Isakiꞌ mowátiꞌ Iako
27
Matinuwuꞌ miꞌi Isakiꞌ,
weroꞌ miꞌi,
tiꞌara piꞌi gaga meita.
Hangkani tempó,
ia mokióꞌ Esau ánáꞌna towutuꞌ,
nauliꞌ,
“Ánáꞌkuꞌ!”
Mehániꞌ Esau,
“Deꞌentoaꞌ,
umaꞌ.”
2 Nauliꞌ Isakiꞌ,
“Nupehádingi.
Kódóꞌ deꞌe,
matoamamoꞌ,
tueꞌkuꞌ tiꞌara piꞌi marue.
3 Nuala miꞌi panaꞌmu hai laokoꞌ i pádá,
nupoahuáꞌaꞌ hambaꞌa binataꞌ.
4 Ane ara miꞌi rasiꞌmu,
nupaihóáꞌaꞌ nupamatamaꞌ mouláꞌ peundeꞌángkuꞌ.
Nuántiáꞌaꞌ mai,
hai ane roomoꞌ mandeꞌ,
ina kuwátiꞌkoꞌ hangko tiꞌara maniaꞌ mate.”
5 Polaluitaraꞌ Isakiꞌ hai Esau iti nahádi Ribeka.
Kapohuꞌna peá Esau lao moahu i pádá,
6 lao miꞌi Ribeka i Iako haneꞌi nahángáꞌá,
“Nupehádingi.
Ininá kuhádi umámu molaluita i Esau wutuꞌmu,
nauliꞌ,
7 ‘Laokoꞌ moahu bona rasiꞌmu nupaihó nupamatamaꞌ,
haneꞌi nuweꞌiaꞌ kuandeꞌ.
Roo onoꞌ,
ina kuwátiꞌkoꞌ i lindoꞌna PUEꞌ hangko tiꞌara maniaꞌ mate.’
8 Mewaliꞌ ánáꞌkuꞌ,
nupehádingi maroꞌa haneꞌi nupeuláꞌi upu-upu to kuꞌuliꞌ deꞌe.
9 Laomokoꞌ moala rombaꞌa ánáꞌ bekeꞌ to maruduꞌ,
bona kupaihóá umámu mouláꞌ peundeꞌána.
10 Roo onoꞌ,
nuántiá umámu naꞌandeꞌ,
bona ane roo mandeꞌ,
ina nawátiꞌkoꞌ hangko tiꞌara mani mate.”
11 Agáiáná nauliꞌ Iako i hinána,
“Noumbá miꞌi kapeisána?
Wátána Esau mowulu haneꞌi koliꞌkuꞌ maꞌálusuꞌ.
12 Ane napereraꞌaꞌ umángkuꞌ,
ina naisá kakudongkokina,
hai tiꞌara pewátiꞌ to ina kulámbiꞌ,
agáiáná pekambo riꞌi!”
13 Mehániꞌ inána,
“Ánáꞌkuꞌ,
ineeꞌ nupokaraoꞌ inao.
Kódóꞌ to mampohurunga pekambo iti i alo bókóꞌna.a
Nupeuláꞌi peá apa to kuꞌuliꞌ iti.
Laomokoꞌ moala bekeꞌ iti.”
14 Mewaliꞌ lao mpuꞌu miꞌi Iako moala bekeꞌ rombaꞌa hai naꞌántiá inána bona napaihóá toámána hintotoꞌ hai peundeꞌána.
15 Roo onoꞌ,
naꞌala miꞌi Ribeka waruꞌna Esau to mababe ntepuꞌu to ara i támbi,
haneꞌi nawaruꞌiá Iako.
16 Tambólóna hai taena Iako tiꞌara mowulu,
onoꞌ miꞌi haneꞌi natámpelei hai koliꞌ ánáꞌ bekeꞌ.
17 Roo onoꞌ,
napeweꞌi Ribeka i Iako haloꞌ bauꞌ hai rótiꞌ,
bona lao naꞌántiá umána.
18 Lao mpuꞌu miꞌi Iako i umána,
nauliꞌ,
“Umaꞌ.”
Mehániꞌ Isakiꞌ,
“Deꞌentoaꞌe.
Heánákoꞌ noiti?”
19 Mehániꞌ Iako,
“Kódóꞌ miꞌi Esau,
ánáꞌmu towutuꞌ.
Umaꞌ,
apa to nuhawaꞌáꞌaꞌ ininá,
kupeuláꞌi miꞌi.
Mehodamokoꞌ hai mandeꞌmokoꞌ deꞌe to kuporasiꞌ kalaongkuꞌ moahu,
bona ane rookoꞌ mandeꞌ,
nuwátiꞌaꞌ.”
20 Nauliꞌ Isakiꞌ,
“Ánáꞌkuꞌ.
Noumbá?
Hawiáꞌ mpuꞌukoꞌ morasiꞌ.”
Mehániꞌ Iako,
“PUEꞌ Ala to nupenómbái,
Ia miꞌi to motulungiaꞌ.”
21 Nauliꞌ wopiꞌi Isakiꞌ i Iako,
“Mengkahungkuꞌkoꞌ mai.
Ina kupereraꞌkoꞌ bona kuisá ba toꞌu-toꞌu mpuꞌui kaꞌiona miꞌi Esau.”
22 Mewaliꞌ Iako mehungkuki miꞌi haneꞌi napereraꞌ umána.
Nauliꞌ Isakiꞌ,
“Ane wambaꞌmui,
nodo wambaꞌna Iako,
agáiáná taemu,
taena Esau.”
23 Tiꞌara naisá Isakiꞌ kaIakona láwiꞌ taena mowulu nodo taena Esau.
Ia ina mowátiꞌ miꞌi Iako,
24 agáiáná hangko tiꞌara mani nawátiꞌ,
mekuneꞌ wopiꞌi umána,
“Toꞌu mpuꞌu paꞌi io miꞌi Esau?”
Mehániꞌ Iako,
“Toꞌu.”
25 Nauliꞌ Isakiꞌ,
“Nuweꞌiaꞌ mai iti bauꞌ to nupaihó miꞌi.
Ane roomoꞌ mandeꞌ,
hangko kuwátiꞌrakoꞌ.”
Iako mampeweꞌi miꞌi bauꞌ iti bona naꞌandeꞌ umána,
hai napoweꞌi woꞌo anggoroꞌ nainu.
26 Roo miꞌi mandeꞌ,
nauliꞌ umána i Iako,
“Ánáꞌkuꞌ,
maimokoꞌ,
nuángkiaꞌ.”
27 Mehungkuki miꞌi Iako haneꞌi moángki umána.
I kanaꞌáriꞌna miꞌi Isakiꞌ iti waruꞌna Esau,
ia mowátiꞌ Iako,
nauliꞌ:
“Mawongi mauna ánáꞌkuꞌ,
nodo kamawongina pádá to nawátiꞌ PUEꞌ.
28 Kupembiáꞌ bona Pueꞌ Ala mopatóá namu hangko i langiꞌ,
bona maruduꞌ tudaꞌ-tudaꞌ i hinoemu.
Kupembiáꞌ bona Ia mopahandaꞌ paremu,
hai motámbái wuaꞌna anggoroꞌmu.
29 Kupembiáꞌ bona tauna hangko i tampoꞌ ntániꞌna ina mewaliꞌ hawiꞌmu,
hai mengkoruꞌheꞌ i hio.
Kupembiáꞌ woꞌo bona io miꞌi to makuasaꞌ i halalumuheꞌ,
hai pemuleꞌána inámu mengkoruꞌheꞌ i hio.
Kupembiáꞌ woꞌo bona tauna to mokambokoꞌ ina molámbiꞌheꞌ woꞌo pekambo,
agáiáná tauna to mowátiꞌkoꞌ ina molámbiꞌheꞌ woꞌo pewátiꞌ.”
Esau membiáꞌ nawátiꞌ Isakiꞌ
30 Karoona peá Isakiꞌ mowátiꞌ Iako,
pohuꞌ miꞌi Iako.
Tiꞌara marue hangko ionoꞌ,
haweꞌ miꞌi Esau hangko i poahuána.
31 Ia woꞌo mopaihó pandeꞌ to matamaꞌ,
haneꞌi naꞌántiá umána,
nauliꞌ,
“Umaꞌ,
mehodamokoꞌ hai mandeꞌmokoꞌ deꞌe bauꞌ to kuporasiꞌ,
bona ane rookoꞌ mandeꞌ,
nuwátiꞌaꞌ.”
32 Mekuneꞌ Isakiꞌ,
“Heánákoꞌ?”
Mehániꞌ Esau,
“Kódóꞌ deꞌe Esau,
ánáꞌmu towutuꞌ.”
33 Rumihi katingkáráꞌna Isakiꞌ,
onoꞌ miꞌi haneꞌi moridiꞌ-ridiꞌ wátána,
napekuneꞌ,
“Ane noꞌonoꞌi,
heáná riꞌi topoahu to maimoꞌ morórá ininá?
Hangko tiꞌara manikoꞌ haweꞌ,
mandeꞌmoꞌ bauꞌ to naꞌántiáꞌaꞌ,
haneꞌi kuwátiꞌ tauna onoꞌ.
Hai pewátiꞌ iti mewaliꞌ miꞌi gáláꞌna duuꞌna i rue-ruena.”
34 Kanahádina Esau laluitana umána iti,
rumihi kateriaꞌna ánti kamasusana laluna,
haneꞌi nauliꞌ,
“Umaꞌ,
kupembiáꞌ bona nuwátiꞌaꞌ woꞌo!”
35 Nauliꞌ Isakiꞌ,
“Ádimu to maiaꞌ modongkoki,
ia miꞌi to moala pewátiꞌ to katoꞌuána hangaa-ngaa kuweꞌikoꞌ.”
36 Nauliꞌ Esau,
“Hintotoꞌ ntepuꞌu karahangaꞌna Iako,b
láwiꞌ deꞌe miꞌi karongkánina mampodongkoꞌáꞌaꞌ.
Rungu-runguna,
naperampaꞌi katowutuꞌkuꞌ,c
hai deꞌe-deꞌe naperampaꞌi wopiꞌi pewátiꞌ to ina nuweꞌiaꞌ.
Ba ara mani wongkódóꞌá pewátiꞌ to peisá nuweꞌiaꞌ?”
37 Mehániꞌ Isakiꞌ,
“Ia kupopewaliꞌ miꞌi nodo pepueꞌámu,
hai upu-upuheꞌ halaluna ina mewaliꞌheꞌ hawiꞌna.
Hai kupahandaꞌ miꞌi pare hai anggoroꞌna.
Ánáꞌkuꞌ to kupokaꞌahiꞌ,
apa mani paꞌi to peisá kuwátiꞌákoꞌ?”
38 Agáiáná membiáꞌ wopiꞌi Esau,
nauliꞌ,
“Umaꞌ,
ba hampákáꞌ peá pewátiꞌmu?
Hangaa-ngaa ara mani pewátiꞌ to peisá nuweꞌiaꞌ.”
Roo onoꞌ,
ia teriaꞌ napasimbuku.
39 Mehániꞌ Isakiꞌ,
nauliꞌ:
“Katoroꞌámu ina karaoꞌ hangko i namu
to tóá hangko i langiꞌ,
hai hangko i tampoꞌ to maruduꞌ.
40 Ina nupakeꞌ oaꞌ pihoꞌmu,
hai ina mewaliꞌkoꞌ hawiꞌna ádimu.
Agáiáná ane nuewaꞌi ádimu iti,
ina tekábáhákoꞌ hangko i kuasaꞌna.”
Iako pohuꞌ lao i Lábá
41 Kóiꞌ ntepuꞌu inaona Esau i Iako,
láwiꞌ ia mampehindorungi pewátiꞌna umána i hia.
Nauliꞌ i laluna,
“Tiꞌara piꞌi marue ina mate umángkuꞌ.d
Ane liu powehá,e
ina kupapate Iako.”
42 Kanahádina peá Ribeka tunggáiána Esau,
ia mokióꞌ miꞌi Iako haneꞌi nahángáꞌá,
“Wutuꞌmu mopailalu ntepuꞌukoꞌ,
hai ara tunggáiána ina mopapatekoꞌ.
43 Mewaliꞌ hangaa-ngaa nupeuláꞌi apa to kuhángáꞌáꞌákoꞌ.
Deꞌe-deꞌe,
pohuꞌkoꞌ lao i wutuꞌkuꞌ Lábá i kótá Hara i Pádá-Árá.
44 Toroꞌmokoꞌ i hia duuꞌna malali kamabukoꞌna wutuꞌmu.
45 Ane nakáláliꞌá miꞌi bábehiámu i hia,
ina kubámbáriákoꞌ bona mesuleꞌkoꞌ mai.
To kupokalááꞌ,
ineeꞌ paꞌi i lalu hangalo peá,
kómu rorodua tiꞌarapokou ara.”
46 Tiꞌara marue hangko ionoꞌ,
nauliꞌ Ribeka i Isakiꞌ,
“Tiꞌara kuꞌundeꞌ mampeitaheꞌ toinána Esau toHeti iti.f
Ane Iako mampotoina woꞌo ánáꞌntawine toHeti hangko i tampoꞌ deꞌe,
rángingkuꞌ miꞌi mate!”