Buulus Afasooseeb
19
01 Aboolloos Koorintooseeb iifiyihoob,
Buulus eerbaayi haashii Afasoos marii iibaabiya.
Beentooy kwiriyaatay galib imri.
02 Baruuh bareeh raatiya,
<<Yasuu'a aamantaanihoob,
Eeshuuk Itageega tittiyeewaayna?>>
idi.
Baraah aree <<Abadan!
Shuuk Tageega iifiineet toona masi han kinmaasiw.>>
idiin.
03 Aflaay Buulus bareeh raatiya,
<<Aflaay baraakna naanhooy titoomaasna?>>
idi.
Baraah <<Yuhanna allamiyeet t'atoomsooy nitoomaas.>>
idiin.
04 Buulus <<Yuhanna tuubti jillaay oodehay iimis.
Bariiyooh har'ii y'iiniib aamaneeneet toona oodehay sooya.
Been baruuh hooy hadiidiyeeb aree Yasuu'aabi.>>
idi.
05 Buulus een ibhali diyee imaasiw uudehay,
W'ankwana Yasuu'iib oosmii itoomaasna.
06 Malya Buulus y'ayeeh bareeyooh kehii daasiyanihoob,
Aashuuk Itageega bareeyooh kehii daayaan.
Malya baraah wari bhali hadiidiyaan,
aree bhaliib isridna.
07 Baliin aanda kassaah tamna malooba.
08 Buulus Yahuudi diini gaw shuumiyaayt,
beentooy mhay tirga winneet ash'araa oodehay Ukwaasanaayt had'aayeeti aay sooyi.
Bareeh bhaliisamiit aree afhisi.
09 Laakiin bareesooh gwadi im'akaarniit,
w'aamanti iribna.
Kassooh oodehayi suurii W'ankwanaay usalaliib amaagna hadiidiyaan.
Aflaay Buulus bareeh y'ish id'i.
Buulus y'aamanana geebooh haay giigiya.
Tiiraanuusiit tumidrasaatiib imb'eebka bareeh allamiya.
Beentooy aree kassoohoob bhaliiyi.
10 Beet tuuna malu hawla tiki.
Aflaay kassaah Iyahuudiiwwa Iyoonaaniiwwa Aasyaay whaashiib ikwiir,
W'ankwanaay ibhali imaasiwna.
11 Ukwaasana Buulusiib w'ayii akraat m'uujisa ikwaas.
12 Uudehay Buulusiib ugaru tehaab yhalaakaawwa imandilwa han yakisiyaaniit,
oodehay oolhaab haay ibeen.
Uudehay tilhanay iibriin kassaah mheelamiyaan,
aajin han hooy itfir'ana.
13 Yahuudi gwadi oodehayiib hiireeriyaaniit,
Yasuu'iib oosmii had'aayeet anu eejin isfir'ana.
Eejinee dehaay,
<<Been Buulus hadiidiyeeb Yasuu'iib oosmii fir'anaa!>>
iidna.
14 Yahuudi fagiiri win Sakaawa ittiyoodiinaay ar asarama beet toona sakiin.
15 Laakiin yint gaat aajin bareeyooh dehaay,
<<Yasuu'a nikteen!
Buulus han neemsiiw.
Baraakna laakiin aabaana?>>
idiin.
16 Malya uutak aajin hooy iifiini bareeyooh dehaay fariyaayt ithab'a.
Baraah oogaw raboobaawwa booyeewwa ifoorna.
17 Iyahuudwa Ijintiiliiwwa Afasooseeb ikwiir een imaasiwnihoob,
kassaah irkwiin.
Aflaay W'ankwana Yasuu'iib uusim hamooysamiya.
18 Baliin y'aamaniyaan oont'a gwida hooy eeyaaniit,
suur iid'aneet tumaagtoohna ifidhadhna.
19 Gali bareesooh sehart shagaamiin,
eektabeehna oodehayi suurii haay eeyaaniit loowiyaan.
Baliin eektabi taman ay tamuun alfa ashteeti mhallaga iikti.
20 Shaawti W'ankwanaay ibhali winneet ibrarna,
masi akrakaab iiktiin.
21 Tuun tuuna kastuuh tikaayt har'ii,
Buulus Magadoonyaabwa Akhaa'iyaaywa hasamiit,
Algudusi mabay niyaamiya.
Buulus <<Beentooysii,
Roomaab iibi andi.>>
idi.
22 Aflaay baruuh malu shamaamiigaayeeh,
Tiimootiiwwa Araastuuswa,
Magadoonyaab marii diigwatiya.
Laakiin baruuh Aasyaay whaashiib middaat is'a.
Afasooseeb rookaat yakiyaan
23 Beenhoob W'ankwanaay usalali sabbi,
beentooy akraat ribshaay tiifi.
24 Tak ashteet shagaamanaab Dimeetriyoos iidneeb iifi.
Uun baruuh ashteetii tusanam Artamiis shagaamiya.
Bariiyooh dehaay shagaamiin uudehay aree gwida mhallaga rayiimiyaan.
25 Dimeetriyoos oodehay gaal shaga daayiin kasseeh gaal mhiin haay eeyaayt,
<<Y'arawaan,
oon ushagaay daayi rayi rayiimnayeet toona tikteenna.
26 Laakiin uun uutak Buulus iyadneeb gwida dehay kwakwidhisiyaneet toona rhitaana aree timaasiwna.
Uun baruuh Afasooseeb oobhaat kiiki,
laakiin kastooh Aasyaay oon ushaga daayiini.
Baruuh,
een hinin y'aadamiya shagaamnayeeb isanama sidik kwaasanaab kiikeen indi.
27 Beet tuuna ushanhoon oobhaat kitsehasir,
laakiin tusam toowwin Artamiistiib uugaw han day'ami indi.
Kassooh Aasyaay whaashiibwa kastooh tuduniyaatiibwa y'abidneet Tusanam tuukna han hamooysami kitdi,
umatuunuuh dhibi indi.>>
idi.
28 Ishagaamana een ibhali imaasiwnihoob,
yhaseeniit waliikiyaan,
<<Afasoosiit tukwaasana Artamiis tutageega!>>
idiin.
29 Willa tumadiinaatiib ribshaayt tiki.
Uudehay eenda Buulusi geeb Magadoonyaay y'aa iifiin,
Gaayooswa Ariistaarkooswa y'aabikna.
Malya baraah kassaah tumadiinaati majlisi mhiin ookiik dhaabiyaan.
30 Buulus fir'atiit oodehay bhaliisamtiib yhariweek han,
y'aamanana barooh sifar'aab kiikeen.
31 Whaashi daabti gwadi Buulusi arawa.
Baraah Buulusii dehaay diigwat ifdigniit,
been oomhiin beeti biifir'eet toona hooy yhariwna.
32 Uudehay umajlisiib iifiin arbishamiyaan,
gal gaana waliikiyaan,
aaraw aree weena waliikiiyaan.
Aagwidaakaab aree aakna toona dehaay y'aab iiktiineet kiikanna.
33 Iyahuudi Iskandar iidni tak oodehayi suurii suurisiyaaniit naan iideeb aree sooyaan.
Uutak w'ayooh y'abikaayt toona tutikeet oodehayi suurii hadiidiya.
34 Uudehay laakiin baruuh Yahuudiib iiktiyeet toona ikannihoob,
kassaah maloot s'a gaal hissii waliikiyaan,
<<Afasoosiit tukwaasana Artamiis tutageega!>>
idiin.
35 Tumadiinaati kaatib oodehay dinisiyaayt,
<<Yaa Afasoosi dehay,
tusanam Artamiis tutageega toon tumadiinaatiib uudehay anbiideet toona kastooh tuduniyaatiib baakaan aabu?
Tul'andalaatuuh tibreetee tooy dhibtaneet toona baakaan aabu?
36 Toon toona ittawiib kiihaay,
shaawti ashshigiit amaagna baasakaana.
37 Baraakna een eenda tooy haay eetaana.
Laakiin aan baraah oodiini gaw gwiharaab kiikeen tari tukwaasanaatoon neewaab kiikeen.
38 Dimeetriyooswa y'arawaahwa een eenda kehii halaagaayt ibariineek,
mhakamaatwa gaadiyaabwa nibari.
Baraah beentooy ba'ashkiimiin.
39 Baraakna toon toonaatiika gwidaakaat tid'aneek,
aflaay tugadiyaay tumadiinaati majlisi suurii batiikti.
40 Amsi hinin ribshaayti sabbii atehimamaaba.
Beet tuuna aree afoob kitbari.
Rookaat haay nid'i sabab han kiihaay.>>
idi.
41 Een ibhali idiit har'i,
shaawti uudehay giigiyeet toona sooya.