Iako ratawu
50
Iusupu mopalumbá i wátána umána moteriahi haneꞌi moángki lindoꞌna umána.a
2 Roo onoꞌ,
nakióꞌmoheꞌ topobágóꞌna to moisá ntepuꞌu morampaꞌi wátámandoꞌ bona tiꞌara poloꞌ magoro,
hai nahuoꞌheꞌ morampaꞌi wátámandoꞌna umána.
3 Bágóꞌ iti moparaluu tempó iba puloꞌna alona.
Hai toMásiriꞌ moꞌomboꞌ kamatena Iako pitu puloꞌna alona kamaruena.b
4 Hópóꞌ miꞌi omboꞌ,
Iusupu membiáꞌ i topobágóꞌna Piraoꞌ bona mopahaweꞌheꞌ tewáina i Piraoꞌ node:
5 “Hangko tiꞌara mani mate umángkuꞌ,
nahuoꞌaꞌ modándi bona kutawu wátána i popatawuá to rapatimama miꞌi i tampoꞌ Kánáꞌá.
Onoꞌ miꞌi haneꞌi kupembiáꞌ i kitaꞌ bona teweꞌiaꞌ tempó lao mopatawu umángkuꞌ.
Roo onoꞌ,
ina mesuleꞌaꞌ huleꞌ.”
6 Mehániꞌ Piraoꞌ,
“Peisánto.
Laomokoꞌ mopatawu umámu hiolaꞌ hai dándimu i hia.”
7 Lao mpuꞌu miꞌi Iusupu mopatawu umána.
Upu-upu topobágóꞌna Piraoꞌ,
totosae i támbina,
hai upu-upu totosae to ara i tampoꞌ Másiriꞌ,
laoheꞌ woꞌo mamporángá Iusupu.
8 Hantámbiánaheꞌ hai upu-upu halaluna,
hai upu-upu tauna to ara i támbina umána,
laoheꞌ woꞌo.
Bateꞌna perái ánáꞌraꞌ hai binataꞌraꞌ to rapálehi i roboꞌ Gose.
9 Surudadoꞌ to mokereta hai to modárá laoheꞌ woꞌo.
Onoꞌ miꞌi haneꞌi handaꞌ ntepuꞌuheꞌ to meuláꞌ i hia.
10 Haweꞌmoheꞌ i katoroꞌáraꞌ toporánáꞌ pare i Gore-Haꞌataꞌ hungkuꞌ i uwai Iarade,
metatangiheꞌ upu-upu.
Ionoꞌ Iusupu moꞌomboꞌ mani umána pitu alona pitu wengina.
11 Karaitáraꞌ pueꞌ wánuá toKánáꞌá,
rauliꞌ,
“Mewiwiorai mpuꞌu omboꞌraꞌ toMásiriꞌ iti.”
Onoꞌ miꞌi haneꞌi katoroꞌá iti rahangaꞌ Abeleꞌ-Misirai.c
12 Mewaliꞌ,
rabábehi mpuꞌumoheꞌ ánáꞌna Iako apa to naꞌawiliáheꞌ:
13 wátámandoꞌna raꞌánti huleꞌ lao i tampoꞌ Kánáꞌá hai ratawu i balamba watu i hinoe Mapela.
Balamba iti tándáꞌ i mata alo i wánuá Mamere,
i tampoꞌ to nahóló Burahima hangkoia i Epero toHeti,
bona rapopewaliꞌ popatawuá.
14 Upu miꞌi Iusupu mopatawu umána,
mesuleꞌmoheꞌ lao i tampoꞌ Másiriꞌ hingkakani hai halaluna hai upu-upu tauna to meuláꞌ.
Iusupu mopalindó laluraꞌ wutuꞌnaheꞌ
15 Láwiꞌ mate miꞌi umáraꞌ,
halaluna Iusupu malááꞌmoheꞌ haneꞌi molaluitaheꞌ hadua hai hadua,
rauliꞌ,
“Noumbámokeꞌ ane rápáꞌna Iusupu mopailalukeꞌ hai naháwángi bábehiántaꞌ to kadake i hia hangkoia?”
16 Onoꞌ miꞌi haneꞌi rapakatu miꞌi laluita i Iusupu to node:
“Hangko tiꞌara mani mate umámu,
17 nahuoꞌmongkaiꞌ bona kipahaweꞌ pembiáꞌna deꞌe i hio,
‘Nuámpungi miꞌi kamasalaꞌraꞌ wutuꞌmu i hio.’
Mewaliꞌ kaiꞌ deꞌe,
hawiꞌnaꞌangkaiꞌ woꞌo Pueꞌ Ala to napenómbái umántaꞌ,
kipembiáꞌ wongkaiꞌkaa bona ineeꞌ nupailalu salaꞌ to kibábehi i hio hangkoia.”
Kanahádina Iusupu laluitaraꞌ iti,
ia teriaꞌ.d
18 Roo onoꞌ,
laomoheꞌ halaluna upu-upu mopalumbá i bitina,
rauliꞌ,
“Kaiꞌ deꞌe hawiꞌmu.”
19 Agáiáná nauliꞌ Iusupu i hira,
“Ineeꞌmokou malááꞌ.
Kuasaꞌkuꞌ tiꞌara hibali hai kuasaꞌna Pueꞌ Ala.
20 Kehapiꞌ nitunggái mobábehi to kadake i kódóꞌ,
Pueꞌ Ala ara tunggáiáNa to maroꞌa.
Apa to mewaliꞌ miꞌi hangkoia,
mewaliꞌ ráráNa mopatueꞌ tauna to handaꞌ.
21 Mewaliꞌ ineeꞌmokou malááꞌ i kódóꞌ láwiꞌ ina kupatimama hinángkáꞌ to niparaluu haweꞌ-haweꞌ i ánáꞌmi.”
Noꞌonoꞌ miꞌi Iusupu mopatinda hai mopalindó laluraꞌ halaluna.
Kamatena Iusupu
22 Iusupu hai halaluna toroꞌheꞌ hingkakani i tampoꞌ Másiriꞌ.
I kamatena Iusupu,
tinuwuꞌna hangatu miꞌi hai hampuloꞌ parena.
23 Hangko tiꞌara mani mate,
nampakaꞌ mani moita ánáꞌna hai ueꞌna Eparai.
Nampakaꞌ mani woꞌo moita ánáꞌna Maki,e
ia miꞌi ueꞌna Manase.
Ánáꞌnaheꞌ Maki napoánáꞌ Iusupu.
24 Hangko tiꞌara mani mate,
nahángáꞌáheꞌ halaluna,
“Tiꞌara piꞌi marue ina matemoꞌ,
agáiáná Pueꞌ Ala ina mokádipurákou oaꞌ hai moántikou hangko i tampoꞌ deꞌe lao i tampoꞌ to Nadándi i Burahima,
Isakiꞌ hai Iako.f
25 Hangaa-ngaa modándikou i kódóꞌ.
Ane naporángákou Pueꞌ Ala mesuleꞌ lao i tampoꞌ Kánáꞌá,
hangaa-ngaa niánti woꞌo wátámandoꞌkuꞌ.”g
26 Magáná miꞌi tinuwuꞌna hangatu hai hampuloꞌ parena,
mate miꞌi Iusupu.
Wátámandoꞌna rarampaꞌi hai rawoli i lalu lómu i tampoꞌ Másiriꞌ.