Pueꞌ Ala mopaꞌara pototowi hai Noho
9
Roo onoꞌ,
Pueꞌ Ala mowátiꞌ Noho hai ánáꞌnaheꞌ,
Nauliꞌ,
“Memuleꞌ-muleꞌmokou duuꞌna handaꞌ pemuleꞌámi mokatoroꞌi humalele duniáꞌ.
2 Upu-upu binataꞌ,
tádáhi,
hai bouꞌ ina malááꞌheꞌ i kómu.
Upu-upuna Kuweꞌikou bona nikuasaꞌiheꞌ.
3 Hangkoia Kuweꞌikou hinángkáꞌ tudaꞌ-tudaꞌ mewaliꞌ pandeꞌmi.
Deꞌe-deꞌe Kuweꞌikou woꞌo upu-upu to tueꞌ i duniáꞌ mewaliꞌ pandeꞌmi.
4 Hampákáꞌ peá to tiꞌara mpuꞌu peisá niandeꞌ,
ia miꞌi óntóꞌ bauꞌ to ara mani waheꞌna,
láwiꞌ katueꞌ ara i lalu waheꞌna.a
5 Ane hadua tauna mopapate hangka taunána,
ia hangaa-ngaa rahuku mate.
Noꞌonoꞌ woꞌo ane hambaꞌa binataꞌ mopapate tauna,
ia hangaa-ngaa rapapate.
6 Láwiꞌ Kubábehi tauna mouláꞌ pambiáráNgkuꞌ haduduáNgkuꞌ,
onoꞌ miꞌi haneꞌi heáná peá to mopapate tauna ntániꞌna,
ia woꞌo hangaa-ngaa rapapate.
7 Hai kómu,
memuleꞌmokou duuꞌmi handaꞌ hai nikatoroꞌi humalele duniáꞌ deꞌe.”
8 Napaliliu miꞌi Pueꞌ Ala laluitaNa i Noho hai i ánáꞌnaheꞌ,
Nauliꞌ,
9 “Deꞌe-deꞌe Kupaꞌara pototowi i kómu hai i upu-upu pemuleꞌámi,
10 hai i upu-upu tádáhi hai binataꞌ,
maroꞌa to manondoꞌ ba to maila,
to mesuwuꞌ hingkakani hai kómu hangko i duanga to mahile.
11 Deꞌe miꞌi pototowiNgkuꞌ i kómu:
tiꞌara piꞌi ina Kulábóꞌá duniáꞌ deꞌe hai uwai,
hai tiꞌara piꞌi ina Kupakeꞌ uwai mopatuna upu-upu to tueꞌ i duniáꞌ.b
12 Deꞌe-deꞌe ina Kuweꞌikou tandaꞌ to mopakaróhó pototowiNgkuꞌ i kómu hai upu-upu pemuleꞌámi hai upu-upu to tueꞌ i duniáꞌ.
13 Ina Kupaꞌara mpárágiá i gawu.
Iti to ina mewaliꞌ tandaꞌ pototowiNgkuꞌ i upu-upu to tueꞌ i duniáꞌ.
14 Ane Kupaꞌara gawu i wongko duniáꞌ hai mesupaꞌ mpárágiá,
15-16 ina Kuita haneꞌi Kubuhinao pototowiNgkuꞌ to tiꞌara mokahópóꞌá i kómu hai i upu-upu to tueꞌ i duniáꞌ.
Tiꞌara piꞌi ina Kulábóꞌá duniáꞌ deꞌe hai uwai bona mopatuna upu-upu to tueꞌ.
17 Iti miꞌi tandaꞌna pototowiNgkuꞌ to Kupaꞌara i hinángkáꞌ to tueꞌ i wongko duniáꞌ.”
Noho hai ánáꞌnaheꞌ
18 Ánáꞌna Noho to mesuwuꞌheꞌ hangko i duanga to mahile iti iamoheꞌ Semuꞌ,
Hama hai Apeꞌ.
Hama ia miꞌi umána Kánáꞌá to mewaliꞌ toioruraꞌ toKánáꞌá.
19 Ánáꞌna Noho to tálu iti,
mewaliꞌheꞌ toioruraꞌ upu-upu tauna i humalele duniáꞌ.
20 Bágóꞌna Noho,
topohinoe.
Ia miꞌi to rungu-runguna mobábehi hinoe anggoroꞌ.
21 Hangkani tempó,
Noho mainu anggoroꞌ duuꞌna malangu.
Ia maturu i lalu bambaruꞌna hai menggelá.
22 Kanaitána Hama umána tiꞌara mewaruꞌ,
kásáliu ia mesuwuꞌ lao i rawa hai mopahaweꞌ i wutuꞌnaheꞌ apa to naita.
23 Hangko ionoꞌ,
Semuꞌ hai Apeꞌ laomoheꞌ moánti kómóꞌ rahámpá.
Molumao ntaleuꞌheꞌ mesuaꞌ i bambaruꞌna,
rakómókiá umáraꞌ to tangaꞌna mani letaꞌ.
Mehaileꞌ ntudáheꞌ bona tiꞌara raita katiꞌárána mewaruꞌ umáraꞌ iti.
24 Pempaa miꞌi Noho hangko i kamalanguna,
naisá miꞌi apa to nabábehi Hama ánáꞌngkaupuá.
25 Onoꞌ miꞌi haneꞌi nauliꞌ:
“Kánáꞌá hangaa-ngaa tehuku ánti bábehiána umána,
ia miꞌi Hama!
Ia hangaa-ngaa mewaliꞌ hawiꞌraꞌ wutuꞌna,
hawiꞌ to tepaiwóiꞌá ntepuꞌu.”
26 Nauliꞌ wopiꞌi Noho:
“Kutóiá PUEꞌ Ala to napenómbái Semuꞌ.
Kánáꞌá hangaa-ngaa mewaliꞌ hawiꞌna.
27 Kupembiáꞌ i Pueꞌ Ala
bona katoroꞌána Apeꞌc rapamaeláꞌ,
hai pemuleꞌána toroꞌheꞌ hingkakani hai pemuleꞌána Semuꞌ,
agáiáná Kánáꞌá hangaa-ngaa mewaliꞌ hawiꞌraꞌ.”