Tasaaluuniikaay igwirha
17
01 Buuluswa y'arawaahwa Amfiibooliiswa Aboollooniyaaywa iibaabiinihoob,
Tasaaluuniikaab ibeen.
Beentooy Yahuudi diini gaw iifi.
02 Buulus ilamadiitooh beentooy ibi.
Mhayt Sabtaat aree oodehay ooktaabii bhaliisamiya.
03 Baruuh Umasiihi ibakii lhamiiniyeet toona oodehay rhisi.
Malya tooyat hooy yakiyaneet toona sooyi.
Buulus masi Yasuu'a,
baruuh hooy hadiidiyaneeb Umasiihi ikatiyeet toona han sooyi.
04 Gali bareesooh Buulus iideeb ibhali aamaniyaaniit,
Buuluswa Siilaaswa iramna.
Gwida Ukwaasana iriikw Yoonaaniibwa,
gwidaat fagaraat m'atwa han ibhali aamaniyaan.
05 Laakiin Iyahuudi hasaadaat id'iin.
Aflaay shalik amaag dehay usuugii ishaawawiiniit tumadiinaatiib ribshaat id'aneet toona sooyaan.
Baraah Buuluswa Siilaaswa oodehayi mijlas sallamtiib yhiriwna akay,
willa Yaasooniib oogaw ibeen.
06 Laakiin bareeh beentooy inawnihoob,
Yaasoonwa W'ankwanaay aamanana gwadibwa rarhoofiyaan.
Bareeh y'abikna,
tumadiinaati had'aayi suurii isingadniit,
<<Aan aanda kasseeh yhasheeb ribshaayt ikwaas oont'a tooy y'aaba.
07 Yaasoon aree bareeh ugawiyooh yhadar.
Baraah kassaah Gaysar Iroomaani bhali kiisinaakirna,
masi Yasuu'a ittiyoodi gaal weer had'a eefi iyadna.>>
idiin.
08 Yhaakmaawwa uudehaywa een ibhali imaasiwnihoob yhaseen.
09 Malya Yaasoonwa y'aamanana eerawwa damaanaati mhallaga iskwasniit ifdigna.
Buuluswa Siilaaswa Beeriiyaay
10 Been whawaadiib y'aamanana Buuluswa Siilaaswa Beeriiyaab beeti ifdigna.
Beentooy iktimnihoob,
Yahuudi diini gaw ibeen.
11 Uudehay Beeriiyaay iifiin Tasaaluuniikaay udehayiika daayiikaabayt,
afirhaa ibhali isnaakirna.
Ibhali baraah iidneeb sidik iiktiineeb biikaayneeb iishbibnee dehaay b'eebka ooktaab agriiyaan.
12 Gwida Yahuudi Ukwaasana aamaniyaan,
Yoonaanee aree fagaraat m'atwa gwida daawwa han aamaniyaan.
13 Iyahuudi Tasaaluuniikaay iifiin,
Buulus Ukwaasanaay ibhali Beeriiyaay oodehay sooyiini miyaad imaasiwnihoob,
oodehay Buulusiib isbibniit gwirhaab id'iin.
14 Y'aamanana willa Buulus oobhar dawil mhiin istoobna.
Laakiin Siilaaswa Tiimootiiwwa Beeriiyaay is'ana.
15 Shalik da Asiinaab ookiik Buulus iramna.
Malya y'agarniit aree Siilaaswa Tiimootiiwwa willa barooh eenkiibneet toona sooyaan.
Asiinaay
16 Buulus Asiinaay bareeh yhigitihoob,
tumadiina sanamaab ataabt akay rhiyaayt winneet yhasi.
17 Aflaay baruuh Iyahuudiibwa Ukwaasana iriikw Iyoonaani geeb bhaliisamti jillaay,
Iyahuudi diini gaw ibi.
B'eebka aree usuugiib imiireeb oodehay bhaliisamiya.
18 Gwadi Abiigooriyaawwa Istoowaawwa falaasifa han barooh imgwasaarna.
Buulus Yasuu'iib usakana udaayiibwa tooyattii uyaktiibwa hadiidi.
Gali barooh raatiyaan,
<<Uun whaalay kak indi?>>
idiin.
Aaraw aree <<Baruuh wari ankwana at'iimiini!>>
idiin.
19 Malya baraah Buulus Aryuubaaguus iidna majlisi suurii haay eeyaaniit,
<<Naan gayiina agriistiniya oont'a sooyaa hoon?
20 Girbaana hadiidee nimaasiw hook,
oont'a naan haay tisehariiweeb kanaant nhariw,
sooyaa hoon.>>
idiin.
21 Kassuuh Asiinaay uudehaywa,
beentooy ikwiir uudehay igirbaabwa,
idamaneehna weenaatiib kwidhsaab kiikeen.
Laakiin baliit teena tigayiinaateeb hadiidiyaan aree isnaakirna.
22 Oont'a Buulus Aryuubaaguuseeb oodehayi suurii ingadaayt,
<<Asiinaay uudehay!
Bareekna diini dehay akay rhani hookna.
23 Ani tumadiinaatiib hiireeran,
baraakna t'abidneet teena han ashbib.
Karaamaati mhiin gaal rhan,
bariiyooh kehii <Ukwaasana w'atoogagmaay dehaay> miyaad kataabu.
Baraakna barooh t'abidna laakiin baruuh sidik aab ikatiyeeb kitkanna.
Aflaay oon barooh sooyi hookna andi.
24 Uun Ukwaasana tuduniyaawwa kastooh hooy teefeetwa manooyaabu.
Baruuh toobuutwa tibreeti Ankwana.
Oodehayi ayi shagaamaab ikatiini diini gawaayeeb aree kiikwiri.
25 Baruuh dehayii shamaamt kiihariw.
Kassooh oodehay midhhanwa,
yhamshikwwa,
weenaawwa iniiw.
26 Oodehay kassooh tubuutiib eefeeb Ukwaasana gaal takii ikwaas.
Kassuuh uun uudehay nhoobwa naadwa ikweerneeb aree whankaay sooya.
27 Ukwaasana toon kastooh d'iyaabu,
shaawti hinin aree barooh nhariw,
niiktim niyad,
nimaar niyad.
Baruuh hinee gaalnaay han sagiib kiiki.
28 Baruuh oomidhhan iniiw hoon,
hantaaysiini hoon,
isfaayi hoon.
Labiibaayaakna gali <Hinin han dirriyaaytooh nikati!>
diyaaba.
29 Hinin Ukwaasanaay ara.
Aflaay barooh dim'araaywa ashteetiiwwa tari aweeyeewwa dehay shagaamaab ikatiineeb,
y'ista yhariwneet hay'aatiika id'ani sanam hiisnayeet tuuna daayiit kitti.
30 Uudehay suur gamaamtiib iifiin akay Ukwaasana bareeh afooya.
Laakiin oont'a Ukwaasana uudehay kassuuh eefeeni mhiiniika ibakii bariiyooh dehaay it'agiirneet toona waliikiini.
31 Baruuh oodehay w'adlii haakamiiniyeet yint gaat waasiya.
Beet toona aree tak dehaay waasiya.
W'ankwana barooh tooyattii yakisiyaayt beet toona kassooh oodehay rhisiya.>>
idi Buulus.
32 Uudehay Buulus tak tooyattii yakiya diyee imaasiwnihoob,
gali ifaayidna.
Wari aree <<Weer door een ibhali masi hadiidtiniyeet toona hook nhariw.>>
idiin.
33 Buulus been umajlisii aree bak giigiya.
34 Shalik da Ukwaasana aamaniyaaniit Buulus iramna.
Gaal bareesooh umajlisi eegrimaayeeb gaalu Diyooniisyoos iidna.
Daamaariis iidneet takatwa waribwa han Ukwaasana aamaniyaan.