Iako i támbina Lábá i Pádá Árá
29
Roo onoꞌ,
napaliliu wopiꞌi Iako polumaona lao i tampoꞌ tándáꞌ i mata alo.a
2 I kahaweꞌna ionoꞌ,
naita miꞌi hambuaꞌ tibubuꞌ i pádá to ratuko hai watu to mahile.
Ara woꞌo tálu tobuna dimbá to molukuꞌ hungkuꞌ i tibubuꞌ iti,
láwiꞌ ionoꞌ miꞌi painuáraꞌ.
3 Biásá ane haweꞌmoheꞌ upu-upu dimbá hangko rabungkáhi riꞌi topoewu watu petukona tibubuꞌ iti haneꞌi mampopainuheꞌ dimbáraꞌ.
Roo onoꞌ,
tibubuꞌ iti ratuko huleꞌ.
4 Mekuneꞌ Iako i topoewu iti,
nauliꞌ,
“Halalungkuꞌ,
hangko iumbákou mai?”
Mehániꞌheꞌ,
“Hangko i Hara.”
5 Nakuneꞌ wopaheꞌ,
“Ba niꞌisánto paꞌi Lábá ueꞌna Nahori?”
Rauliꞌ,
“Kiꞌisánto.”
6 Napekuneꞌ wopiꞌi,
“Maroꞌa-roꞌanto paꞌi?”
Mehániꞌheꞌ,
“Maroꞌa-roꞌanto.
Peita,
doꞌontoi maiꞌo ánáꞌna towawine moánti dimbána.
Hangaꞌna Raheli.”
7 Nauliꞌ wopiꞌi Iako,
“Deꞌe-deꞌe mabaa mani.
Tiꞌara mani tempóraꞌ dimbá rarámpu hai rapopesuaꞌ i gimpuraꞌ.
Rángina miꞌi nipopainuheꞌ sieruꞌ,
haneꞌi niewu wopaheꞌ i pádá.”
8 Agáiáná mehániꞌheꞌ,
“Tiꞌaraheꞌ sieruꞌ kipopainu dimbá ane tiꞌara mani hirámpu hantobu-hantobu.
Ane hirámpumoheꞌ upu-upu,
hangko kinduli riꞌi watu petuko tibubuꞌ hai kipopainuheꞌ.”
9 Tangaꞌna mani Iako molaluita hai topoewu iti,
haweꞌ miꞌi Raheli moánti dimbána umána láwiꞌ ia hadua topoewu towawine.
10 I kanaitána miꞌi Iako kahaweꞌna Raheli moánti dimbána Lábá umána,
lao miꞌi i tibubuꞌ monduli watu petukona hai napopainuheꞌ dimbána pinoumána iti.
11 Roo onoꞌ,
ia mokápui hai moángki Raheli haneꞌi teriaꞌ napasimbuku ánti kagóeꞌna.
12 Tempó onoꞌ woꞌo,
nahángáꞌá,
“Kódóꞌ deꞌe ánáꞌnaꞌaꞌ Ribeka,
ádina umámu.”
Onoꞌ miꞌi haneꞌi Raheli melangka mesuleꞌ lao i támbina,
mampolaluitaꞌá umána.
13 Kanahádina Lábá kahaweꞌna Iako pinoánáꞌna,
ia hawiáꞌ lao mampohidupaꞌá.
Liu-liu nakápui hai naꞌángki haneꞌi naꞌánti lao i támbina.
Karoona Iako mampodarita mampopengaa to mewaliꞌ,
14 nauliꞌ Lábá,
“Toꞌu-toꞌu kitaꞌ deꞌe hawaheꞌ-waheꞌkeꞌ.”
Iako mobágóꞌ i Lábá bona mampotoina ánáꞌna
Hambulá miꞌi Iako toroꞌ i Lábá,
15 nauliꞌ Lábá i hia,
“Tiꞌara maroꞌa ane mobágóꞌkoꞌ mbero i kódóꞌ ánti kamohalaluntaꞌ.
Nuꞌuliꞌ hangapa to hangaa-ngaa kuweꞌikoꞌ mewaliꞌ saromu.”
16 Lábá ara ánáꞌna rodua ánáꞌntawine.
Towutuꞌ rahangaꞌ Lea,
hai toadi rahangaꞌ Raheli.
17 Lea mababe mátána,b
agáiáná Raheli malásáꞌ mpiiꞌ.
18 Iako moundeꞌ ntepuꞌu Raheli,
onoꞌ miꞌi haneꞌi nauliꞌ,
“Umaꞌ,
mauaꞌ mobágóꞌ i hio pitu parena bona ánáꞌmu Raheli kupotoina.”
19 Nauliꞌ Lábá,
“Maroꞌa mani kuweꞌikoꞌ haneꞌi i tauna ntániꞌna.
Toroꞌmokoꞌ i kódóꞌ.”
20 Mewaliꞌ mobágóꞌ miꞌi Iako pitu parena,
agáiáná pitu parena iti nahádi nodo peá bahangapa alona,
láwiꞌ rumihi peundeꞌna i Raheli.
21 Roo onoꞌ,
molaluita miꞌi Iako i Lábá,
nauliꞌ,
“Nuweꞌimoꞌ to ina mewaliꞌ toinángkuꞌ,
láwiꞌ hópóꞌ miꞌi tempóna pobágóꞌkuꞌ.”
22 Haneꞌi nakióꞌ Lábá upu-upu tauna to toroꞌ hungkuꞌ i hia bona mopaꞌara susa to mahile.
23 Agáiáná káindi iti,
Lábá moala riꞌi Lea,
haneꞌi naꞌántiá Iako bona napoiluhi,
24 hai Silipa hawiꞌna Lábá napeweꞌi woꞌo i Lea mewaliꞌ hawiꞌna.
25 Agáiáná mepulona,
naita Iako Lea riꞌi,
onoꞌ miꞌi haneꞌi nauliꞌ Iako i Lábá,
“Moapa haneꞌi noꞌonoꞌ riꞌi bábehiámu i kódóꞌ?
Tiꞌaraꞌaꞌ paꞌi mobágóꞌ bona nuweꞌiaꞌ Raheli?
Moapa riꞌi haneꞌi nubagiuꞌaꞌ?”
26 Mehániꞌ Lábá,
“Mouláꞌ ádángkiꞌ,
tiꞌara hintotoꞌ ane ánáꞌkiꞌ to adi mampehindorungi potoámána wutuꞌna.
27 Tapagáná sieruꞌ pitu alona pohambokomi deꞌe,
hangko kuweꞌirakoꞌ Raheli nupotoina,
asalaꞌ mobágóꞌ wopakoꞌ pitu mani parena i kódóꞌ.”
28 Laluitana iti napokana Iako,
hai hópóꞌ miꞌi pitu alona posusa petauna,
Lábá mampeweꞌi miꞌi Raheli napotoina Iako.
29 Hai Biláꞌ hawiꞌna Lábá,
napeweꞌi woꞌo i Raheli mewaliꞌ hawiꞌna.
30 Tempó iti,
Iako mampotoina miꞌi Raheli,
hai moundeꞌ mani Raheli haneꞌi Lea.
Roo onoꞌ,
ia mobágóꞌ wopiꞌi pitu parena i Lábá.
Ánáꞌnaheꞌ Iako
31 PUEꞌ mampeita Lea tiꞌara gaga naundeꞌ toámána,
onoꞌ miꞌi haneꞌi Ia mowátiꞌ iti Lea bona moánáꞌ,
agáiáná Raheli lalo.
32 Mewaliꞌ Lea káláꞌeá hai moánáka hadua ánángkóiꞌ tobaleilo,
nauliꞌ,
“Naita miꞌi PUEꞌ kamapáringkuꞌ.
Deꞌe-deꞌe ina naundeꞌaꞌ toámángkuꞌ.”
Ánáꞌna iti nahangaꞌ Rube,
lempóna:
“peita,
ánángkóiꞌ tobaleilo”.c
33 Káláꞌeá wopiꞌi Lea,
hai moánáka hadua ánángkóiꞌ tobaleilo,
nauliꞌ,
“Toꞌu-toꞌu mpuꞌu PUEꞌ mampehádingiaꞌ,
hai Naweꞌi wopaꞌaꞌ ánángkóiꞌ,
láwiꞌ tiꞌaraꞌaꞌ naundeꞌ toámángkuꞌ.”
Onoꞌ miꞌi haneꞌi nahangaꞌ ánángkóiꞌ iti Simeoꞌ.
I lalu básá Iberani hungkuꞌ hibali hai “to mampehádingi.”
34 Káláꞌeá wopiꞌi Lea,
hai moánáka hadua ánángkóiꞌ tobaleilo,
nauliꞌ,
“Deꞌe-deꞌe ina mentakaꞌ laluna toámángkuꞌ i kódóꞌ,
láwiꞌ moánákamoꞌ tálu tobaleilo.”
Onoꞌ miꞌi haneꞌi ánáꞌna iti nahangaꞌ Lewi.d
I lalu básá Iberani,
hibali hai “mentakaꞌ”.
35 Hangko ionoꞌ,
káláꞌeá wopiꞌi Lea,
hai moánáka hadua ánángkóiꞌ tobaleilo,
nauliꞌ,
“Deꞌe-deꞌe motóiáꞌaꞌ PUEꞌ.”
Onoꞌ miꞌi haneꞌi ánáꞌna iti nahangaꞌ Iudá,
lempóna:
“motóiá”.e
Roo onoꞌ,
Lea tiꞌara piꞌi moánáꞌ.