Iako mampombelindoꞌá datu i tampoꞌ Másiriꞌ
47
1-2 Hangko ionoꞌ,
Iusupu moántiheꞌ lima halaluna bona lao mampohidupaꞌá Piraoꞌ,
nauliꞌ,
“Umángkuꞌ hai halalungkuꞌ hangko i tampoꞌ Kánáꞌá haweꞌmoheꞌ moánti bekeꞌ,
gapiꞌ hai upu-upu párewáraꞌ.
Deꞌe-deꞌe aramoheꞌ i roboꞌ Gose.”
Roo onoꞌ,
napopombekaisángaheꞌ halaluna iti hai Piraoꞌ.
3 Napekuneꞌ Piraoꞌ i hira,
“Apa bágóꞌmi?”
Mehániꞌheꞌ,
“Datu,
kaiꞌ deꞌe,
topoewuangkaiꞌ nodoheꞌ woꞌo toiorungkiꞌ.
4 Maiangkaiꞌ i tampoꞌ deꞌe,
láwiꞌ i tampoꞌ Kánáꞌá rumihi kamarimi.
Ionoꞌ tiꞌara piꞌi ara rumpuꞌ,
pandeꞌraꞌ bekeꞌ hai dimbá.
Ane napaliuangkaiꞌ datu,
toroꞌangkaiꞌ i roboꞌ Gose.”
5 Hangko ionoꞌ,
nauliꞌ Piraoꞌ i Iusupu,
“Deꞌe-deꞌe umámu hai halalumu aramoheꞌ ieneꞌ.
6 Nupahibali peá tampoꞌ Másiriꞌ deꞌe nodo tampoꞌmu haduduámu.
Nupatoroꞌmoheꞌ i roboꞌ Gose,
tampoꞌ to maruduꞌ ntepuꞌu.
Hai ane arai i oloꞌraꞌ tauna to moisá ntepuꞌu mokádipurá binataꞌ,
nupoweꞌiheꞌ bágóꞌ mampoewu woꞌo binataꞌkuꞌ.”
7 Iusupu mampopombekaisángaheꞌ woꞌo umána hai Piraoꞌ,
hai Iako membiáꞌ bona Piraoꞌ nawátiꞌ Pueꞌ.
8 Roo onoꞌ,
Piraoꞌ mekuneꞌ i hia,
“Umaꞌ,
hangapa miꞌi tinuwuꞌtaꞌ?”
9 Mehániꞌ Iako i Piraoꞌ,
“Datu,
tinuwuꞌkuꞌ hangatu miꞌi hai tálu puloꞌna parena.
Katueꞌkuꞌ bukeꞌ hai kapári hai rembe tinuwuꞌkuꞌ ane tapahibali hai tinuwuꞌraꞌ toiorungkuꞌ topoliloheꞌ.”
10 Roo onoꞌ,
Iako membiáꞌ wopiꞌi bona Piraoꞌ nawátiꞌ Pueꞌ,
haneꞌi mesabiꞌ miꞌi.
11 Mewaliꞌ Iusupu mopatoroꞌmoheꞌ halaluna i tampoꞌ Másiriꞌ.
Naweꞌimoheꞌ tampoꞌ to maruduꞌ ntepuꞌu mewaliꞌ gáláꞌraꞌ i roboꞌ Gose to ina rauliꞌ woꞌo roboꞌ Ramese,a
hintotoꞌ hai apa to nauliꞌ Piraoꞌ.
12 Hai napatimamaꞌá woꞌo pandeꞌna umána hai halalunaheꞌ haweꞌ-haweꞌ i ánáꞌraꞌ.
Tempó rimi
13 Kamarimi iti rumihi ntepuꞌu,
hai i humalele tampoꞌ tiꞌara piꞌi ara pandeꞌ.
Onoꞌ miꞌi haneꞌi maledeꞌmoheꞌ tauna to toroꞌ i tampoꞌ Másiriꞌ hai i tampoꞌ Kánáꞌá.
14 Káni-kánina tauna mohóló pare,
Iusupu morámpu dóiꞌ popobaiari pare haneꞌi nawoli i támbi kadatuána Piraoꞌ.
15 Upu miꞌi dóiꞌ i tampoꞌ Másiriꞌ hai i tampoꞌ Kánáꞌá,
laoheꞌ toMásiriꞌ i Iusupu,
rauliꞌ,
“Nuweꞌi wongkaiꞌkaa pandeꞌkiꞌ.
Ineeꞌangkaiꞌ nupatodáhi mate.
Dóiꞌkiꞌ upu miꞌi.”
16 Mehániꞌ Iusupu,
“Ane upu miꞌi dóiꞌmi,
niweꞌiaꞌ binataꞌmi,
bona kuweꞌikou pandeꞌmi.”
17 Mewaliꞌ binataꞌraꞌ rapeweꞌi miꞌi i Iusupu,
rapopobaiari pandeꞌraꞌ.
Handaꞌ pákáꞌna binataꞌraꞌ to raꞌánti,
nodo dárá,
dimbá,
bekeꞌ,
gapiꞌ hai kalide.
Hampare kamaruena,
Iusupu mampoweꞌiheꞌ pandeꞌraꞌ to rabaiari hai binataꞌraꞌ.
18 Liu miꞌi hampare iti,
haweꞌ wopaheꞌ i hia,
rauliꞌ,
“Tuá,
upu miꞌi dóiꞌkiꞌ.
Ane binataꞌkiꞌ,
io miꞌi pueꞌna.
Tiꞌara piꞌi ara apa-apangkiꞌ to peisá kiweꞌikoꞌ,
bateꞌna rái wátángkiꞌ hai tampoꞌkiꞌ.
19 Ineeꞌangkaiꞌ nupatodáhi mate.
Ineeꞌ nupatodáhi hinoengkiꞌ tiꞌara tetudaꞌi.
Kihuhuꞌ tampoꞌkiꞌ i Piraoꞌ hai kaiꞌ ina mewaliꞌangkaiꞌ hawiꞌna.
Nuweꞌi peangkaiꞌ pare kagánáꞌána kipopoumpuki tueꞌkiꞌ hai tinudaꞌ woꞌo bona kipotinudaꞌ woꞌo i hinoengkiꞌ.”
20 Onoꞌ miꞌi haneꞌi upu-upu tampoꞌraꞌ toMásiriꞌ nahóló mpuꞌu miꞌi Iusupu mewaliꞌ tampoꞌna Piraoꞌ.
Ánti karumihina kamarimi iti,
upu-upu toMásiriꞌ mampobaluꞌmoheꞌ tampoꞌraꞌ i hia,
haneꞌi upu-upu tampoꞌ i Másiriꞌ napopepueꞌ miꞌi i Piraoꞌ.
21 Kaupuána,
upu-upu tauna i humalele tampoꞌ Másiriꞌ mewaliꞌ hawiꞌna Piraoꞌ.
22 Bateꞌna perái tampoꞌraꞌ tadulako menómbá to tiꞌara nahóló Iusupu,
láwiꞌ pandeꞌraꞌ napatimamaꞌámoheꞌ Piraoꞌ.
Onoꞌ haneꞌi tiꞌaraheꞌ paraluu mampobaluꞌ tampoꞌraꞌ.
23 Nauliꞌ Iusupu i tauna to handaꞌ,
“Bona niꞌisá,
kómu hai tampoꞌmi kuhólóá miꞌi Piraoꞌ.
Deꞌe miꞌi tinudaꞌ to ina nitudaꞌ i hinoemi.
24 Ane meparekou onoꞌ,
hangaa-ngaa niweꞌi Piraoꞌ hanggáláꞌ lima hangko i rasiꞌmi.
Pentáráꞌána hangko ionoꞌ peisá niala,
nipotinudaꞌ hai niandeꞌ hampoánáka.”
25 Mehániꞌheꞌ,
“Bulá lalungkiꞌ mewaliꞌangkaiꞌ hawiꞌna Piraoꞌ,
láwiꞌ nupelaemongkaiꞌ hangko i kamarimi.
Kihárungá ina nutarimaꞌangkaiꞌ maroꞌa.”
26 Hangko ionoꞌ,
nabábehi miꞌi Iusupu áturá i tampoꞌ Másiriꞌ bona hanggáláꞌ lima hangko i powiáꞌraꞌ hangaa-ngaa mewaliꞌ gáláꞌna Piraoꞌ.
Haweꞌ deꞌe-deꞌeb áturá iti rapopolumao mani.
Bateꞌna perái tampoꞌraꞌ tadulako menómbá to tiꞌara mewaliꞌ tampoꞌna Piraoꞌ.
Peawilina Iako
27 Mewaliꞌ toSáráeliꞌ mokatoroꞌi roboꞌ Gose i tampoꞌ Másiriꞌ.
Hangko ionoꞌ,
kamaroꞌa-roꞌaꞌá riꞌi tueꞌraꞌ hai memuleꞌheꞌ duuꞌraꞌ handaꞌ.
28 Iako tueꞌ mani hampuloꞌ hai pitu parena i tampoꞌ Másiriꞌ duuꞌna gáná miꞌi tinuwuꞌna hangatu iba puloꞌna hai pitu parena.
29 Hungkuꞌ miꞌi tempóna ina mate,
Iako mokióꞌ miꞌi Iusupu haneꞌi meawili,
nauliꞌ,
“Ane nupokaꞌahiꞌaꞌ hai nupomahileaꞌ,
nuwoli taemu i páꞌángkuꞌ hai modándimokoꞌ,
bona ineeꞌaꞌ nutawu i tampoꞌ Másiriꞌ.
30 Kuꞌundeꞌ peá ratawu i popatawuáraꞌ toiorungkuꞌ.
Kupembiáꞌ bona maꞌahiꞌ lalumu i kódóꞌ hai nuánti mesuleꞌ wátámandoꞌkuꞌ hangko i tampoꞌ deꞌe lao nutawu i popatawuáraꞌ iti.”c
Nahániki Iusupu,
“Umaꞌ,
ina kubábehi nodo to nuhángáꞌáꞌáꞌaꞌ.”
31 Nauliꞌ Iako,
“Modándimokoꞌ i kódóꞌ.”
Mewaliꞌ modándi mpuꞌu miꞌi Iusupu.
Roo onoꞌ,
motóngkóꞌ miꞌi Iako tándáꞌ i wuáꞌ paturuána,
menómbá i Pueꞌ Ala.