaꞌ i toIahudiꞌ.
I pare-parena hangaa-ngaa mamposusaiheꞌ oaꞌ alo to napakanótó miꞌi Modekai.
28 Rapakanótó woꞌo haweꞌ i rue-ruena,
alo karabolobiaꞌna miꞌi mopakanótó tempó kaꞌina rapatunaraꞌ toIahudiꞌ,
hangaa-ngaa rabuhinao hantámbi-hantámbi hai raposusai oaꞌ haweꞌ-haweꞌ i pemuleꞌáraꞌ i upu-upu poropensi hai i upu-upu kótá.
29 I rawa surana Modekai,
Eteꞌ datu towawine ánáꞌna Abihai moukiꞌ woꞌo sura moliu hangaꞌna datu moróhóngi surana Modekai mokana i alo Purim.
30 Sura iti rapakatu i upu-upu toIahudiꞌ to ara i hangatu rompuloꞌ hai pitu poropensi i kadatuá Peresia.
I lalu sura iti raukiꞌ woꞌo tabeá bona toIahudiꞌ araheꞌ oaꞌ i katinda lalu hai bona tiꞌaraheꞌ moapa-apa.
31 I lalu sura iti raukiꞌ bona alo karabolobiaꞌna miꞌi tempó kaꞌina rapatunaraꞌ hangaa-ngaa raposusai i tempó to rapakanótó miꞌi iti,
nodo kamambuhinaoraꞌ kamopuasaꞌraꞌ hai kamapárina katueꞌraꞌ.
Onoꞌ miꞌi óntóꞌ surana Modekai hai Eteꞌ datu towawine.
32 Noꞌonoꞌ miꞌi párentána Eteꞌ mopakátidi hawaꞌ mokana i alo Puri.
Upu-upuna iti raukiꞌ i lalu sura daritakáná.