Buulus Magadoonyaaywa Yoonaaneebwa
20
01 Turibshaay tingadihoob,
Buulus y'aamananaayee dehaay diigwatiyaayt is'aakakir.
Malya bareeh usalaamiib imsiyoodaayiit,
Magadoonyaab ibi.
02 Baruuh haash haashii iibaabiya.
Y'aamanana gwidaat diigwataatee is'aakakir.
Shaawti Yoonaan ibi.
03 Beentooy Buulus mhay tirga is'a.
Oobharii Suuriyaay mabayee dehaay iitmarihoob,
Yahuudi suurkina gwadi maagnaayt dehaay niyaamiyaan.
Aflaay baruuh Magadoonyaay usalalii m'ageert imkir.
04 Soobaatrus Beeriyaayi oor barooh iram.
Ariistaarkooswa Sakoondooswa Tasaaluuniikaay iiktiinwa,
Gaayoos Darbaay iiktiibwa,
Tiimootiiwwa,
maloob Aasyaay whaashii iiktiin Tiikiikooswa Turoofiimuuswa han barooh iramna.
05 Aan baraah suuroon Taroowaas ookiik giigiyaaniit,
beentooy yhagitna hoon.
06 Laakiin ufatiiri w'iidi har'ii,
Fiilibbii giigna,
markabtii iibaabna.
Ayt yinaati har'ii,
Taroowaas niktimaayt bareeh ninaakib.
Beentooy asaramaat yina nhagit.
Buulus aakhar door Taroowaas ibi
07 T'asaramaatiit gwiraatiib hiddaab yhadhi niikit'ee dehaay nimmarraay.
Buulus toolhaytooh giigi akay whawaadi tarab ookiik oodehay bhaliisamiya.
08 Oogaw umhakwaliib hooy niisit'eeb gwidaat lamba hooy iifiin.
09 Adhami oor Aftiikhoos iidneeb ushibbaaki kehii is'a.
Buulus bhaliiyee,
been w'oor han'aariya.
Malya diwiyaayt umhaya doorii dhibiya.
Shaawti yakisiyaanihoob,
ayaa rhiyaan.
10 Buulus tikwiyaayt w'oori kehii kuuramiya,
y'ayeesooh nuunamiyaayt,
<<Baahasiikna baruuh dhhaniibi!>>
idi.
11 Malya Buulus oogaw reewiya,
hadhiib ikit'a aree tamiya.
Fajir ookiik hadiidiya,
malya iibaabiya.
12 Aflaay uudehay w'oor dhhanii yakisiyaaniit oogaw haay ibeen,
winneet aree afirhiyaan.
Buulus Afasooseeb y'eegrima bhaliisamiya
13 Buulus whaashii Asoos beeti iibaabtiib niyaamiya.
Barooh beentooy nhigiti jillaay hinin aaraw markabtii suurii iibaabna.
14 Baruuh Asooseeb inaakib hoon,
malya barooh tumarkab nis'am,
hiddaab Miitiiliin nibi.
15 Tooyin tumalya beentooysii giignaayt Khiyoos niktim.
Toolhaytooh Saamoos hasamna.
Tooyin tooraaw aree ubharii Miileetuus niktim.
16 Buulus Aasyaay gwida door iisit'eet toona harwaab kiiki akay,
Afasoos hasamiit oobharii iibaabt niyaamiya.
Baruuh Alguduseeb Beenteekoostiib w'iid iidiyeet yhiriwayt winneet ashshigi.
17 Miileetuusee Buulus tukaniisaati suurkina Afasooseeb iifiin beeti diigwatiya.
18 Baraah beentooy iktimnihoob,
baruuh <<Ani oomb'i w'awwaliib Aasyaay whaashiib y'aneenaay,
kasseeh idaman igeebookna hassaneeb kak sakaneeb baraakna tikteenna.
19 Yahuudi gali akraat maagnaayt hoosu id'iin.
Laakiin ani winneet rhasaa W'ankwana shagaaman,
winneet milootan.
20 Bareekna rayiistiniina naat han hookna akish kaaki.
Naatka sooyan hookna,
diima oodehayi suurii allaman hookna,
gaw gawii aktim.
21 Ani Iyahuudwa Ijintiiliiwwa Ukwaasanaay deha tuubeeni jillaaywa W'ankwanaayoon Yasuu'a aamaneeni jillaaywa sooyan.
22 Alguduseeb naan deha iikti tindiyeeb ani kaakan.
Laakiin Ukwaasanaayi shuuk ibakii sinaakriit beentooy iibi andi.
23 Madiinaatka shuumanihoob,
oosjin daamiit Alguduseeb lhami andiyeet toona Aashuuk Itageega sooyeenheeb.
24 Laakiin tehalaagaay faaysaniyeeb ookiikwa,
ushaga W'ankwana Yasuu'a s'abkaayi ikatiyeeb,
Ukwaasanaayt tin'imaati usakana udaayiinaay isooti atankwiikweeb ookiikwa,
aniib umidhhan takweet kiibari.
25 Ani mhiin mhiiniika giigan.
Ukwaasanaayt tehad'aayi sooyaneeb baraakna shaawti gaal han rhi kitdiinaheeb.
26 Aflaay amsi sooyani hookna,
ani kassooh oodehayi booyii nhasu,
gaalnaay han ka'araatamaman!
27 Ukwaasana hookna yharriiweet toona kastooh sooyan hookna.
28 Igarooyookna gw'adna,
Aashuuk Itageega sigw'adaayeekna ikatiyeeb oodehay gw'adna.
Ukwaasana ubooyooh ooknaay dilba ahaab ikatiyeet tukaniisaati shakwa akeena.
29 Aniib oogiigi har'ii,
karay y'iit ibitkeekna itkwabiisneet toona akteen.
Baraah dehookna fareena.
30 Udehayiisookna gali yakiit gwisir allameen,
y'aamanana har'oohna eesikwneet yhariwna.
31 Aflaay digwagwna!
Mhay hawla oomb'i whawaad taamlu eegw'adeeb faayee sooyeetookna toona sh'aana.
32 Ani oont'a Ukwaasanaayt gw'adaadtiibwa Ukwaasanaay ibhali idaayiini dehaaywa an'iish hookna.
Tuun batuuh asti yakistini hookna,
Ukwaasana kassooh oodehayooh iniiweet tibaraka aree iyaaw hookna indi.
33 Ani masi han gaalnaay ashteet tari dim'araab tari halaakaab harwaab kaaki.
34 Aneebwa y'arawaawwa nishtinheet teena kasteeh een y'ayeesi shagaamaayt atkwikweet toona baraakna tikteenna.
35 Kasteeh teena ani ad'iyeet,
oodehay ootaad baabariin kak teeshtiimneet toona oon w'akra shanhii rhisan hookna.
W'ankwanaayoon Yasuu'a uukna diyaab iikiyeeb ibhali sh'aana,
<Oomiyaayiika oomiyaawiib gwida dehara eefi.>
diyaabu.>>
idi.