Iusupu mopakanótó lempóna paturuna Piraoꞌ
41
Liu miꞌi rompare,
mampaturuá miꞌi Piraoꞌ.
I lalu paturuna,
ia meángkáꞌ i wiwi uwai Nili.
2 Iaperái naita mesupaꞌ hangko i uwai pitu báꞌána gapiꞌ to maruduꞌ hai mahile,
haneꞌi mangkukuꞌheꞌ rumpuꞌ to i wiwi uwai iti.
3 Hangko ionoꞌ,
mesupaꞌ miꞌi woꞌo pitu báꞌána gapiꞌ to ntániꞌna.
Gapiꞌ iti maduhuꞌheꞌ,
buꞌu perái nabungkuhi koliꞌ.
Gapiꞌ to maduhuꞌ iti meángkáꞌheꞌ i hintáiꞌraꞌ gapiꞌ to maruduꞌ i wiwi uwai,
4 haneꞌi gapiꞌ to maduhuꞌ moameꞌheꞌ gapiꞌ to maruduꞌ.
Roo onoꞌ,
pehádi miꞌi Piraoꞌ.
5 Tiꞌara marue,
tekapidi wopiꞌi Piraoꞌ haneꞌi mampaturuá.
I lalu paturuna,
naita hangkau pare to mowuaꞌ pitu wulina to moꞌóntóꞌ.
6 Hai tueꞌ woꞌo hangkau pare mowuaꞌ pitu wulina to langkoꞌ láwiꞌ paka nawui wui to maꞌámuꞌ hangko i pádá wungi tándáꞌ i mata alo.
7 Pare to langkoꞌ iti moameꞌ pare to moꞌóntóꞌ.
Roo onoꞌ,
pehádi miꞌi Piraoꞌ hai naisá kamampaturuána.
8 Mearó miꞌi mepulo,
tiꞌara maroꞌa pekirina,
onoꞌ miꞌi haneꞌi napopekióꞌheꞌ upu-upu topodoti hai tauna to mapánde i tampoꞌ Másiriꞌ,
haneꞌi natuntuáheꞌ paturuna iti,
agáiáná tiꞌara ara to peisá molempónga paturuna iti.
9 Kahópóꞌána nauliꞌ topokádipurá painu i Piraoꞌ,
“Datu,
membiáꞌaꞌ ámpu.
Alo deꞌe monóákámoꞌ salaꞌkuꞌ.
10 Iaꞌo,
Piraoꞌ mabukoꞌ i toporótiꞌ hai i kódóꞌ,
onoꞌ miꞌi haneꞌi rapopesuaꞌangkaiꞌ i lalu petarungkuá i támbina tadulako topokámpái támbi kadatuána Piraoꞌ.
11 Hangkani tempó,
kaiꞌ rodua mampaturuáꞌangkaiꞌ,
hai paturungkiꞌ tiꞌara hibali lempóna.
12 Ionoꞌ ara hadua ánáꞌntomoane toIberani,
to ratarungku woꞌo hingkakani hai kaiꞌ.
Ia hawiꞌna tadulako topokámpái támbina datu.
Kituntu paturungkiꞌ i hia,
hai nalempóꞌáꞌangkaiꞌ paturungkiꞌ iti.
13 To napolaluita iti mewaliꞌ aha,
láwiꞌ datu mampopesuleꞌmoꞌ i bágóꞌkuꞌ hangkoia,
agáiáná toporótiꞌ iti ratóe duuꞌna mate.”
14 Kanahádina Piraoꞌ laluitana,
ia mampopeala miꞌi Iusupu,
hai hawiáꞌ-wiáꞌ rapopesuwuꞌ hangko i petarungkuá.
Roo mokáiꞌ danggona hai mempaháwá,
lao miꞌi i lindoꞌna Piraoꞌ.
15 Nauliꞌ Piraoꞌ i hia,
“Kódóꞌ mampaturuáꞌaꞌ,
agáiáná tiꞌara ara haweꞌ hadua to peisá molempónga paturungkuꞌ iti.
Ara to mopahaweꞌ i kódóꞌ,
io to peisá molempónga paturu.”
16 Mehániꞌ Iusupu,
“Tiꞌara kódóꞌ,
Piraoꞌ,
agáiáná Pueꞌ Ala to ina molempónga paturumu.”
17 Roo onoꞌ,
nauliꞌ Piraoꞌ,
“I lalu paturungkuꞌ,
kódóꞌ meángkáꞌaꞌ i wiwi uwai Nili.
18 Iaperái kuita mesupaꞌ hangko i uwai iti pitu báꞌána gapiꞌ to maruduꞌ hai mahile,
mangkukuꞌheꞌ i wiwi uwai.
19 Roo onoꞌ,
mesupaꞌheꞌ woꞌo mai pitu báꞌána gapiꞌ to ntániꞌna to maduhuꞌ ntepuꞌu;
wátáraꞌ buꞌu perái nabungkuhi koliꞌ.
Tiꞌara mani haweꞌ hangkani kuita gapiꞌ to noꞌonoꞌ kamaduhuꞌraꞌ gaga i tampoꞌ Másiriꞌ.
20 Gapiꞌ to maduhuꞌ iti moameꞌheꞌ pitu báꞌána gapiꞌ to maruduꞌ,
21 agáiáná gapiꞌ to maduhuꞌ iti,
bateꞌ-bateꞌna peá kamaduhuꞌraꞌ.
Roo onoꞌ,
pehádimoꞌ.
22 Tiꞌara marue,
tekapidi wopaꞌaꞌ hai mampaturuáꞌaꞌ;
ionoꞌ kuita hangkau pare mowuaꞌ pitu wulina to moꞌóntóꞌ hai mangka.
23 Hai tueꞌ woꞌo hangkau pare mowuaꞌ pitu wulina to langkoꞌ láwiꞌ paka nawui wui to maꞌámuꞌ hangko i pádá wungi tándáꞌ i mata alo.
24 Pare to langkoꞌ iti moameꞌ pare to moꞌóntóꞌ.
Paturungkuꞌ to rompákáꞌ deꞌe roo miꞌi kupahaweꞌ i topangisá,
agáiáná tiꞌara haweꞌ hadua to peisá molempónga i kódóꞌ.”
25 Roo onoꞌ,
nauliꞌ Iusupu i Piraoꞌ,
“Rompákáꞌ paturu iti,
hibali peá lempóna.
Pueꞌ Ala mopatongawaꞌ miꞌi i pueꞌkuꞌ Piraoꞌ apa to ina Nabábehi.
26 Pitu báꞌána gapiꞌ to maruduꞌ hai pitu wulina pare to moꞌóntóꞌ,
lempóna pitu parena ina maroꞌa katueꞌraꞌ tauna;
rompákáꞌ iti hibali peá lempóna.
27 Pitu báꞌána gapiꞌ to maduhuꞌ hai pitu wulina pare to langkoꞌ,
lempóna pitu parena kamaruena ina ara tempó rimi.
28 Deꞌe miꞌi to kupahaweꞌ i hio Piraoꞌ,
láwiꞌ Pueꞌ Ala mopatongawaꞌ miꞌi i pueꞌkuꞌ Piraoꞌ apa to ina Nabábehi.
29 I lalu pitu parena,
ina handaꞌ rasiꞌ i powiáꞌraꞌ tauna,
hai ina maroꞌa katueꞌtaꞌ i humalele tampoꞌ Másiriꞌ.
30-31 Agáiáná roo hangko ionoꞌ,
ina haweꞌ tempó rimi pitu woꞌo parena,
hai kagóeꞌtaꞌ iti ina takáláliꞌá,
láwiꞌ tempó kapári ina morampe tampoꞌ deꞌe duuꞌna bangi.
32 Rongkani miꞌi pueꞌkuꞌ Piraoꞌ mampaturuá.
Lempóna,
Pueꞌ Ala mopakanótó miꞌi peundeꞌáNa,
hai kawiáꞌ kaꞌina Nabábehina.
33 Mewaliꞌ ane maroꞌa pueꞌkuꞌ Piraoꞌ,
nupileꞌi miꞌi hadua tauna to mapánde hai manótó laluna,
nuweꞌi kuasaꞌ mokádipurá tampoꞌ deꞌe.
34-35 Pueꞌkuꞌ Piraoꞌ,
hangaa-ngaa nuángkáꞌheꞌ topobágóꞌ to ntániꞌna hai nuweꞌiheꞌ kuasaꞌ bona i lalu pitu parena i tempó mabuhu iti,
moróróꞌheꞌ hanggáláꞌ lima hangko i powiáꞌraꞌ tauna,
bona rarámpu i kótá-kótá hai rakádipurá i lalu hangaꞌna Piraoꞌ.
36 Pare iti hangaa-ngaa rapatimama,
bona ara pandeꞌraꞌ tauna i lalu pitu parena tempó rimi to ina mewaliꞌ i tampoꞌ Másiriꞌ deꞌe.
Mewaliꞌ ane noꞌonoꞌi,
taunámu tiꞌaraheꞌ ina mate holo.”
Iusupu raꞌángkáꞌ mewaliꞌ sulewátána datu i tampoꞌ Másiriꞌ
37 Piraoꞌ hai upu-upu topobágóꞌna mampokana polámbiꞌna Iusupu.
38 Nauliꞌ Piraoꞌ i hira,
“Ara mani paꞌi to hibali hai Iusupu,
to nateteꞌ Inaona Pueꞌ Ala?”
39 Hangko ionoꞌ,
nauliꞌ Piraoꞌ i Iusupu,
“Láwiꞌ Pueꞌ Ala to mampopaisá upu-upuna iti i hio,
tongawaꞌ io to mapánde hai bukeꞌ timbá hangko i tauna ntániꞌna.
40 Ina kulántiꞌkoꞌ mewaliꞌ sulewátángkuꞌ i támbi kadatuángkuꞌ deꞌe,
hai upu-upu taunángkuꞌ hangaa-ngaa mampeuláꞌi párentámu,
agáiáná bateꞌna kódóꞌ to i reámu.”
41-42 Roo onoꞌ,
naposu Piraoꞌ hingkoliꞌ kadatuá hai napusaꞌ i karaweꞌna Iusupu,
haneꞌi nauliꞌ,
“Deꞌe-deꞌe kulántiꞌkoꞌ mewaliꞌ sulewátángkuꞌ i tampoꞌ Másiriꞌ.”
Hangko ionoꞌ,
rabaduiá wopiꞌi hantau badu to maꞌálusuꞌ bánána,
hai rapopeáwóló rante buláwá.
43 Roo onoꞌ,
raweꞌi miꞌi kereta kadatuá to kaduá napengkaheꞌi,
hai topokámpái moioru haneꞌi rapopaisá i upu-upu tauna,
“Poweꞌi rárá!
Nibiláꞌ tauna deꞌe!”
Noꞌonoꞌ miꞌi karalántiꞌna Iusupu mepárentá i tampoꞌ Másiriꞌ.
44 Nauliꞌ Piraoꞌ i hia,
“Kódóꞌ miꞌi deꞌe Piraoꞌ,
hai ina kupahaweꞌ i upu-upu tauna,
ane tiꞌaraheꞌ mesabiꞌ i hio,
tiꞌara mpuꞌuheꞌ peisá mobábehi apa-apa i tampoꞌ Másiriꞌ.”
45-46 Roo onoꞌ,
Piraoꞌ mohangaꞌ Iusupu Sapana Panea haneꞌi naweꞌi woꞌo towawine napotoina.
Towawine iti rahangaꞌ Asina.
Ia ánáꞌna Potipera,
hadua kapalaꞌ tadulako menómbá ágámáraꞌ toMásiriꞌ i kótá On.a
I pantepuꞌuána Iusupu mobágóꞌ i tampoꞌ Másiriꞌ mosulewátái Piraoꞌ daturaꞌ,
tinuwuꞌna tálu puloꞌna parena.
Pohuꞌ miꞌi Iusupu hangko i támbina Piraoꞌ lao motolelingi upu-upu wánuá i tampoꞌ Másiriꞌ.
47 Pitu parena kamaruena,
maroꞌa katueꞌraꞌ tauna.
Hinángkáꞌna powiáꞌraꞌ mewaliꞌ ntepuꞌu,
pelumbuꞌna miꞌi wuaꞌ pareraꞌ.
48 Nahawaka miꞌi Iusupu bona pare iti rarámpu hangko i powiáꞌraꞌ haneꞌi rawoli i lalu buhoꞌ to mahile i kótá-kótá.
49 Ánti kahandaꞌna miꞌi pare to rarámpu iti,
Iusupu tiꞌara piꞌi mohukáꞌ,
láwiꞌ kahandaꞌna pare iti nodo kahandaꞌna wungi i wiwi tahiꞌ.
50 Hangko tiꞌara mani haweꞌ tempó rimi,
Asina toinána Iusupu moánáꞌ miꞌi rodua tobaleilo.
51 Nauliꞌ Iusupu,
“Ánti kamaroꞌana Pueꞌ Ala i kódóꞌ,
onoꞌ miꞌi haneꞌi kukáláliꞌá hinángkáꞌ kapáringkuꞌ hai upu-upu tinána umángkuꞌ.”
Onoꞌ miꞌi haneꞌi nahangaꞌ ánáꞌna towutuꞌ “Manase” lempóna:
“nakáláliꞌá miꞌi”.
52 Hai nauliꞌ wopiꞌi,
“Naweꞌimoꞌ Pueꞌ Ala rodua ánáꞌkuꞌ i tampoꞌ kapáriángkuꞌ,”
haneꞌi nahangaꞌ ánáꞌna to adi “Eparai” lempóna:
“mowuaꞌ handaꞌ”.
53 Hópóꞌ miꞌi pitu parena katueꞌraꞌ tauna i tampoꞌ Másiriꞌ mewaliꞌ maroꞌa,
54 haweꞌ miꞌi tempó rimi.
Pitu parena kamaruena,
tauna i humalele duniáꞌ narampe rimi to rumihi,
hintotoꞌ hai apa to nauliꞌ Iusupu.
I tampoꞌ Másiriꞌ peá ara pandeꞌ.
55 I tempóraꞌ toMásiriꞌ mantepuꞌu marimi,
laomoheꞌ membiáꞌ pandeꞌraꞌ i Piraoꞌ,
agáiáná nauliꞌ,
“Laomokou i Iusupu,
hai nipeuláꞌi upu-upu to nahawaka i kómu.”