Peawilina Iako to kahópóꞌána
49
Roo onoꞌ,
Iako mokióꞌheꞌ ánáꞌna haneꞌi nauliꞌ,
“Mengkahungkuꞌmokou mai,
ina kupopaisáꞌámokou apa to ina mewaliꞌ i kómu i tempó to ina haweꞌ.
2 Ánáꞌnakou Iako,
moromu-romukou hai nipehádingi.
Nipehádingi maroꞌa laluitana Sáráeliꞌa umámi.
3 Rube ánáꞌkuꞌ to towutuꞌ,
róhóngkuꞌ tongawaꞌ miꞌi i wátámu;
io miꞌi ánáꞌkuꞌ to towutuꞌ,
to mesupaꞌ tangaꞌkuꞌ mani maróhó.
Mouláꞌ katowutuꞌmu,
io miꞌi to teádái hai to makuasaꞌ.
4 Agáiáná io nodo pekoꞌ uwai to rumihi pokalena,
láwiꞌ tiꞌara nubuku momeeꞌ peundeꞌána lalumu.
Mewaliꞌ tiꞌarapokoꞌ rarekeꞌ to teádái i oloꞌraꞌ halalumu,
láwiꞌ nupoiluhi hadua towawinengkuꞌ to kukarodua;b
mepakahiliá mpuꞌukoꞌ.
5 Simeoꞌ hai Lewi topohalaluheꞌ,
to mopakeꞌheꞌ pihoꞌ bona mepakarugiꞌ.c
6 Tiꞌara ina kuꞌuláꞌ pobutusiraꞌ;
tiꞌaraheꞌ woꞌo ina kuporángá i poromu-romuáraꞌ,
láwiꞌ ánti kamasekeraꞌ,
mepapateheꞌ,
hai ánti kamasilakaraꞌ,
motimpóheꞌ gapiꞌ to maróhó.
7 Hárárámoheꞌ,
láwiꞌ rumihi ntepuꞌu kamasodoraꞌ.
Hárárámoheꞌ,
láwiꞌ rumihi kamasekeraꞌ.d
Ina kupopogááꞌ-gááꞌheꞌ i humalele tampoꞌ Sáráeliꞌ;
Ina kupamahawuꞌheꞌ i oloꞌraꞌ upu-upu tinána Iako.e
8 Iudá,
io ina monangikoꞌ ewálimu.
Halalumuheꞌ ina motóiákoꞌ,f
hai ina motóngkóꞌheꞌ i lindoꞌmu.
9 Ó Iudá,
io nodo hambaꞌa singág to maleheꞌ mani,
to mohakaꞌ miꞌi binataꞌ to ina naꞌandeꞌ,
haneꞌi mesuleꞌ huleꞌ lao i katoroꞌána.
Ane maturu ionoꞌ,
tiꞌara ara to pebáiꞌ moruaꞌ.
10 Iudá ina motibaaꞌ laiꞌ kadatuá,h
hai pemuleꞌána ina mepárentá oaꞌ
duuꞌna haweꞌ hadua to hintotoꞌ ntepuꞌu mepárentá.i
Tauna hangko i upu-upu kadatuá ina moánti popenómbáraꞌ i hia,
hai ina motóngkóꞌheꞌ hai mengkoruꞌheꞌ i lindoꞌna.
11 Maroꞌa ntepuꞌu katueꞌna Iudá,
hai handaꞌ ntepuꞌu rasiꞌna i powiáꞌna.
Melumbuꞌ ntepuꞌu anggoroꞌna
duuꞌna tóáꞌ kau anggoroꞌ napotakaꞌi kalide,
mogalo waruꞌna nabahoꞌi riꞌi hai uwai anggoroꞌ.
12 Ánti kahandaꞌna anggoroꞌna,
mátána ina mewaliꞌ malei.
Ánti kahandaꞌna uwai huhu gapiꞌ,
ngihina ina mewaliꞌ bulá.
13 Sebuloꞌ ina toroꞌ i wiwi tahiꞌ
hai ina mewaliꞌ nodo pehupeꞌá kapalaꞌ tahiꞌ.
Parailiꞌna tampoꞌna ina haweꞌ i kótá Sido.j
14 Sakari nodo hambaꞌa kalide to maróhó,
to molukuꞌ i hiliꞌna inántina.
15 Ane naita pengkarooána iti maroꞌa
hai kamaruduꞌna tampoꞌna,
ina mengkabungkuꞌ miꞌi rapohumpádái inántina,
hai mobágóꞌ matimi nodo hadua hawiꞌ.
16 Daa ina mohoda-hoda posisalaꞌraꞌ taunána,k
hai pemuleꞌána ina mewaliꞌheꞌ hantina
hibali hai tina ntániꞌna i oloꞌraꞌ toSáráeliꞌ.
17 Agáiáná ia nodo hambaꞌa lelótó
to mangawu i wiwi karadaa,
nodo hambaꞌa lelótó
to mobisa i wiwi rárá,
to motilóꞌ padóꞌna dárá,
haneꞌi to mesaweꞌ tebálingkárá.”l
18 Ionoꞌ,
meraruaꞌ miꞌi Iako i Pueꞌ Ala,
nauliꞌ,
“Ó PUEꞌ,
kupepegiá mani petulungi to hangko i Hio.”
Roo onoꞌ,
nauliꞌ wopiꞌi:
19 “Gati ina rabungkáꞌ toperampaꞌ,
agáiáná ia ina morámpákiheꞌ huleꞌ.m
20 Asere,
ina handaꞌ pandeꞌna to maroꞌa;
pandeꞌ to hintotoꞌ napoporórá datu.n
21 Natali nodo lagiwa lundara to tekábáhá;o
mababeheꞌ poánáꞌraꞌ.
22 Iusupu nodo hampóꞌá kau to handaꞌ wuaꞌna,p
to tueꞌ i wiwi uwai;
dáꞌá-dáꞌána mendai moliungi bosoꞌ watu.q
23 Kehapiꞌ topepanaꞌ meꞌewaꞌ,
mepobiti hai mepanaꞌ,
24 ambiꞌ melumbuꞌ mani kamaróhóna taena Iusupu mepanaꞌ,
hai tiꞌara bata-bata laluna,r
láwiꞌ naporángá kuasaꞌna Pueꞌ Ala;
Hai Pueꞌ Ala to Makuasaꞌ to napenómbái Iako,
Ia miꞌi to mokádipurákoꞌ nodo hadua topoewu.
Ia miꞌi to mewaliꞌ buluꞌ watu,
pengkatueꞌáraꞌ toSáráeliꞌ.
25 Pueꞌ Ala to napenómbái umámu ina motulungikoꞌ.
Pueꞌ Ala to Makuasaꞌ ina mowátiꞌkoꞌ hai mopaꞌaraꞌákoꞌ
udá hangko i langiꞌ,
uwai hangko i lapi tampoꞌ,
handaꞌ pemuleꞌámi hai binataꞌmi.s
26 Pewátiꞌna Pueꞌ Ala to napenómbái umámu
ina melumbuꞌ peraeꞌna hangko i peraeꞌna buluꞌ
to ara miꞌi ami hangko i pewaliꞌána duniáꞌ.
Kupembiáꞌ bona upu-upu pewátiꞌ iti haweꞌ i Iusupu;
ia miꞌi to teádái ntepuꞌu i oloꞌnaheꞌ halaluna.t
27 Benami nodo hambaꞌa serigala to maseke.
Ane mepuloi,
mohakaꞌ pandeꞌna;
ane káindiꞌi,
mogáláꞌ-gáláꞌ apa to nalámbiꞌ.”u
28 Noꞌonoꞌ miꞌi Iako mopakanótó pewátiꞌ i ánáꞌnaheꞌ to hampuloꞌ hai rodua to mewaliꞌ toioruraꞌ hampuloꞌ hai rontina toSáráeliꞌ.
Upu-upuheꞌ nawátiꞌ mouláꞌ apa to hintotoꞌ i hira hadua-hadua.
Kamatena Iako
29-30 Roo onoꞌ,
meawili miꞌi Iako i ánáꞌnaheꞌ,
nauliꞌ,
“Tiꞌara piꞌi marue ina matemoꞌ.
Hangaa-ngaa nitawuaꞌ i popatawuáraꞌ toiorungkuꞌ,
ia miꞌi balamba to ara i hinoe Mapela,
tándáꞌ i mata alo wánuá Mamere i tampoꞌ Kánáꞌá.
Hangkoia Burahima mohóló miꞌi hinoe iti to nakaꞌarai balamba watu hangko i Epero toHeti,
bona rapopewaliꞌ popatawuá.v
31 Ionoꞌ miꞌi Burahima hai Sáráꞌ ratawu;
noꞌonoꞌ woꞌo Isakiꞌ hai Ribeka,
hai ionoꞌ woꞌo Lea kutawu.
32 Hinoe hai balamba watu iti rahóló miꞌi hangko i toHeti.
Mewaliꞌ kódóꞌ woꞌo hangaa-ngaa nitawuaꞌ ionoꞌ.”
33 Karoona Iako moawili ánáꞌnaheꞌ,
naꞌángkáꞌ miꞌi bitina i paturuána,
napakanoroꞌ wátána,
haneꞌi upu miꞌi inaona.